ପୁରୁଣା ଭୁବନେଶ୍ୱର,୬।୯(ଡି.ଏନ.ଏ.) : ଏକଦା ଐତିହ୍ୟ ଶିଶୁପାଳଗଡ ଏ୫୬୨. ୬୦୦ ଡିସିମିଲରୁ ଊର୍ଦ୍ଧ୍ୱ ପରିମିତ ଅଞ୍ଚଳରେ ଥିବାବେଳେ ଏବେ ମାତ୍ର ଏ.୦.୭୭୭ ଡିସିମିଲରେ ଏହା ରହିଛି। ସମ୍ପ୍ରତି ଶିଶୁପାଳଗଡରେ ମହାଭୋଇ ଶାସନ, ଶିଶୁପାଳ, ବଡଧାନପୁର, ଏଭଳି କେତେଗୋଟି ମୌଜାକୁ ସଂରକ୍ଷଣ ନିମନ୍ତେ ଏଏସଆଇ କର୍ତ୍ତୃପକ୍ଷ ନିର୍ଦ୍ଦେଶନାମା ଜାରି କରିଥିଲେ। ରାଜ୍ୟ ସରକାରଙ୍କ ବିଭିନ୍ନ ବିଭାଗର ନିଷ୍କ୍ରିୟତା ପାଇଁ ଏଭଳି ଐତିହ୍ୟ ଜାଗାଟି ସତ୍ତା ହରାଇବାକୁ ବସିଛି। ଐତିହ୍ୟ ଗଡ଼ର ଚତୁଃପାର୍ଶ୍ୱଠାରୁ ଏଏସ୍ଆଇର ଗାଇଡଲାଇନ ଅନୁସାରେ, ୧୦୦ ମିଟର ମଧ୍ୟରେ କୌଣସି ଖନନ ନିର୍ମାଣ କାର୍ଯ୍ୟ ହୋଇପାରିବ ନାହିଁ। ଯଦି କୌଣସି ସରକାରୀ କିମ୍ବା ଘରୋଇ ବ୍ୟକ୍ତି ବିଶେଷ ଏଠାରେ ଉଭୟ ନୟମକୁ ଭଙ୍ଗ କରନ୍ତି ସେଥିପାଇଁ ଜେଲ ଓ ଜରିମାନା ଦଣ୍ଡବିଧାନ ଅଛି। ମାତ୍ର ଏହାକୁ ଖାତିର ନ କରି ଘରୋଇ ଓ ଜବରଦଖଲକାରୀମାନେ ୧୦୦ ମିଟର ତ ଦୂରର କଥା ବିରାଟ ଗଡର ପାଚେରିକୁ କାଟି ସମତୁଲ କରି ରାସ୍ତା ନେଉଛନ୍ତି। ଅନେକ ସ୍ଥାନରେ ଗଡକୁ ଜେସିବି ଲଗାଇ କାଟି କଲୋନୀ ମଧ୍ୟ କରାଗଲାଣି। ଏଭଳି କାରନାମାକୁ ବିଭାଗୀୟ ଅଧିକାରୀମାନେ ପ୍ରଚ୍ଛଦ ପଟରେ ପ୍ରୋତ୍ସାହନ ଦେଉଥିବା ଘଟଣାରୁ ସ୍ପଷ୍ଟ ହେଉଛି। ଐତିହ୍ୟ ପାଚେରି ଖୋଳି ଘରୋଇ ଲୋକଙ୍କୁ ସୁବିଧା ଦେବାକୁ ଯାଇ ଗଡ କାଟି ବିଭିନ୍ନ ସ୍ଥାନରେ ବିଦ୍ୟୁତ ଖୁଣ୍ଟ ଏବଂ ଟ୍ରାନ୍ସଫର୍ମର ବସାଯାଇଛି। ଏହି ଘଟଣାରେ ସରକାରୀ ଅଧିକାରୀମାନେ ପରୋକ୍ଷ ଭାବେ ସମ୍ପୃକ୍ତ ଥିବା ଅଭିଯୋଗ ହେଉଛି। ମିଳିଥିବା ଖବର ମୁତାବକ, ନୂଆ ଜଗନ୍ନାଥ ବାଇପାସ୍ ରାସ୍ତାରେ ଗଡ଼କୁ କାଟି ବିଭିନ୍ନ ବ୍ୟବସାୟ ପ୍ରତିଷ୍ଠାନ କରାଯାଇଛି। ସେହିଭଳି ଗଡର ପୂର୍ବପଟ ପାଚେରିକୁ କାଟି ମଧ୍ୟ ରାସ୍ତା ନିଆଯାଇଥିବା ଖବର ମିଳିଛି। ସେହିଭଳି ମହାଭୋଇ ଶାସନ ମୌଜା ତଥା ପଶ୍ଚିମ ପଟେ ଯାଇଥିବା ଗଡ ପାଚେରିକୁ କଟାଯାଇଛି। ତୁରନ୍ତ ଶିଶୁପାଳଗଡ ଐତିହ୍ୟ ସ୍ଥଳକୁ ସୁରକ୍ଷା ଦେଇ ଜବରଦଖଲକାରୀଙ୍କ ପ୍ରତି ଦୃଢ କାର୍ଯ୍ୟାନୁଷ୍ଠାନ ଦାବି କରିଛି ଏକାମ୍ର ଜନଜାଗରଣ ମଞ୍ଚ। ନଚେତ୍ ଆଗାମୀ ଦିନରେ ମଞ୍ଚ ପକ୍ଷରୁ ଆନ୍ଦୋଳନାତ୍ମକ ପନ୍ଥା ଅବଲମ୍ବନ କରାଯିବ ବୋଲି ମଞ୍ଚ ଅଧ୍ୟକ୍ଷ ଭୀଷ୍ମ ନାରାୟଣ ନାୟକ ସୂଚନା ଦେଇଛନ୍ତି। ଏ ନେଇ ଏଏସଆଇର ସଂରକ୍ଷଣ ଅଧୀକ୍ଷକ ତ୍ରୈଲୋକ୍ୟନାଥ ବେହେରାଙ୍କୁ ପଚାରିବାରେ ଘଟଣା ସମ୍ବନ୍ଧରେ ଅଭିଯୋଗ ପାଇବା ପରେ ତୁରନ୍ତ ବିଡିଓଙ୍କୁ ଚିଠି ଲେଖିବୁ। ସତ୍ୟାସତ୍ୟ ମିଳିଲେ କାର୍ଯ୍ୟାନୁଷ୍ଠାନ ଗ୍ରହଣ କରିବୁ।
