କେନ୍ଦୁଝର,୨୩।୨(ସ୍ବ.ପ୍ର.) : କେନ୍ଦୁଝର ଜିଲା ତେଲକୋଇ ଥାନା ଅନ୍ତର୍ଗତ କରମଙ୍ଗି ପଞ୍ଚାୟତ ପୁଢ଼େଇଝୋଳ ଗାଁରେ ଜଣେ ବୃଦ୍ଧଙ୍କୁ ଗୁଣିଆ ସନ୍ଦେହରେ ଗ୍ରାମସଭାରେ ଆକ୍ରମଣ କରାଯିବା ଘଟଣା ଚର୍ଚ୍ଚାର ବିଷୟ ହୋଇଛି। ଫଳରେ ବୃଦ୍ଧ ଜଣଙ୍କୁ ଗୁରୁତର ଅବସ୍ଥାରେ ଶନିବାର ପ୍ରଥମେ ତେଲକୋଇ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଓ ରବିବାର କେନ୍ଦୁଝର ସ୍ଥାନାନ୍ତର କରାଯାଇଛି।
ଘଟଣା ଅନୁଯାୟୀ, ଗତ ୨୨ ତାରିଖରେ ପୁଢ଼େଇଝୋଳ ଗ୍ରାମରେ ଗ୍ରାମବାସୀ ଏକ ସଭା କରିଥିଲେ। ସେହି ଗ୍ରାମର ଧନେଶ୍ୱର ନାୟକଙ୍କୁ ଗୁଣି ଗାରେଡ଼ି କରୁଛ କହି କେତେକ ଗ୍ରାମବାସୀ ସଭାରେ ଆକ୍ରମଣ କରିଥିଲେ। ତାଙ୍କ ବେକକୁ କାମୁଡ଼ି ଦେବା ସହିତ ତଳେ ପକାଇ ମରଣାନ୍ତକ ଆକ୍ରମଣ କରିଥିବା ଅଭିଯୋଗ ହୋଇଛି। ଫଳରେ ଧନେଶ୍ୱର ଗୁରୁତର ହୋଇଥିଲେ। ଧନେଶ୍ୱରଙ୍କ ସ୍ତ୍ରୀ ସଭାରେ ପହଞ୍ଚି ତାଙ୍କୁ ଉଦ୍ଧାର କରିବା ସହ ତେଲକୋଇ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିବା ବେଳେ ଥାନାରେ ଅଭିଯୋଗ କରିଥିଲେ। ପୋଲିସ ପକ୍ଷରୁ ଏହାର ତଦନ୍ତ କରି ଅଭିଯୁକ୍ତଙ୍କୁ ଧରିବା ପାଇଁ ପ୍ରୟାସ କରୁଥିବା ଜଣାପଡ଼ିଛି। ତେଲକୋଇ ଥାନାଧିକାରିଣୀ ପଦ୍ମଶିନୀ ମେହର କହିଛନ୍ତି, ଅଭିଯୋଗ ମିଳିବା ପରେ ଘଟଣାସ୍ଥଳକୁ ଯାଇ ତଦନ୍ତ କରାଯାଇଛି। ଘଟଣାରେ ୩/୪ ଜଣଙ୍କ ସମ୍ପୃକ୍ତି ଥିବା ଅଭିଯୋଗ ହୋଇଛି। ସେମାନଙ୍କୁ ଅଟକ ରଖି ପଚରା ଉଚରା କରାଯାଉଛି। ତଦନ୍ତ ପରେ ଗିରଫ କରି କୋର୍ଟ ଚାଲାଣ କରାଯିବ।
