ନୂଆଦିଲ୍ଲୀ, ୩-୯: ଘରୋଇ ବଜାରରେ ଅଟୋମୋବାଇଲ ଶିଳ୍ପ ବର୍ତ୍ତମାନ ମାନ୍ଦାବସ୍ଥା ଦେଇ ଗତି କରୁଛି। ଯାନ ବିକ୍ରି କ୍ରମାଗତ ଭାବେ ହ୍ରାସ ହେଉଥିବା ବେଳେ ଏହାକୁ ନେଇ ଶିଳ୍ପ ଚିନ୍ତାରେ ରହିଛି। ସମସ୍ୟା ସମାଧାନ ଲାଗି ଅଟୋ ଉଦ୍ୟୋଗ ପକ୍ଷରୁ ସରକାରଙ୍କ ହସ୍ତକ୍ଷେପ ଲୋଡା ଯାଇଛି। ସରକାର ତୁରନ୍ତ ଭିତ୍ତିରେ ଜିଏସ୍ଟି ହ୍ରାସ, ସ୍କ୍ରାପେଜ ନୀତି କାର୍ଯ୍ୟକାରୀ କରାଇବା ଦିଗରେ ପଦକ୍ଷେପ ନିଅନ୍ତୁ ବୋଲି ଅଟୋ ଶିଳ୍ପ ପକ୍ଷରୁ ନିବେଦନ କରାଯାଇଛି। ପାସେଞ୍ଜର ଯାନ ବ୍ୟତୀତ ୨ ଚକିଆ ଯାନ ବିକ୍ରି ନକରାତ୍ମକ ରହିଥିବାରୁ ବଜାର ଏବେ ମଧ୍ୟ ପ୍ରଭାବିତ ରହିଛି। ଅର୍ଥମନ୍ତ୍ରୀ ନିର୍ମଳା ସୀତାରାମନଙ୍କ ଗତ ମାସର ଘୋଷଣା ସତ୍ତ୍ୱେ ବଜାରରେ ବିଶେଷ ପ୍ରଭାବ ପରିଲକ୍ଷିତ ହେଉ ନ ଥିବା ଅଟୋ ଶିଳ୍ପ ସଂଘ ସୋସାଇଟି ଅଫ୍ ଇଣ୍ଡିଆନ ଅଟୋମୋବାଇଲ ମାନୁଫାକଚରର୍ସ(ସିଆମ୍) ସୋମବାର କହିଛି।
ଏପରି ସ୍ଥିତିରେ ଗ୍ରାହକଙ୍କୁ ରିହାତି ପ୍ରଦାନ କରିବା କମ୍ପାନୀ ଗୁଡିକ ପାଇଁ କଷ୍ଟକର ବ୍ୟାପାର ହୋଇ ପଡୁଛି। ସରକାର ଜିଏସ୍ଟିକୁ ୨୮%ରୁ ୧୮%କୁ ହ୍ରାସ କଲେ ଯାନ ମୂଲ୍ୟ କମିବ ବୋଲି ସିଆମ୍ ସଭାପତି ରାଜନ ଓ୍ବାଧେରା କହିଛନ୍ତି। ଏହାବାଦ ଅଟୋ ଶିଳ୍ପର ସବୁ ବର୍ଗ ପାଇଁ ସ୍କ୍ରାପେଜ ନୀତିରେ ପ୍ରୋତ୍ସାହନ ବ୍ୟବସ୍ଥା କଲେ ଶିଳ୍ପ ଲାଭବାନ ହେବ ବୋଲି କୁହାଯାଇଛି। ପାର୍ବଣ ଆସୁଥିବାରୁ ଏଭଳି ନୀତି ଘୋଷଣା ହେଲେ ପ୍ରଭାବିତ ଶିଳ୍ପ ଏହାର ଫାଇଦା ପାଇବ ବୋଲି ଓ୍ବାଧେରା କହିଛନ୍ତି। ଅଗଷ୍ଟରେ କମ୍ପାନୀଗୁଡିକର ବିକ୍ରି ଅଭିବୃଦ୍ଧିରେ ଦୁଇ ଅଙ୍କ ବିଶିଷ୍ଟ ହ୍ରାସ ଘଟିଥିବା ଶିଳ୍ପ ପକ୍ଷରୁ କୁହାଯାଇଛି।
ଉତ୍ପାଦନ କମାଇଲା ମାରୁତି ସୁଜୁକି
ମାନ୍ଦାବସ୍ଥାକୁ ଧ୍ୟାନରେ ରଖି ଦେଶର ପ୍ରମୁଖ ପାସେଞ୍ଜର ଯାନ ନିର୍ମାତା ମାରୁତି ସୁଜୁକି ଲଗାତାର ୭ ମାସ ପାଇଁ ଏହାର ଉତ୍ପାଦନକୁ ହ୍ରାସ କରିଛି। କମ୍ପାନୀ ଅଗଷ୍ଟ ମାସରେ ୩୩.୯୯% ଉତ୍ପାଦନ କମାଇଛି। ଏହି ସମୟରେ କମ୍ପାନୀ ୧.୧୧ ଲକ୍ଷ ଯାନ ଉତ୍ପାଦନ କରିଛି। ଏହା ଗତ ବର୍ଷ ସମାନ ସମୟରେ ୧.୬୮ ଲକ୍ଷ ୟୁନିଟ ରହିଥିବା ସୋମବାର ବିଏସ୍ଇକୁ ଦିଆଯାଇଥିବା ଫାଇଲିଂରେ ଉଲ୍ଲେଖ କରାଯାଇଛି।
