ଯାଜପୁରରୋଡ,୧୫ା୬(ଡି.ଏନ.ଏ.): ଯାଜପୁର ଜିଲାର ଅନ୍ୟତମ ପ୍ରାଚୀନ ଶିକ୍ଷାନୁଷ୍ଠାନ ବ୍ୟାସନଗର ସ୍ବୟଂଶାସିତ ମହାବିଦ୍ୟାଳୟରେ ନିଯୁକ୍ତି କେଳେଙ୍କାରୀ ଅଭିଯୋଗକୁ ନେଇ ମହାବିଦ୍ୟାଳୟର ୩ ଅଧ୍ୟାପକଙ୍କୁ ଉଚ୍ଚଶିକ୍ଷା ବିଭାଗ ସଚିବ ଶାଶ୍ୱତ ମିଶ୍ର କାରଣ ଦର୍ଶାଅ ନୋଟିସ (ପତ୍ରସଂଖ୍ୟା ୧୮୯୯୧/୧୧ା୬ା୨୦୨୦) ଦେଇଛନ୍ତି। ସେମାନେ ହେଲେ ଇଂଲିଶ ବିଭାଗ ଅଧ୍ୟାପକ ଦିଲୀପ କୁମାର ରାଉତ, ଗଣିତ ବିଭାଗ ଅଧ୍ୟାପକ ବିବେକାନନ୍ଦ ଜେନା ଏବଂ ପ୍ରାଣୀବିଜ୍ଞାନ ବିଭାଗ ଅଧ୍ୟାପିକା ପୁନ ପୁନ ଦାସ। ମିଥ୍ୟା ଓ ଜାଲ୍ ପ୍ରମାଣପତ୍ର ପ୍ରସ୍ତୁତ କରି ଜିଆଇଏ/ବ୍ଲକଗ୍ରାଣ୍ଟର ସମସ୍ତ ସୁବିଧା ସୁଯୋଗ ହାସଲ କରିବା ନେଇ ସେମାନଙ୍କ ନାମରେ କଟକ ଭିଜିଲାନ୍ସ ଡିଭିଜନରେ ମାମଲା ରୁଜୁ ହୋଇ ବିଚାରାଧୀନ ରହିଛି। ଅଧ୍ୟାପକ ରାଉତଙ୍କ ନାମରେ ୩୮/୨୧ା୭ା୨୦୧୮, ଜେନାଙ୍କ ନାମରେ ୩୭/୨୧ା୭ା୨୦୧୮ ଓ ଦାସଙ୍କ ନାମରେ ୩୪/୧୭ା୭ା୨୦୧୮ ନମ୍ବରରେ ଭିଜିଲାନ୍ସ ମାମଲା ରୁଜୁ ହୋଇଛି। ଏହାକୁ ଆଧାର କରି ଉଚ୍ଚଶିକ୍ଷା ବିଭାଗ ସଚିବ ମିଶ୍ର ଅଭିଯୁକ୍ତ ଅଧ୍ୟାପକମାନଙ୍କ ନାମରେ କାରଣ ଦର୍ଶାଅ ନୋଟିସ ଜାରି କରି ଏକମାସ ମଧ୍ୟରେ ଉତ୍ତର ରଖିବାକୁ ନିର୍ଦ୍ଦେଶ ଦେଇଛନ୍ତି। ଏହାବାଦ୍ ପରବର୍ତ୍ତୀ ନିର୍ଦ୍ଦେଶ ଜାରି ନ କରିବା ପର୍ଯ୍ୟନ୍ତ ଅଭିଯୁକ୍ତମାନଙ୍କ ଦରମା ଓ ଗ୍ରାଣ୍ଟ ଇନ୍ ଏଡ୍ ବେନିଫିଟ ବନ୍ଦ କରିବାକୁ ନୋଟିସରେ ଦର୍ଶାଯାଇଛି। ସମ୍ପୃକ୍ତ ଅଧ୍ୟାପକଙ୍କ ବ୍ଲକଗ୍ରାଣ୍ଟ କାହିଁକି ପ୍ରତ୍ୟାହାର କରା ନ ଯିବ ସେ ସମ୍ପର୍କରେ ମଧ୍ୟ ଉତ୍ତର ରଖିବାକୁ କଲେଜ ଅଧ୍ୟକ୍ଷଙ୍କୁ ନିର୍ଦ୍ଦେଶ ହୋଇଛି। ଏ ସଂକ୍ରାନ୍ତରେ ବ୍ୟାସନଗର ସ୍ବୟଂଶାସିତ କଲେଜର ଅଧ୍ୟକ୍ଷ ଶିବଚରଣ ମାଝିଙ୍କୁ ପଚାରିବାରୁ ସେ କହିଛନ୍ତି, ପୂର୍ବତନ ଅଧ୍ୟକ୍ଷ ଭିଜିଲାନ୍ସକୁ ଆବଶ୍ୟକ କାଗଜପତ୍ର ଦାଖଲ କରିଛନ୍ତି। କଲେଜରେ ମହଜୁଦ ଥିବା ସମ୍ପୃକ୍ତ ତଥ୍ୟକୁ ଆଧାର କରି ଏକ ରିପୋର୍ଟ ସଚିବଙ୍କୁ ୩୦ ଦିନ ମଧ୍ୟରେ ଦାଖଲ କରାଯିବ। ଏହାସହ ସଚିବଙ୍କ ନିର୍ଦ୍ଦେଶ ଅନୁଯାୟୀ ଅଭିଯୁକ୍ତ ଅଧ୍ୟାପକମାନଙ୍କ ଦରମା ବନ୍ଦ କରିବାକୁ ପଦକ୍ଷେପ ଗ୍ରହଣ କରାଯିବ ବୋଲି ସେ କହିଛନ୍ତି।
