ନୂଆଦିଲ୍ଲୀ,୨୨ା୨(ପି.ଟି.): ପାକିସ୍ତାନ ସ୍କୁଲ୍ରେ ବୋମା ଫୁଟିବା, ନେପାଳରେ ଭୂମିକମ୍ପ ହେବା ଭଳି କାରଣକୁ ନେଇ ଓକିଲମାନେ ବାରମ୍ବାର ଧର୍ମଘଟ କରୁଥିବାରୁ ସୁପ୍ରିମକୋର୍ଟ ଏଥିରେ କ୍ଷୁବ୍ଧ ହୋଇଛନ୍ତି। ଏଭଳି ଜୋକ୍ ବନ୍ଦ କରିବାକୁ ସର୍ବୋଚ୍ଚ ଅଦାଲତ ସେମାନଙ୍କୁ ତାଗିଦ କରିଛନ୍ତି। ଉତ୍ତରାଖଣ୍ଡର ୩ଟି ଜିଲାରେ ଗତ ୩୫ ବର୍ଷ ହେଲା ସବୁ କାର୍ଯ୍ୟଦିବସ ଶନିବାର ଆଇନଜୀବୀମାନେ ଧର୍ମଘଟ ଚଳାଇଥିବାରୁ ଏହା ସୁପ୍ରିମକୋର୍ଟଙ୍କ ଦୃଷ୍ଟି ଆକର୍ଷଣ କରିଥିଲା। ଡେରାଡୁନ୍ ସମେତ ହରିଦ୍ୱାର ଓ ଉଧାମସିଂ ନଗରର କେତେକ ଅଞ୍ଚଳରେ ଆଇନଜୀବୀମାନେ ପ୍ରତି କାର୍ଯ୍ୟଦିବସ ଶନିବାର କୋର୍ଟ ବର୍ଜନ କରି ଧର୍ମଘଟ କରୁଥିବାରୁ ଉତ୍ତରାଖଣ୍ଡ ହାଇକୋର୍ଟ ଏହାକୁ ବେଆଇନ ଦର୍ଶାଇଥିଲେ। ହାଇକୋର୍ଟଙ୍କ ରାୟ ବିରୋଧରେ ଏକ ପିଟିଶନର ଶୁଣାଣି ବେଳେ ସର୍ବୋଚ୍ଚ ଅଦାଲତ ଉପରୋକ୍ତ ମତ ଦେଇଛନ୍ତି।
ଓକିଲ ଧର୍ମଘଟ ଯୋଗୁ କୋର୍ଟ କାର୍ଯ୍ୟ ବାଧାପ୍ରାପ୍ତ ହେବା ସହ ବହୁସଂଖ୍ୟାରେ ମାମଲା ବିଚାର ହୋଇ ନ ପାରି ପଡ଼ିରହୁଛି। ମୂଲ୍ୟବାନ କାର୍ଯ୍ୟଦିବସ ନଷ୍ଟ ହେଉଛି। ହାଇକୋର୍ଟ ଏ ସମ୍ପର୍କରେ ଲ କମିଶନଙ୍କୁ ଜଣାଇଥିଲେ। ସେତେବେଳକୁ ଡେରାଡୁନ୍ରେ ଓକିଲଙ୍କ ଧର୍ମଘଟ ୪୫୫ ଦିନ ହୋଇଥିବାବେଳେ ହରିଦ୍ୱାର ଜିଲାରେ ୫୧୫ ଦିନ ହୋଇଥିଲା,ଯାହା ପଛରେ କୌଣସି ଯଥାର୍ଥ କାରଣ ନ ଥିଲା। ଏହାର ଶୁଣାଣି କରି ଜଷ୍ଟିସ୍ ଅରୁଣ ମିଶ୍ର ଓ ଏମ୍.ଆର୍. ଶାହଙ୍କୁ ନେଇ ଗଠିତ ଖଣ୍ଡପୀଠ କହିଛନ୍ତି, ବିସ୍ଫୋରଣ, ଭୂକମ୍ପ, ବର୍ଷା ଭଳି ଘଟଣା ଦେଶର ସବୁଆଡେ ଘଟୁଛି। ଏହାକୁ ନେଇ ପ୍ରତି ଶନିବାର ଧର୍ମଘଟ ଚଳାଇବାକୁ ବାର୍ ଆସୋସିଏଶନ କିପରି କହିପାରିବ ବୋଲି ଖଣ୍ଡପୀଠ କହିଛନ୍ତି। ଏଭଳି କାର୍ଯ୍ୟକୁ ଅନୁମତି ଦିଆଯାଇପାରିବ ନାହିଁ ବୋଲି ସର୍ବୋଚ୍ଚ ଅଦାଲତ କହିଛନ୍ତି।
