ନୂଆଦିଲ୍ଲୀ,୨୫।୨: ନାଗରିକତ୍ୱ ସଂଶୋଧନ ଆଇନ(ସିଏଏ)କୁ ନେଇ ଜଳୁଛି ଦିଲ୍ଲୀ। ବିଭିନ୍ନ ସ୍ଥାନରେ ଉପୁଜିଥିବା ହିଂସାରେ ଏବେ ପର୍ଯ୍ୟନ୍ତ ୬ଜଣଙ୍କ ମୃତ୍ୟୁ ହୋଇଥିବା ସୂଚନା ମିଳିଛି। ଏଥିରେ ଶତାଧିକ ଆହତ ମଧ୍ୟ ହୋଇଛନ୍ତି। ଏହାକୁ ଦୃଷ୍ଟିରେ ରଖି କେତେକ ଅଞ୍ଚଳରେ ସ୍କୁଲ ବନ୍ଦ କରାଯାଇଥିବା ବେଳେ ପାଖାପାଖି ୫ ମେଟ୍ରୋ ଷ୍ଟେଶନକୁ ମଧ୍ୟ ବନ୍ଦ କରି ଦିଆଯାଇଛି। ସୂଚନାଯୋଗ୍ୟ, ଶନିବାର ରାତିରେ ଜାଫରାବାଦ ମେଟ୍ରୋ ଷ୍ଟେଶନ ନିକଟରେ ପ୍ରଥମେ କେତେଜଣ ମହିଳା ସିଏଏକୁ ବିରୋଧ କରି ସ୍ଲୋଗାନ ଦେବା ଆରମ୍ଭ କରି ଦେଇଥିଲେ। କେନ୍ଦ୍ର ସରକାର ଯେ ପର୍ଯ୍ୟନ୍ତ ସିଏଏକୁ ରଦ୍ଦ ନ କରିଛନ୍ତି ସେ ପର୍ଯ୍ୟନ୍ତ ସେମାନେ ବିରୋଧ ପ୍ରଦର୍ଶନ କରିବେ ବୋଲି ସ୍ଲୋଗାନ ଦେଇଥିଲେ। ଏହା ଧୀରେ ଧୀରେ ଦିଲ୍ଲୀର ବିଭିନ୍ନ ଅଞ୍ଚଳକୁ ବ୍ୟାପିବା ଫଳରେ ଏବେ ଏହା ହିଂସାର ରୂପ ନେଇଛି। ସୋମବାର ରାତିରେ ଏହା ସାମାନ୍ୟ କମ୍ ଥିବା ବେଳେ ମଙ୍ଗଳବାର ସକାଳେ ଉତ୍ତର-ପୂର୍ବ ଦିଲ୍ଲୀର କିଛି ସ୍ଥାନରେ ପଥରମାଡ ହୋଇଛି। ପ୍ରଦର୍ଶନକାରୀମାନେ ଦୋକାନ, ଗାଡି ଆଦିରେ ନିଆଁ ଲଗାଇ ଦେଇଛନ୍ତି। ସେହିପରି ଭଜନପୁରାରେ ଏକ ପେଟ୍ରୋଲ ପମ୍ପରେ ମଧ୍ୟ ପ୍ରଦର୍ଶନକାରୀ ନିଆଁ ଲଗାଇ ଦେଇଥିବା ସୂଚନା ମିଳିଛି। ସେହିପରି ଏକ ହସ୍ପିଟାଲ ଭିତରକୁ ପେଟ୍ରୋଲ ବୋମା ମାଡ କରିବାରେ ଉକ୍ତ ହସ୍ପିଟାଲ କିଛି ଅଂଶରେ କ୍ଷତିଗ୍ରସ୍ତ ହୋଇଛି। ଗତକାଲି ଏହି ହିଂସା ସମୟରେ ଗୁଳି ଚାଳନା କରୁଥିବା ଜଣେ ଯୁବକଙ୍କୁ ଗିରଫ କରାଯାଇଥିବା ବେଳେ ଏହି ହିଂସାରେ ଆହତ ହୋଇଥିବା ଡିଏସ୍ପି ଅମିତ ଶର୍ମାଙ୍କ ସର୍ଜରୀ ପରେ ଏବେ ସେ ବିପଦମୁକ୍ତ ରହିଛନ୍ତି। ଏହାକୁ ନେଇ ସ୍ବରାଷ୍ଟ୍ର ମନ୍ତ୍ରୀ ଅମିତ ଶାହା ଦିଲ୍ଲୀର ଆଇନ ଶୃଙ୍କଳା ପରିସ୍ଥିତିକୁ ଦେଖି ଏକ ଜରୁରୀ କାଳୀନ ବୈଠକ ଡାକିଥିବା ଜଣାପଡିଛି।
