ନୂଆଦିଲ୍ଲୀ,୧୮-୬: ଟେଲିକମ୍ ଡିପାର୍ଟମେଣ୍ଟର ସମସ୍ତ ନିଷ୍ପତ୍ତି ନେଉଥିବା ସଂସ୍ଥା ଡିଜିଟାଲ କମ୍ୟୁନିକେଶନ୍ସ କମିଶନ(ଡିସିସି) ସୋମବାର ଭାରତୀ ଏୟାରଟେଲ ଓ ଭୋଡାଫୋନ ଆଇଡିଆ ଠାରୁ ପେନାଲ୍ଟି ଆଦାୟ ଲାଗି ଅନୁମତି ଦେଇଛନ୍ତି। ରିଲାଏନ୍ସ ଜିଓକୁ ପଏଣ୍ଟ ଅଫ୍ ଇଣ୍ଟରକନେକ୍ସନ(ପିଓଆଇ) ନ ଦେବା କାରଣରୁ ସେମାନଙ୍କ ଠାରୁ ପେନାଲ୍ଟି ଆଦାୟ କରାଯିବ। ତେବେ ଡିସିସି ୩୦୫୦ କୋଟି ଟଙ୍କାର ପେନାଲ୍ଟି ରାଶିରେ ସଂଶୋଧନ ଲାଗି ଟ୍ରାଇ ଠାରୁ ପରାମର୍ଶ ନେବାକୁ ରାୟରେ ଦର୍ଶାଇଛନ୍ତି। ଅନ୍ୟପକ୍ଷରେ ଗ୍ରାହକଙ୍କୁ ଉନ୍ନତ ସେବା ଯୋଗାଣରେ ତ୍ରୁଟି କରିବା ଅଭିଯୋଗରେ ରିଲାଏନ୍ସ ଜିଓ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବା ଲାଗି ଟେଲିକମ୍ ସଚିବ ଦେଇଥିବା ପ୍ରସ୍ତାବ ଉପରେ ଡିସିସି ଅସହମତି ବ୍ୟକ୍ତ କରିଥିଲେ। ସୂଚନାଥାଉ କି, ରିଲାଏନ୍ସ ଜିଓକୁ ଇଣ୍ଟର କନେକ୍ସନ ନ ଦେବା ଅଭିଯୋଗରେ ଟେଲିକମ ଅଥରିଟ ଅଫ୍ ଇଣ୍ଡିଆ(ଟ୍ରାଇ) ୨୦୧୬ ଅକ୍ଟୋବରରେ ଭୋଡାଫୋନ ଆଇଡିଆ ଓ ଏୟାରଟେଲ ଉପରେ ୩୦୫୦ କୋଟି ଟଙ୍କାର ପେନାଲ୍ଟି ଆଦାୟ ନିର୍ଦ୍ଦେଶ ଦେଇଥିଲେ। ପ୍ରାପ୍ତ ସୂଚନାନୁଯାୟୀ, ଏୟାରଟେଲ ଓ ଭୋଡାଫୋନ ଉପରେ ପ୍ରାୟ ୧୦୫୦ କୋଟି ଟଙ୍କା ଲେଖାଏ ଏବଂ ଆଇଡିଆ ଠାରୁ ୯୫୦ କୋଟି ଟଙ୍କାର ପେନାଲ୍ଟି ଆଦାୟ ଲାଗି ସେତେବେଳେ ଟ୍ରାଇ ନିର୍ଦ୍ଦେଶ ଦେଇଥିଲେ। ଇତିମଧ୍ୟରେ ଭୋଡାଫୋନ ସହ ଆଇଡିଆର ମିଶ୍ରଣ ହୋଇସାରିଛି। ତଦନୁଯାୟୀ, ଭୋଡାଫୋନ ଆଇଡିଆ ୨୦୦୦ କୋଟି ଟଙ୍କା ପେନାଲ୍ଟି ଦେବା କଥା।
