ନୂଆଦିଲ୍ଲୀ,୧୨-୨: ସରକାର ମୋଟର ଯାନ ଆଇନରେ ସଂଶୋଧନ ଆଣିବାକୁ ଯୋଜନା ରଖିଛନ୍ତି। ଟ୍ରାଫିକ ଏବଂ ପରିବହନ ନିୟମ ଉଲ୍ଲଙ୍ଘନ କ୍ଷେତ୍ରରେ ଚାଲାଣ ଜମା କରିବା ସମୟକୁ ଏଥିରେ ବଢାଯାଇ ୬୦ ଦିନ କରାଯାଇପାରେ ବୋଲି କୁହାଯାଉଛି। ଏହି ସମୟ ସୀମା ମଧ୍ୟରେ ଯାନ ମାଲିକ ଯଦି ଚାଲାଣ ରାଶି ପ୍ରଦାନ ନ କରନ୍ତି ତାଙ୍କ ଲାଇସେନ୍ସ, ଯାନର ପଞ୍ଜୀକରଣ ନବୀକରଣ କରାଯିବ ନାହିଁ। ସଡକ ପରିବହନ ମନ୍ତ୍ରଣାଳୟ ପକ୍ଷରୁ ଜଣେ ବରିଷ୍ଠ ଅଧିକାରୀ ଏ ସମ୍ପର୍କରେ ସୂଚନା ଦେଇଛନ୍ତି। ଚାଲାଣ କଟାଯାଇଥିଲେ ମଧ୍ୟ ଏହି ଅର୍ଥ ଦେବାକୁ ଯାନର ଡ୍ରାଇଭରମାନେ ଅନେକ ସମୟ ଲଗାଉଛନ୍ତି। ଏହାକୁ ବିଚାର କରି ନୂଆ ବ୍ୟବସ୍ଥା ଆଣିବାକୁ ଏବେ ଯୋଜନା କରାଯାଉଛି ବୋଲି ଅଧିକାରୀ କହିଛନ୍ତି। ଯଦି ଜଣେ ବ୍ୟକ୍ତି ଚାଲାଣ ଅର୍ଥ ପ୍ରଦାନ କରିନାହାନ୍ତି ଏବଂ ପୁଣି ଥରେ ନିୟମ ଉଲ୍ଲଙ୍ଘନ କରି ଧରା ପଡିଲେ, ସେ କ୍ଷେତ୍ରରେ ଜରିମାନା ଅର୍ଥ ଅନେକ ମାତ୍ରାରେ ବଢିଯିବ। ଏ କ୍ଷେତ୍ରରେ କମ୍ପାଉଣ୍ଡେବଲ ଚାଲାଣ କଟିବ। ଏହା ଏକ ପ୍ରକାରର ଚାଲାଣ, ଯାହା ବିନା କୌଣସି କୋର୍ଟ ଯାଇ ଟ୍ରାଫିକ୍ ପୋଲିସ ପାଖରେ ମାମଲାର ଯୋଡାଯାଇଥିବା ଅର୍ଥର ସମାଧାନ କରାଯିବ। ନୂଆ ନିୟମ ଅନ୍ଲାଇନ ପଏଣ୍ଟ ଅଫ୍ ସେଲ୍ ଦ୍ୱାରା ଇ-ଚାଲାଣ କାଟିବା ଉପରେ କେନ୍ଦ୍ରିତ ହେବ। ନିୟମ ଉଲ୍ଲଘଂନ କରୁଥିବା ବ୍ୟକ୍ତି ବିଶେଷଙ୍କ ବିବରଣୀ ସରକାରୀ ଏଜେନ୍ସି ପୋର୍ଟାଲରେ ଉପଲବ୍ଧ ହେବ। ଟ୍ରାଫିକ ଅଧିକାରୀମାନେ ଏହାର ସହାୟତା ନେଇ କାହା ଉପରେ କେତେ ଚାଲାଣ ଅର୍ଥ ରହିଛି କି ନାହିଁ ସେ ସମ୍ପର୍କରେ ଜାଣିପାରିବେ।
