ଚେନ୍ନାଇ,୯।୫: ବିଶ୍ୱର ଅନ୍ୟତମ ଶ୍ରେଷ୍ଠ ଫୁଟବଲ ଲିଗ୍ ରୂପେ ପରିଗଣିତ ହେଉଥିବା ‘ଲା ଲିଗା’ ଆଗାମୀ ଜୁନ୍ ମାସ ମଧ୍ୟ ଭାଗରୁ ଆରମ୍ଭ ହେବା ସମ୍ଭାବନା ସୃଷ୍ଟି ହୋଇଛି। ସ୍ପାନିଶ୍ ଫୁଟବଲ ଲିଗ୍ ସିଷ୍ଟମର ଏହି ପୁରୁଷ ପେସାଦାର ଫୁଟବଲ ଡିଭିଜନକୁ କରୋନା ଭାଇରସ ସଂକ୍ରମଣ ପାଇଁ ସସ୍ପେଣ୍ଡ କରାଯାଇଥିଲା ଓ ୩ ମାସ ପରେ ପୁଣି ଥରେ ଲିଗ୍ ଆରମ୍ଭ ହେବାକୁ ଯାଉଛି। ଇତିମଧ୍ୟରେ ସବୁ ଖେଳାଳି କୋଭିଡ-୧୯ ପରୀକ୍ଷା ଆରମ୍ଭ କରାଯାଇଛି ବୋଲି ଲା ଲିଗା ଇଣ୍ଡିଆ ନିର୍ଦ୍ଦେଶକ ଆଣ୍ଟୋନିଓ କାଚାଜା କହିଛନ୍ତି। ଆସନ୍ତା ସପ୍ତାହରୁ ଖେଳାଳିମାନେ ଟ୍ରେନିଂ ଆରମ୍ଭ କରିବେ ବୋଲି ମଧ୍ୟ ସେ କହିଛନ୍ତି। ତେବେ ଗୋଟିଏ ଦିନ ପୂର୍ବରୁ ଜର୍ମାନୀର ପେସାଦାର ଫୁଟବଲ ଲିଗ୍ ବଣ୍ଡେସ୍ଲିଗା ମେ ମଧ୍ୟରୁ ଆରମ୍ଭ ହେବ ବୋଲି ଘୋଷଣା କରାଯାଇଥିଲା।
ଲିଗ୍ ପୁଣି ଆରମ୍ଭ କରିବାକୁ ସରକାରଙ୍କ କର୍ତ୍ତୃପକ୍ଷଙ୍କ ସହ ବହୁବାର ଆଲୋଚାନ କରାଯାଇଛି। ଜୁନ୍ ଦ୍ୱିତୀୟ କିମ୍ବା ତୃତୀୟ ସପ୍ତାହରେ ଲା ଲିଗା ଆରମ୍ଭ କରିବାକୁ ପ୍ରୟାସ ଜାରି ରହିଛି। ଟ୍ରେନିଂ ପାଇଁ କ୍ଲବ୍କୁ ନିର୍ଦ୍ଧାରିତ କାର୍ଯ୍ୟସୂଚୀ ପ୍ରଦାନ କରାଯାଇଛି। ଚଳିତ ସପ୍ତାହରେ ଗ୍ରାଉଣ୍ଡଗୁଡିକୁ ଚେକ୍ କରାଯିବ ଓ ଖେଳାଳିମାନଙ୍କର ପରୀକ୍ଷଣ ହେବ। ଆସନ୍ତା ସପ୍ତାହରେ ବ୍ୟକ୍ତିଗତ ଟ୍ରେନିଂ ଆରମ୍ଭ କରାଯିବ। ମେ ୧୮ ତାରିଖରୁ ଗ୍ରୁପ୍ ଟ୍ରେନିଂ ଆରମ୍ଭ କରାଯିବ। ୨୫ରୁ ଦଳର ଅଧା ଖେଳାଳି ମିଳିତ ଭାବେ ଟ୍ରେନିଂ ଆରମ୍ଭ କରିପାରିବେ ବୋଲି କାଚାଜା କହିଛନ୍ତି। ଲା ଲିଗାର ଚଳିତ ସଂସ୍କରଣରେ ବାର୍ସିଲୋନା ୫୮, ରିୟଲ ମାଡ୍ରିଡ ୫୬ ଓ ସେଭିଲା ୪୭ ପଏଣ୍ଟ ହାସଲ କରି ଯଥାକ୍ରମେ ତାଲିକାର ପ୍ରଥମ, ଦ୍ୱିତୀୟ ଓ ତୃତୀୟ ସ୍ଥାନରେ ରହିଛନ୍ତି।
