ନୂଆଦିଲ୍ଲୀ,୨୦-୭: ମୁକେଶ ଅମ୍ବାନୀଙ୍କ ମାଲିକାନାରେ ଥିବା ରିଲାଏନ୍ସ ଜିଓ ମେ’ରେ ଭାରତୀ ଏୟାରଟେଲକୁ ପଛରେ ପକାଇ ଦେଶର ଦ୍ୱିତୀୟ ସର୍ବବୃହତ ଟେଲିକମ କମ୍ପାନୀ ହେବାର ଗୌରବ ଅର୍ଜନ କରିଛି। ଭାରତୀୟ ଦୂରସଞ୍ଚାର ନିୟାମକ ପ୍ରାଧିକରଣ(ଟ୍ରାଇ) ପକ୍ଷରୁ ଶୁକ୍ରବାର ପ୍ରକାଶିତ ତଥ୍ୟ ଅନୁଯାୟୀ, ମେ’ରେ ଜିଓର ଗ୍ରାହକ ସଂଖ୍ୟା ୩୨.୨୯ କୋଟି ଓ ବଜାର ଅଂଶଧନ ୨୭.୮୦ ପ୍ରତିଶତରେ ପହଞ୍ଚତ୍ୟାଇଛି। ସୂଚନାଥାଉ କି, ୨୦୧୬ ସେପ୍ଟେମ୍ବରରେ ବଜାରରେ ପ୍ରବେଶ କରି ଜିଓ ଶସ୍ତା ଟାରିଫ ଜାରି କରି ବଜାରରେ ହଇଚଇ ସୃଷ୍ଟି କରିଛି। ପୂର୍ବରୁ ବଜାରରେ ଥିବା ଭୋଡାଫୋନ, ଆଇଡିଆ, ଏୟାରଟେଲ ଆଦି କମ୍ପାନୀ ଏହାକୁ ପ୍ରତିଯୋଗିତାରେ ଟକ୍କର ଦେବାକୁ ଯାଇ ପ୍ରଭୁତ କ୍ଷତି ସହି ଚାଲିଛନ୍ତି। ବସ୍ତୁତଃ ଜିଓ କାରଣରୁ ଟେଲିକମ୍ ସେକ୍ଟରରେ ମାନ୍ଦାବସ୍ଥା ସୃଷ୍ଟି ହୋଇଛି। ଟ୍ରାଇ ତଥ୍ୟ ଅନୁଯାୟୀ ଭୋଡାଫୋନ ଆଇଡିଆ ୩୯.୭୫ କୋଟି ଗ୍ରାହକ ଓ ୩୩.୩୬% ବଜାର ଅଂଶ ସହ ପ୍ରଥମ ସ୍ଥାନରେ ରହିଛି। ତେବେ ଏୟାରଟେଲ ୩୨.୦୩ କୋଟି ଗ୍ରାହକ ଓ ୨୭.୫୮ ପ୍ରତିଶତ ବଜାର ଅଂଶ ସହ ତୃତୀୟ ସ୍ଥାନକୁ ଖସି ଆସିଛି। ମେ’ରେ ଜିଓ ୮୧.୮୦ ଲକ୍ଷ, ଭୋଡାଫୋନ ଆଇଡିଆ ଓ ଏୟାରଟେଲ ଯଥାକ୍ରମେ ୫୬.୯୭ ଲକ୍ଷ ଏବଂ ୧୫.୦୮ ଲକ୍ଷ ନୂଆ ଗ୍ରାହକ ଯୋଡିପାରିଛି।
