ପୁଣେ,୨୭ା୮(ପି.ଟି.): ସୀମାନ୍ତରେ କଡ଼ା ସୁରକ୍ଷା ବ୍ୟବସ୍ଥା ଯୋଗୁ ଅନୁପ୍ରବେଶ କରି ନ ପାରି ପାକିସ୍ତାନୀ ଆତଙ୍କବାଦୀମାନେ ଏବେ ବିକଳ୍ପ ସନ୍ଧାନରେ ଅଛନ୍ତି। ପାକ୍ ଆତଙ୍କବାଦୀ ସଂଗଠନ ଜୈଶ୍-ଇ-ମହମ୍ମଦ (ଜେଇଏମ୍) ଜଳପଥରେ ଆସି ଭାରତରେ ଆକ୍ରମଣ କରିପାରେ ବୋଲି ଗୋଇନ୍ଦା ସୂଚନା ମିଳିଛି। ତେବେ ଜଳପଥରେ କୌଣସି ପ୍ରକାର ଆକ୍ରମଣକୁ ପ୍ରତିହତ କରିବା ପାଇଁ ଭାରତୀୟ ନୌସେନା ପୂରା ଦମ୍ରେ ପ୍ରସ୍ତୁତ ରହିଛି ବୋଲି ଏହାର ମୁଖ୍ୟ ଆଡମିରାଲ କରମବୀର ସିଂ ସୋମବାର କହିଛନ୍ତି।
ସୂଚନା ଅନୁଯାୟୀ, ଜେଇଏମ୍ର ଅଣ୍ଡରଓ୍ବାଟର ଶାଖା ଜଳପଥରେ ଆକ୍ରମଣ ପାଇଁ କିଛି ଯୁବକଙ୍କୁ ତାଲିମ ଦେଉଛି। ତେବେ ସେମାନଙ୍କ ଲକ୍ଷ୍ୟ ପୂରଣ ହେବାକୁ ଦିଆଯିବ ନାହିଁ ବୋଲି ନୌସେନା ମୁଖ୍ୟ କହିଛନ୍ତି। ଏଥିପାଇଁ ନୌସେନା ଓ ତଟସୁରକ୍ଷା ବାହିନୀର ଯବାନମାନେ ସଜାଗ ଅଛନ୍ତି। ଆତଙ୍କବାଦୀଙ୍କୁ ଭାରତରେ ପ୍ରବେଶ କରିବାକୁ କଦାପି ସୁଯୋଗ ଦିଆଯିବ ନାହିଁ ବୋଲି ସେ କହିଛନ୍ତି। ଖବରଦାତାମାନଙ୍କ କେତେକ ପ୍ରଶ୍ନର ଉତ୍ତର ଦେଇ ଆଡମିରାଲ ସିଂ କହିଥିଲେ, ଆତଙ୍କବାଦୀଙ୍କ ଆକ୍ରମଣ ଯୋଜନା ବଦଳୁଛି। ସେଥିପାଇଁ ଉପକୂଳବର୍ତ୍ତୀ ଅଞ୍ଚଳ ପ୍ରତି ବିପଦ ଆଶଙ୍କା ରହିଛି। ହେଲେ ୨୬/୧୧ ମୁମ୍ବାଇ ଆକ୍ରମଣ ପରେ ତଟସୁରକ୍ଷା ଉପରେ ନୌସେନା ତୀକ୍ଷ୍ଣ ନଜର ରଖିଛି। ତଟସୁରକ୍ଷା ବ୍ୟବସ୍ଥାରେ ମଧ୍ୟ ବ୍ୟାପକ ପରିବର୍ତ୍ତନ କରାଯାଇଛି ବୋଲି ଆଡମିରାଲ ସିଂ କହିଛନ୍ତି।
