ନୂଆଦିଲ୍ଲୀ,୨୨-୪: ବନ୍ଦ ହୋଇଯାଇଥିବା ଜେଟ୍ ଏୟାରଓ୍ବେଜର ଅଂଶଧନ ବିକ୍ରି କରି ବକେୟା ଋଣ ଆଦାୟ ଲାଗି ଉଦ୍ୟମ କରୁଥିବା ଏସ୍ବିଆଇ ନେତୃତ୍ୱାଧୀନ ଋଣପ୍ରଦାନକାରୀ ବିଡ୍ ପ୍ରକ୍ରିୟା ଆହ୍ବାନ କରିଛନ୍ତି। ତେବେ ଏହା ସଫଳ ନ ହେଲେ ସେମାନେ ଏଥିପାଇଁ ପ୍ଲାନ-ବି ପ୍ରସ୍ତୁତ କରିଛନ୍ତି। ଦେବାଳିଆ ସମାଧାନ ପ୍ରକ୍ରିୟା(ଆଇବିସି) ବାହାରେ ମାମଲାର ସମାଧାନ କରିବାକୁ ଡିଆର୍ଟି(ଡେବ୍ଟ ରିକଭରୀ ଟ୍ରିବ୍ୟୁନାଲ) ଆପଣାଇବାକୁ ସେମାନେ ପ୍ରସ୍ତୁତ ହେଲେଣି।
ବିଶ୍ୱସ୍ତ ସୂତ୍ରରୁ ପ୍ରାପ୍ତ ସୂଚନାନୁଯାୟୀ, ଜେଟ୍ର ଅଂଶଧନ ବିକ୍ରି କରିବା ଲାଗି ଯଥାସମ୍ଭବ ପ୍ରୟାସ କରାଯାଉଛି। ତେବେ ଡିଆର୍ଟି ସେମାନଙ୍କ ପାଇଁ ଶେଷ ବିକଳ୍ପ କୁହାଯାଉଛି। ବ୍ୟାଙ୍କିଙ୍ଗ ଶିଳ୍ପ ସହ ଜଡ଼ିତ ଜଣେ ବରିଷ୍ଠ ଅଧିକାରୀ କହିଛନ୍ତି ଯେ, ଡିଆର୍ଟି ଏକ ସାମାନ୍ୟ ଋଣ ଅସୁଲ ପ୍ରକ୍ରିୟା। କମ୍ପାନୀ ନିକଟରେ ଥିବା ୧୬ ବିମାନ ଏବଂ କିଛି ସମ୍ପତ୍ତି ପୂର୍ବରୁ ହିଁ ବନ୍ଧା ପଡ଼ିଛି। ତେବେ ଡିଆର୍ଟି ବ୍ୟାଙ୍କ ଏବଂ ଅନ୍ୟ ଆର୍ଥିକ ସଂସ୍ଥାକୁ ନିଜ ଗ୍ରାହକଙ୍କଠାରୁ ଋଣ ଅସୁଲ କରିବାରେ ସହାୟତା କରିଥାଏ। ବକେୟା ଅସୁଲ ଲାଗି ଜେଟ୍ ଏୟାରଓ୍ବେଜକୁ ଏନ୍ସିଏଲ୍ଟି ହାତରେ ଟେକି ଦେବାକୁ ଋଣପ୍ରଦାନକାରୀ ଇଚ୍ଛୁକ ଥିବା ପୂର୍ବରୁ କୁହାଯାଉଥିଲା। ବର୍ତ୍ତମାନ ଜେଟ୍ ଉପରେ ପ୍ରାୟ ୮୫୦୦ କୋଟି ଟଙ୍କାର ଋଣ ରହିଛି। ବ୍ୟାଙ୍କ ଦ୍ୱାରା ଜରୁରୀ ପାଣ୍ଠି ଯୋଗାଣ ନ ହେବାରୁ କମ୍ପାନୀ ନିଜ କାମ ବନ୍ଦ କରିବାକୁ ନିଷ୍ପତ୍ତି ନେଇଥିଲା। ପ୍ରାପ୍ତ ସୂଚନାରୁ ପ୍ରକାଶ ଯେ, ଡିଆର୍ଟି ମାଧ୍ୟମରେ ଜେଟ୍ର ବିମାନ ଓ ଅନ୍ୟ ସମ୍ପତ୍ତି ବିକ୍ରିରୁ ଉଚିତ୍ ମୂଲ୍ୟ ମିଳିବାର ସମ୍ଭାବନା ରହିଛି। ୪ଟି କମ୍ପାନୀ ଏଟିହାଦ ଏୟାରଓ୍ବେଜ, ଟିପିଜି କ୍ୟାପିଟାଲ, ଇଣ୍ଡିଗୋ ପାର୍ଟନର୍ସ ଏବଂ ରାଷ୍ଟ୍ରୀୟ ନିବେଶ ଏବଂ ଭିତ୍ତିଭୂମି ଢାଞ୍ଚା ପାଣ୍ଠି(ଏନ୍ଆଇଆଇଏଫ୍) ଜେଟ୍ର ଅଂଶଧନ କିଣିବାକୁ ଆଗ୍ରହ ପ୍ରକାଶ କରିଛନ୍ତି। ପ୍ରାରମ୍ଭିକ ନିଲାମଧାରୀଙ୍କ ସମ୍ପର୍କରେ ଚୂଡ଼ାନ୍ତ ତଥ୍ୟ ମେ ୧୦ରେ ମିଳିଯିବ।
