ନୂଆଦିଲ୍ଲୀ, ୫।୧୨: କେନ୍ଦ୍ର ସରକାର ଜିଏସ୍ଟି କ୍ଷତିପୂରଣ ପ୍ରଦାନରେ ବିଳମ୍ବ କରୁଥିବାରୁ ଏହାକୁ ନେଇ ବିରୋଧୀ ଦଳରେ ଥିବା ରାଜ୍ୟଗୁଡିକର ଅର୍ଥମନ୍ତ୍ରୀମାନେ ଉଦ୍ବେଗ ପ୍ରକାଶ କରିଛନ୍ତି। ରାଜ୍ୟ ଅର୍ଥମନ୍ତ୍ରୀ ମାନଙ୍କର ଏକ ପ୍ରତିନିଧି ଦଳ ବୁଧବାର କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରାମନଙ୍କୁ ଭେଟିଛନ୍ତି। ଜିଏସ୍ଟି କ୍ଷତିପୂରଣ ବିଳମ୍ବ ହେଉଥିବାରୁ ଏଥିଯୋଗୁ ରାଜ୍ୟଗୁଡିକ ବିଭିନ୍ନ ସମସ୍ୟା ସାମ୍ନା କରୁଥିବା ପ୍ରସଙ୍ଗକୁ ସେମାନେ ଉଠାଇଛନ୍ତି। ପ୍ରତିନିଧି ଦଳରେ ଦିଲ୍ଲୀ, ପୁଡୁଚେରୀ, ପଞ୍ଜାବ, ମଧ୍ୟପ୍ରଦେଶ,କେରଳ, ରାଜସ୍ଥାନ, ଛତିଶଗଡ, ପଶ୍ଚିମବଙ୍ଗ ଭଳି ରାଜ୍ୟ ସାମିଲ ହୋଇଛନ୍ତି। ନିର୍ମଳା ସୀତାରାମନଙ୍କ ସହ ବୈଠକ ପରେ ପଞ୍ଜାବ ଅର୍ଥମନ୍ତ୍ରୀ ମନପ୍ରୀତ ସିଂ ବାଦଲ କହିଛନ୍ତି ଯେ, ଅଗଷ୍ଟ ଏବଂ ସେପ୍ଟେମ୍ବର ମାସର କ୍ଷତିପୂରଣ ରାଜ୍ୟ ବର୍ତ୍ତମାନ ଯାଏ ପାଇ ନାହାନ୍ତି। ପୁରୁଣା କ୍ଷତିପୂରଣ ଏବେ ଯାଏ ମିଳି ନ ଥିବା ବେଳେ ବର୍ତ୍ତମାନ ନଭେମ୍ବର ଏବଂ ଡିସେମ୍ବର ମାସର କ୍ଷତିପୂରଣ ଲାଗି ସମୟ ଆସିଲାଣି। ଅଗଷ୍ଟରୁ ନଭେମ୍ବର ଯାଏ କ୍ଷତିପୂରଣର ଦେୟ ସରକାରଙ୍କୁ ପ୍ରଦାନ କରିବାକୁ ପଡିବ। ରାଜ୍ୟଗୁଡିକୁ ଶୀଘ୍ର କ୍ଷତିପୂରଣ ଲାଗି ନିର୍ମଳା ସୀତାରାମନ ପ୍ରତିଶ୍ରୁତି ଦେଇଛନ୍ତି। ହେଲେ କେଉଁ ସମୟ ମଧ୍ୟରେ ଏହା ପ୍ରଦାନ କରାଯିବ ସେ ନେଇ କୌଣସି ସ୍ପଷ୍ଟ ସୂଚନା ଦେଇ ନାହାନ୍ତି।
