ଲକ୍ଷ୍ନୌ,୧୬।୫: କରୋନା ସଂକ୍ରମଣ ଯୋଗୁ ଭାରତରେ ଆତଙ୍କ ଦେଖାଦେଇଛି। ସଂକ୍ରମଣରୁ ଦୂରେଇ ରହିବା ପାଇଁ ଦେଶରେ ଲକ୍ଡାଉନ୍ ଜାରି ହୋଇଛି। ଏହାଯୋଗୁ ବିଭିନ୍ନ ରାଜ୍ୟରେ ଅଟକି ରହିଥିବା ପ୍ରବାସୀ ଶ୍ରମିକ ଘରକୁ ଫେରିବାରେ ବହୁ ଅସୁବିଧାର ସମ୍ମୁଖୀନ ହେଉଛନ୍ତି। ନିକଟରେ ରାଜସ୍ଥାନରେ ଶ୍ରମିକ ଭାବେ କାମ କରୁଥିବା ଉତ୍ତରପ୍ରଦେଶ ବରେଲୀର ମହମ୍ମଦ ଇକ୍ବାଲ ଘରକୁ ଫେରିବା ପାଇଁ ସାଇକେଲ ଚୋରି କରିଛନ୍ତି। ପାଖରେ ଟଙ୍କା ନ ଥିବାରୁ ସେ ଏପରି କରିଛନ୍ତି। ତେବେ ସାଇକେଲ ମାଲିକ ସାହିବ ସିଂଙ୍କ ଉଦ୍ଦେଶ୍ୟରେ ଏକ ଚିଠି ଲେଖି କ୍ଷମାପ୍ରାର୍ଥନା ମଧ୍ୟ କରିଛନ୍ତି। ପାଖରେ ଟଙ୍କା ନ ଥିବାରୁ ୨୫୦ କିଲୋମିଟର ଦୂର ଘରକୁ ଆସିବା ଲାଗି ଅନ୍ୟ କୌଣସି ଉପାୟ ନ ପାଇ ସେ ଏଭଳି କରିଥିବା କହିଛନ୍ତି। ଚିଠିରେ ଇକ୍ବାଲ ଲେଖିଛନ୍ତି ‘ମେଁ ମଜଦୁର୍ ହୁଁ, ଔର ମଜବୁର୍ ଭି’। ମୁଁ ଆପଣଙ୍କର ଦୋଷୀ ମଧ୍ୟ। ବାଧ୍ୟ ହୋଇ ଆପଣଙ୍କ ସାଇକେଲ ନେଇଯାଉଛି। ମୋପାଖରେ ଦିବ୍ୟାଙ୍ଗ ଛୋଟ ଛୁଆ ବି ରହିଛି। ତେଣୁ ଘରକୁ ଫେରିବା ପାଇଁ ଏପରି କରିଥିବା ଇକ୍ବାଲ ଚିଠିରେ ଲେଖିଛନ୍ତି। ସାହିବ ସିଂ ଏହି ଚିଠିକୁ ଏବେ ସୋସିଆଲ ମିଡ଼ିଆରେ ଶେୟାର କରିଛନ୍ତି। ଚିଠିକୁ ନେଇ ବହୁ ସୋସିଆଲ୍ ମିଡ଼ିଆର ୟୁଜର ପ୍ରବାସୀ ଶ୍ରମିକଙ୍କ ଭୋଗୁ ଥିବା ସମସ୍ୟା ଯୋଗୁ ବେଶ୍ ଭାବୁକ ହୋଇପଡ଼ି କମେଣ୍ଟ୍ ଦେଇଛନ୍ତି।
