କେନ୍ଦୁଝର, ୨୩ା୫(ସ୍ବ.ପ୍ର./ଡି.ଏନ.ଏ.)-କେନ୍ଦୁଝରଗଡ ପୌରପାଳିକା ୧୫ନମ୍ବର ୱାର୍ଡ ଅନ୍ତର୍ଗତ ମାଧପୁର କୃଷି ବିଭାଗ ଫାର୍ମ ପୋଖରୀ ନିକଟରେ ଥିବା ଏକ କଚ୍ଚା ଘର ଭୁଶୁଡି ଜଣେ ବୃଦ୍ଧ ଗୁରୁତର ଆହତ ହୋଇଛନ୍ତି। ବାତ୍ୟା ଅମ୍ଫନ୍ ପ୍ରଭାବରେ ୨ଦିନ ତଳେ କେନ୍ଦୁଝରରେ ଅବିଶ୍ରାନ୍ତ ବର୍ଷା ଯୋଗୁ କଚ୍ଚା ଘର ଦୁର୍ବଳ ହୋଇପଡିଥିଲା। ଶନିବାର ଅପରାହ୍ନ ୧ଟା ସମୟରେ ଘର ସମ୍ମୁଖରେ ଶିବପ୍ରସାଦ ମହାନ୍ତି(୮୬) ବସିଥିବା ବେଳେ ହଠାତ୍ କାନ୍ଥ ଭୁଶୁଡି ପଡିଥିଲା। ଚାଳ ଛପର ମାଟି କାନ୍ଥ ପଡିଯିବାରୁ ସେ ଗୁରୁତର ଆହତ ହୋଇଛନ୍ତି। ଘର ଲୋକେ ଏବଂ ପଡ଼ୋଶୀ ତାଙ୍କୁ ଉଦ୍ଧାର କରିବାରେ ସକ୍ଷମ ହୋଇଥିବା ବେଳେ ଘର ଭିତରେ ଥିବା ସମସ୍ତ ଆସବାବପତ୍ର ଭାଙ୍ଗିରୁଜି ଯାଇଛି। ଅଗ୍ନିଶମ ବିଭାଗ ଗୁରୁତର ବୃଦ୍ଧଙ୍କୁ କେନ୍ଦୁଝର ମୁଖ୍ୟ ଚିକିତ୍ସାଳୟକୁ ଆଣିଥିଲା। ତାଙ୍କ ପରିବାର ରହିବା ପାଇଁ ଘର ନାହିଁ। ଏହି ଘରର ଗୋଟିଏ କୋଠରିରେ ପରିବାରର ୬ଜଣ ସଦସ୍ୟ ରୁହନ୍ତି। ଶିବପ୍ରସାଦଙ୍କ ପରିବାର ଗରିବ ଓ ବିପିଏଲ୍ ବର୍ଗର ହୋଇଥିବାରୁ ତାଙ୍କୁ ପ୍ରଶାସନ ପକ୍ଷରୁ ତୁରନ୍ତ ସହାୟତା ଯୋଗାଇ ଦେବାକୁ ପ୍ରଶାସନ ନିକଟରେ ଦାବି ହୋଇଛି।
