‘ଦଙ୍ଗଲ’ ଓ ‘ସିକ୍ରେଟ ସୁପରଷ୍ଟାର୍’ ଭଳି ଫିଲ୍ମରେ ନିଜ ଅଭିନୟର ଦକ୍ଷତା ଦେଖାଇ ସାରିଥିବା ଅଭିନେତ୍ରୀ ଜାଏରା ୱାସିମ ବଲିଉଡଠାରୁ ସବୁଦିନ ପାଇଁ ଦୂରେଇ ଯାଇଛନ୍ତି। ବଲିଉଡକୁ ଆସିବା ପରେ ସେ ତାଙ୍କ ଧର୍ମ ଇସଲାମଠାରୁ ଦୂରେଇ ଯାଉଥିବାରୁ ଏଭଳି ନିଷ୍ପତ୍ତି ନେଇଥିବା କଥା ସେ ନିଜ ଇନଷ୍ଟାଗ୍ରାମରେ ସୂଚନା ଦେବାପରେ ଏହାକୁ ନେଇ ଚର୍ଚ୍ଚା ଆରମ୍ଭ ହୋଇଯାଇଛି। ଜମ୍ମୁ-କଶ୍ମୀରର ବିଭିନ୍ନ ନେତା ଜାଏରାଙ୍କ ନିଷ୍ପତ୍ତିକୁ ସମର୍ଥନ କରିଥିଲାବେଳେ ଲେଖକ ତସଲିମା ନସରିନ୍ କୌଣସି ଧର୍ମ ପାଇଁ ବଲିଉଡ ଛାଡିବା ମୁର୍ଖତାର ପରିଚୟ ବୋଲି କହିଛନ୍ତି। ଜମ୍ମୁ-କଶ୍ମୀରର ପୂର୍ବତନ ମୁଖ୍ୟମନ୍ତ୍ରୀ ଉମର ଅବଦୁଲା ଜାଏରାଙ୍କୁ ସମର୍ଥନ କରି କହିଛନ୍ତି, ତାଙ୍କର ଏଭଳି ନିଷ୍ପତ୍ତି ଦ୍ୱାରା ସେ ଯଦି ଖୁସି, ତେବେ ତାଙ୍କୁ କେବଳ ସମର୍ଥନ ଜଣାଇ ଶୁଭକାମନା ହିଁ ଦେଇପାରିବି। ସେହିପରି ଭାରତୀୟ ପ୍ରଶାସନିକ ସେବା ଛାଡି ରାଜନୀତିରେ ଯୋଗଦେଇଥିବା ଶାହ ଫୈଜଲ ମଧ୍ୟ ଜାଏରାଙ୍କ ନିଷ୍ପତ୍ତିକୁ ସମ୍ମାନ ଜଣାଇ ତାଙ୍କୁ ଶୁଭେଚ୍ଛା ଜଣାଇଛନ୍ତି। ସୂଚନାଯୋଗ୍ୟ, ୨୦୧୬ରେ ରିଲିଜ ହୋଇଥିବା ସୁପରହିଟ ଫିଲ୍ମ ‘ଦଙ୍ଗଲ’ରେ ଅଭିନୟ କରି ଜାଏରା ଦଙ୍ଗଲ ଗାର୍ଲ ନାମରେ ପରିଚୟ ପାଇଥିଲେ। ଜଣେ ଉଚ୍ଚକୋଟୀର ଅଭିନେତ୍ରୀଙ୍କ ହଠାତ୍ ଏଭଳି ନିଷ୍ପତ୍ତି ସମସ୍ତଙ୍କୁ ଆଶ୍ଚର୍ଯ୍ୟ କରିଛି।