ଦେଶ ଭିତରେ ଆତ୍ମଗୋପନ କରିଥିବା ଆତଙ୍କବାଦୀଙ୍କ ଦ୍ୱାରା ମୁମ୍ବାଇ ଭଳି ଆକ୍ରମଣ ଯୋଜନା ପାକ୍ ଆତଙ୍କବାଦୀ ସଂଗଠନଗୁଡିକ କରୁଥିବା ଦୁଇ ସପ୍ତାହ ପୂର୍ବରୁ ଗୋଇନ୍ଦା ସୂଚନା ମିଳିଥିଲା। ଏଥିସହିତ ସମୁଦ୍ର ପଥରେ ଆତଙ୍କବାଦୀ ସେମାନଙ୍କ ସହ ସାମିଲ ହୋଇପାରନ୍ତି ବୋଲି ଆଶଙ୍କା କରାଯାଉଥିଲା। ତେବେ ଦକ୍ଷିଣ-ପଶ୍ଚିମ ମୌସୁମୀ ବାୟୁ ପ୍ରବାହ ଯୋଗୁ ସମୁଦ୍ର ଅଶାନ୍ତ ରହୁଥିବାରୁ ଆରବ ସାଗରରେ ବୋଟରେ ଆସି ଭାରତରେ ପ୍ରବେଶ କରିବା ସମ୍ଭବ ହେବ ନାହିଁ ବୋଲି ଜଣେ ଅଧିକାରୀ କହିଛନ୍ତି। ଏହା ସତ୍ତ୍ୱେ ସମସ୍ତ ନାଭାଲ ବେସ୍କୁ ସଜାଗ ରହିବା ଲାଗି କୁହାଯାଇଛି।
ମିଳିଥିବା ସୂଚନା ଅନୁଯାୟୀ, ଏଲ୍ଓସିରେ ସକ୍ରିୟ ଥିବା ଆତଙ୍କବାଦୀମାନେ ବାଲାକୋଟ ଏୟାରଷ୍ଟ୍ରାଇକ୍ ପରେ ଅନ୍ୟତ୍ର ପଳାୟନ କରିଥିଲେ। ଜେଇଏମ୍ ଆତଙ୍କବାଦୀମାନେ ବାଲାକୋଟ ଆକ୍ରମଣର ପ୍ରତିଶୋଧ ନେବା ଲାଗି ପ୍ରସ୍ତୁତ ହେଉଛନ୍ତି। ସେମାନେ ଜୈଶ୍ ମୁଖ୍ୟ ମୌଲାନା ମାସୁଦ ଆଝାରଙ୍କ ସାନଭାଇ ରୌଫ୍ ଅଜଘରଙ୍କୁ ପିଓକେକୁ ଆକ୍ରମଣ ଯୋଜନା ତଦାରଖ କରିବା ପାଇଁ ପଠାଇଥିବା ମଧ୍ୟ ସୂଚନା ମିଳିଥିଲା। ଜମ୍ମୁ-କଶ୍ମୀରକୁ ମିଳୁଥିବା ସ୍ବତନ୍ତ୍ର ମାନ୍ୟତା ହଟିବା ସହ ଏହାକୁ ଦୁଇଟି କେନ୍ଦ୍ରଶାସିତ ଅଞ୍ଚଳରେ ପରିଣତ କରିବା ପାଇଁ ଭାରତ ସରକାର ନିଷ୍ପତ୍ତି ନେବା ପରେ ପାକିସ୍ତାନ ରକ୍ତଚାଉଳ ଚୋବାଉଛି। ଆତଙ୍କବାଦୀଙ୍କୁ ଭାରତରେ ପୂରାଇ ଅସ୍ଥିରତା ସୃଷ୍ଟି କରିବା ପାଇଁ ଇସ୍ଲାମାବାଦ ଉଦ୍ୟମ ଚଳାଇଥିବା ମଧ୍ୟ ଜଣାପଡିଛି। କଶ୍ମୀର ପ୍ରସଙ୍ଗରେ କୂଟନୈତିକ ସ୍ତରରେ ବିଫଳ ହେବା ପରେ ପାକିସ୍ତାନ ଯେକୌଣସି ସ୍ତରକୁ ଯାଇପାରେ ବୋଲି ଏହାର ପ୍ରଧାନମନ୍ତ୍ରୀ ଇମ୍ରାନ ଖାନ୍ କହିଛନ୍ତି।
