ଭୁବନେଶ୍ୱର,୧୩ା୫(ସୁନିତ୍ ମିଶ୍ର):ଏନ୍ଇଇଟି ପ୍ରଶ୍ନପତ୍ର ଲିକ୍ହେବା ଘଟଣାକୁ ନେଇ ଦେଶବ୍ୟାପୀ ଛାତ୍ରୀଛାତ୍ରମାନେ ଜୋର୍ଦାର ପ୍ରତିବାଦ ଆରମ୍ଭ କରିଛନ୍ତି। ଏହାଦ୍ୱାରା ଦେଶର ୨୨ ଲକ୍ଷରୁ ଊର୍ଦ୍ଧ୍ୱ ପରୀକ୍ଷାର୍ଥୀଙ୍କ ପରିଶ୍ରମ ଏବଂ ଭବିଷ୍ୟତ ସହ ବିଶ୍ୱାସଘାତକତା ହୋଇଥିବା ଚର୍ଚ୍ଚା ହେଉଛି। ଚଳିତ ଏନ୍ଇଇଟି ପ୍ରଶ୍ନପତ୍ର ଲିକ୍ହେବା ଘଟଣାକୁ ମିଶାଇଲେ ଏହାରି ଭିତରେ ଏକାଧିକ ଥର ଏନ୍ଇଇଟି ପରୀକ୍ଷା ବାତିଲହେଲାଣି ବୋଲି ସବୁଆଡ଼ୁ ଅଭିଯୋଗ ଆସୁଛି। ଫଳରେ ଏନ୍ଇଇଟି ବିଷୟ ଆସିବା କାରଣରୁ କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଚର୍ଚ୍ଚାକୁ ଆସିଛନ୍ତି। ଧର୍ମେନ୍ଦ୍ରଙ୍କ ଦୁଇଟି ଭିଡିଓ ଏବେ ସାମାଜିକ ଗଣମାଧ୍ୟମରେ ପ୍ରବଳ ଜୋର୍ରେ ଭାଇରାଲ ହେବାରେ ଲାଗିଛି। ୨୦୨୫ରେ ଧର୍ମେନ୍ଦ୍ର ଏକ ଗଣମାଧ୍ୟମକୁ ସ୍ବତନ୍ତ୍ର ସାକ୍ଷାତ୍କାର ଦେଇ ଦୃଢ଼ତାର ସହ କହିଥିଲେ, ୨୦୨୪ରେ ହୋଇଥିବା ଏନ୍ଇଇଟି ପରୀକ୍ଷା ପ୍ରଶ୍ନପତ୍ର ଲିକ୍ ନେଇ ଯାହା ଅବ୍ୟବସ୍ଥା ହୋଇଛି ସେହି କଥାରେ ସେ ମୁହଁ ଲୁଚାଇ କୁଆଡ଼େ ଯାଇନାହାନ୍ତି ବରଂ ଯାହା ତ୍ରୁଟି କିମ୍ବା ଭୁଲ୍ ହୋଇଛି ତା’ର ଉତ୍ତରଦାୟିତ୍ୱ ନେବା ସହ ତାକୁ ସୁଧାରିଛନ୍ତି।
ମାତ୍ର ବର୍ତ୍ତମାନ ଏନ୍ଇଇଟି୍ ପରୀକ୍ଷାର ପ୍ରଶ୍ନପତ୍ର ଲିକ୍ କିପରି ହେଲା ବୋଲି ଯେତେବେଳେ ଧର୍ମେନ୍ଦ୍ରଙ୍କୁ ଜାତୀୟ ଗଣମାଧ୍ୟମ ପ୍ରଶ୍ନ କରିବାକୁ ଚାହିଁଲେ ସେ କିଛି ଉତ୍ତର ଦେଇନାହାନ୍ତି। ଗଣମାଧ୍ୟମ ପ୍ରତିନିଧିମାନେ ଏନ୍ଇଇଟି ପ୍ରଶ୍ନପତ୍ର ଲିକ୍ ଉପରେ କ’ଣ କହିବେ ବୋଲି ପଚାରି ପଚାରି ଯାଉଥିବା ବେଳେ ଧର୍ମେନ୍ଦ୍ର କିଛି ନ ଶୁଣିବା ଭଳି ଯାଇ ଗାଡ଼ିରେ ବସି ଚାଲିଯାଇଛନ୍ତି। ପୂର୍ବରୁ ଯେତେବେଳେ ଏନ୍ଇଇଟି ପ୍ରଶ୍ନପତ୍ର ଲିକ୍ହେବା ବେଳେ ଏହି ଘଟଣାରେ ମୁହଁ ଲୁଚାଇ ଯାଇନାହାନ୍ତି ବୋଲି କେନ୍ଦ୍ରମନ୍ତ୍ରୀ କହୁଥିଲେ। ଏବେ କିନ୍ତୁ ସେ ଗଣମାଧ୍ୟମକୁ କିଛି ଉତ୍ତର ନ ଦେଇ ଚାଲିଯିବା ବିଷୟ ସାମାଜିକ ଗଣମାଧ୍ୟମରେ ବହୁଳ ପ୍ରସାରିତ ହେବାରେ ଲାଗିଛି। କେତେଜଣ ଉକ୍ତ ପୋଷ୍ଟରେ କମେଣ୍ଟ ଦେଇ କହିଛନ୍ତି, ବାସ୍ତବରେ ମନ୍ତ୍ରୀଙ୍କ କଥା ଆଉ କାମ ଭିତରେ ଅନେକ ଫରକ ରହିଛି।
Dharitri – Odisha’s No.1 Odia Daily
