ଜୁନ୍ ୫, ଏହି ତାରିଖଟି କ୍ରିକେଟ ଇତିହାସ ପାଇଁ ଏକ ଖାସ୍ ଦିନ। ଏହି ଦିନ ଜନ୍ମ ହୋଇଥିବା ଜଣେ ବୋଲର ଗୋଟିଏ ଉଇକେଟ କାରଣରୁ ସେ କ୍ରିକେଟ ଇତିହାସରେ ଅମର ହୋଇଗଲେ। ସେ ହେଉଛନ୍ତି ଇଂଲଣ୍ଡର ପୂର୍ବତନ ଲେଗ ସ୍ପିନର ଏରିକ ହୋଲିସ୍। ତାଙ୍କ କ୍ୟାରିୟରରେ ୨୩୨୩ଟି ଉଇକେଟ ନେଇଥିଲେ। ଆଜି ତାଙ୍କର ୧୦୮ତମ ଜୟନ୍ତୀ।
ହୋଲିସ ୧୯୪୮ରେ ଖେଳାଯାଇଥିବା ଓଭାଲ ଟେଷ୍ଟ ପାଇଁ ଜଣାଶୁଣା ଥିଲେ। କ୍ରିକେଟର ସର୍ବଶ୍ରେଷ୍ଠ ବ୍ୟାଟ୍ସମ୍ୟାନ ଡନ ବ୍ରାଡମ୍ୟାନ୍ଙ୍କ ଏହା ଶେଷ ମ୍ୟାଚ ଥିଲା। ଟେଷ୍ଟ କ୍ରିକେଟରେ ୧୦୦ ଆଭ୍ରେଜ୍ ପୂରଣ କରିବାକୁ ତାଙ୍କୁ ମାତ୍ର ୪ ରନ ସ୍କୋର କରିବାକୁ ପଡିଥିଲା। କିନ୍ତୁ ହୋଲିସଙ୍କ ଗୁଗଲି ବଲ୍ରେ ବ୍ରାଡମ୍ୟାନ ଦ୍ୱିତୀୟ ବଲ୍ରେ ଆଉଟ୍ ହୋଇଯାଇଥିଲେ। ଫଳରେ ତାଙ୍କ ଟେଷ୍ଟ କ୍ୟାରିୟର ଆଭ୍ରେଜ୍ ୯୯.୯୪ରେ ଶେଷ ହୋଇଥିଲା। ଏହି ମ୍ୟାଚ୍ରେ ବ୍ରାଡମ୍ୟାନ ଦ୍ୱିତୀୟ ଇନିଂସରେ ବ୍ୟାଟିଂ କରିବାକୁ ଆସିପାରି ନ ଥିଲେ। କାରଣ ଅଷ୍ଟ୍ରେଲିଆ ଏହି ମ୍ୟାଚକୁ ଏକ ଇନିଂସରେ ଜିତିଥିଲା।
ଏରିକ ହୋଲିସ୍ ଜଣେ ଲେଗ ସ୍ପିନର ଥିଲେ। ୧୯୩୫ରେ ସେ ଇଂଲଣ୍ଡ ପକ୍ଷରୁ ଡେବ୍ୟୁ କରିଥିଲେ। ସେ ତାଙ୍କ କ୍ୟାରିୟରରେ ମାତ୍ର ୧୩ଟି ଟେଷ୍ଟ ଖେଳି ୪୪ ଉଇକେଟ ନେଇଥିଲେ। ଅନ୍ତର୍ଜାତୀୟ କ୍ରିକେଟ ଅପେକ୍ଷା ହୋଲିସ୍ କାଉଣ୍ଟି କ୍ରିକେଟରେ ଅଧିକ ପ୍ରସିଦ୍ଧ ଥିଲେ। ଓ୍ବାର୍କଶେୟାର ପକ୍ଷରୁ ୫୧୪ଟି ପ୍ରଥମ ଶ୍ରେଣୀ ମ୍ୟାଚ ଖେଳି ୨୩୨୩ ଉଇକେଟ ନେଇଥିଲେ। ସେଥିମଧ୍ୟରୁ ୧୮୨ ଇନିଂସରେ ପାଞ୍ଚଟି ଉଇକେଟ ଏବଂ ୪୦ଟି ମ୍ୟାଚରେ ୧୦ ଉଇକେଟ ନେଇଥିଲେ।
