ବିଶାଖାପାଟଣା,୩।୧୦(ପି.ଟି.)- ଦକ୍ଷିଣ ଆଫ୍ରିକା ବିପକ୍ଷ ପ୍ରଥମ ଟେଷ୍ଟରେ ଅପରାଜିତ ଶତକ ହାସଲ କରିବା ପରେ ଭାରତୀୟ ଓପନର ରୋହିତ ଶର୍ମା ବେଶ୍ ଆସ୍ବସ୍ତି ଲାଭ କରିଥିବେ। ଟେଷ୍ଟରେ ଇନିଂସ ଓପନ୍ କରିବା ମୋତେ ବେଶ୍ ସୁହାଉଛି। ଏଥିପାଇଁ ଅବଶ୍ୟ ମାନସିକ ଭାବେ ପ୍ରସ୍ତୁତ ଥିଲି। ଗତ ଓ୍ବେଷ୍ଟଇଣ୍ଡିଜ ଗସ୍ତରେ ଇନିଂସ ଓପନ୍ କରିବି ବୋଲି ବେଶ୍ ଚର୍ଚ୍ଚା ହେଉଥିଲା। ଗତ ଦୁଇ ବର୍ଷ ହେବ ଏହି ଭୂମିକା ନିର୍ବାହ କରିବାକୁ ପ୍ରସ୍ତୁତ ଥିଲି। ଓ୍ବେଷ୍ଟଇଣ୍ଡିଜ ବିପକ୍ଷରେ ରୋହିତ ଦଳରେ ସ୍ଥାନ ପାଇଥିଲେ ମଧ୍ୟ ଖେଳିବାର ସୁଯୋଗ ପାଇ ନ ଥିଲେ। ପୁଣି ଅଜିଙ୍କ ରାହାନେ ଓ ହନୁମା ବିହାରୀ ଭଲ ଫର୍ମରେ ଥିବାରୁ ରୋହିତଙ୍କୁ ଅନ୍ତିମ ଏକାଦଶରେ ସ୍ଥାନ ମିଳି ନ ଥିଲା। ଦିନିକିଆ ଓ ଟେଷ୍ଟରେ ଇନିଂସ ଓପନ କରିବା ଅବଶ୍ୟ ଭିନ୍ନ ବୋଲି ସେ ସ୍ବୀକାର କରିଛନ୍ତି। ମାନସିକ ଭାବେ ପ୍ରସ୍ତୁତ ରହିବା ସବୁଠାରୁ ବଡ଼ କଥା। ବୈଷୟିକ ଦୃଷ୍ଟିକୋଣରୁ ମଧ୍ୟ ପ୍ରସ୍ତୁତ ରହିବା ଆବଶ୍ୟକ। ନୂଆ ବଲ୍ରେ ବ୍ୟାଟିଂ କରିବା ନିଶ୍ଚିତ ଭାବେ ଏକ ଚ୍ୟାଲେଞ୍ଜ୍। ୬ ନମ୍ବରରେ ବ୍ୟାଟିଂ କରିବା ବେଳେ ବଲ୍ ରିଭର୍ସ କରିଥାଏ। ଫିଲ୍ଡିଂ ସଜା ମଧ୍ୟ ଭିନ୍ନ ହୋଇଥାଏ। ଏହି ସୁଯୋଗକୁ ଅପେକ୍ଷା କରିଥିଲି। ଟେଷ୍ଟରେ ନୂଆ ବଲ୍କୁ ଖେଳିବା ନିଶ୍ଚିତ ଭାବେ କଷ୍ଟକର। କାରଣ ବଲ୍ର ଗତିରେ ଦିଗରେ ଭିନ୍ନତା ରହିଥାଏ। ଦେହ ସହିତ ଲାଗି କରି ଖେଳିବାକୁ ପ୍ରୟାସ କରିଥିଲି ଓ ଆବଶ୍ୟକ ପଡିଲେ ବଲ୍କୁ ଛାଡି ଦେବାକୁ ଶ୍ରେୟସ୍କର ମଣିଥିଲି। ୭-୮ ଓଭର ପରେ ବଲ୍ ଚମକ କମିଗଲେ କିଭଳି ଖେଳିବାକୁ ହେବ ଜାଣିଥିଲି। ଏହା ଏକ ସ୍ଲୋ ଓ ଲୋ ପିଚ୍ ହୋଇଥିବାରୁ ସତର୍କତା ଅବଲମ୍ବନ କରିଥିଲି। ପୂର୍ବରୁ ଭାରତରେ ବହୁତ ପ୍ରଥମ ଶ୍ରେଣୀ ମ୍ୟାଚ୍ ଖେଳିଛି। ତେଣୁ ପରିସ୍ଥିତି ସମ୍ପର୍କରେ ଭଲ ଭାବେ ଅବଗତ ରହିଛି। ଫିଲ୍ଡରମାନେ ସର୍କଲ ଭିତରେ ଥିଲେ କିପରି ବ୍ୟାଟିଂ କରିବାକୁ ହେବ ତାହା ମଧ୍ୟ ଜାଣିଛି ବୋଲି ରୋହିତ କହିଛନ୍ତି।
