ଓ୍ବାଶିଂଟନ/ବେଜିଂ,୨-୯: ଆମେରିକା ଓ ଚାଇନା ମଧ୍ୟରେ ଚଳିତ ମାସରେ ବାଣିଜ୍ୟ ଯୁଦ୍ଧ ନେଇ ଆଲୋଚନା ଆରମ୍ଭ ହେବାକୁ ଯାଉଥିବା ବେଳେ ରବିବାର ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଚାଇନାରୁ ଆସୁଥିବା ୧୨୫ ବିଲିୟନ ଡଲାର ସାମଗ୍ରୀ ଉପରେ ୧୫% ଅତିରିକ୍ତ ଆମଦାନୀ ଶୁଳ୍କ ଆଦାୟ କରିବାକୁ ନିର୍ଦ୍ଦେଶ ଦେଇଛନ୍ତି। ଅନ୍ୟପକ୍ଷରେ ଚାଇନା ମଧ୍ୟ ପାଲ୍ଟା ଜବାବ ଦେଇ ଆମେରିକାର ଅଶୋଧିତ ତେଲ ଉପରେ ୫% ଅତିରିକ୍ତ ଆମାଦାନୀ ଶୁଳ୍କ ଆଦାୟ କରିବାକୁ ନିର୍ଦ୍ଦେଶ ଦେଇଛି। ଅତିରିକ୍ତ ଆମଦାନୀ ଶୁଳ୍କ ଆଦାୟ ହେବାକୁ ଥିବା ଚାଇନା ସାମଗ୍ରୀ ମଧ୍ୟରେ ସ୍ମାର୍ଟ ସ୍ପିକର, ବ୍ଲୁଟୁଥ୍ ହେଡ୍ଫୋନ ଓ ଏକାଧିକ ଶ୍ରେଣୀର ଫୁଟ୍ଓ୍ବେୟାର ରହିଛି। ଚାଇନା ମଧ୍ୟ ପାଲ୍ଟା ଜବାବ ଦେଇ ଆମେରିକାର ୭୫ ବିଲିୟନ ଡଲାର ସାମଗ୍ରୀ ଉପରେ ଅତିରିକ୍ତ ଟାରିଫ ବୃଦ୍ଧି କରିବାକୁ ନିଷ୍ପତ୍ତି ନେଇଛି। ତେବେ କେଉଁ ପ୍ରକାର ସାମଗ୍ରୀ ଉପରେ ଅତିରିକ୍ତ ଟାରିଫ୍ ବୃଦ୍ଧି କରାଯାଇଛି ତାହାକୁ ଚାଇନା ସ୍ପଷ୍ଟ କରିନାହିଁ। ଆମେରିକାରୁ ଆସୁଥିବା ୫୦୭୮ ପ୍ରକାର ସାମଗ୍ରୀ ମଧ୍ୟରୁ ୧୭୧୭ ପ୍ରକାର ସାମଗ୍ରୀ ଉପରେ ଚାଇନା ଅତିରିକ୍ତ ୧୫% ଟାରିଫ୍ ଆଦାୟ କରିବ। ଡିସେମ୍ବର ୧୫ରୁ ଏହା କାର୍ଯ୍ୟକାରୀ ହେବ। ସୂଚନାଥାଉ କି, ଗତମାସରେ ଟ୍ରମ୍ପ ଚାଇନାରୁ ଆସୁଥିବା ସାମଗ୍ରୀ ଉପରେ ୫% ଟାରିଫ ଆଦାୟ କରାଯିବ ବୋଲି ଘୋଷଣା କରିଥିଲେ। ସେଲ୍ଫୋନ, ଲାପଟପ୍, କମ୍ପ୍ୟୁଟର, ଖେଳନା ଓ କପଡା ଉପରେ ଡିସେମ୍ବର ୧୫ରୁ ଅତିରିକ୍ତ ଟାରିଫ୍ ବୃଦ୍ଧି କରାଯିବ ବୋଲି ଚାଇନା କହିଛି।
