ନୂଆଦିଲ୍ଲୀ,୧୨।୪: ଭାରତ ପୂର୍ବଭଳି ବିଶ୍ୱ ଊର୍ଜା ଚାହିଦାର କେନ୍ଦ୍ରବିନ୍ଦୁ ହୋଇ ରହିବ। କରୋନା ପରବର୍ତ୍ତୀ ସମୟରେ ମଧ୍ୟ ଊର୍ଜା ଚାହିଦା କ୍ଷେତ୍ରରେ ଭାରତ ଏହାର ପ୍ରମୁଖ ସ୍ଥାନ ବଜାୟ ରଖିବ ବୋଲି ଜି-୨୦ ଶକ୍ତିମନ୍ତ୍ରୀ ସମ୍ମିଳନୀରେ ଭିଡିଓ କନଫରେନ୍ସିଂ ଜରିଆରେ ଯୋଗଦେଇ କେନ୍ଦ୍ର ପେଟ୍ରୋଲିୟମ ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ସୂଚନା ଦେଇଛନ୍ତି। ସାଉଦି ରାଜକୁମାର ଅବଦୁଲ ଅଜିଜ୍ଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି ସମ୍ମିଳନୀରେ ପ୍ରଧାନ ବର୍ତ୍ତମାନର ଚ୍ୟାଲେଞ୍ଜିଂ ସ୍ଥିତିରେ ଅନ୍ତର୍ଜାତୀୟ ସହଯୋଗ ନେଇ ଗୁରୁତ୍ୱାରୋପ କରିଛନ୍ତି। ଭାରତରେ ୨୧ ଦିନିଆ ଲକ୍ଡାଉନ ପାଇଁ ଏଲ୍ପିଜି ଛଡ଼ା ଅନ୍ୟ ସବୁ ପେଟ୍ରୋଲିୟମ ସାମଗ୍ରୀର ବ୍ୟବହାର କମିଛି। ଦେଶର ୮୦.୩ ନିୟୁତ ଗରିବ ପରିବାରକୁ ଆଗାମୀ ୩ ମାସ ପର୍ଯ୍ୟନ୍ତ ମାଗଣା ଏଲ୍ପିଜି ଯୋଗାଣ ପାଇଁ କେନ୍ଦ୍ର ସରକାର ନିଷ୍ପତ୍ତି ଗ୍ରହଣ କରିଛନ୍ତି। ଭାରତରେ ୨୩ ବିଲିୟନ ଡଲାର ଆର୍ଥତ୍କ ପ୍ୟାକେଜରେ ମାଗଣା ଏଲ୍ପିଜି ଯୋଗାଣ ଯୋଗୁ ଏହାର ଚାହିଦା ଦେଶରେ ବଢ଼ିଥିବା ପ୍ରଧାନ ମତ ରଖିଛନ୍ତି।
ଭାରତର ଏଲ୍ପିଜି ଚାହିଦାକୁ ମିତ୍ର ରାଷ୍ଟ୍ରଗୁଡ଼ିକ ପୂରଣ କରିଥିବାରୁ ପ୍ରଧାନ ଏଥିଲାଗି ଧନ୍ୟବାଦ ଦେଇଛନ୍ତି। ଏହାବାଦ ତୈଳ ଉତ୍ପାଦନକାରୀ ରାଷ୍ଟ୍ରଗୁଡ଼ିକ ଲାଗି ଉଚିତ ମୂଲ୍ୟ ତଥା କ୍ରୟ କରୁଥିବା ଭାରତ ଭଳି ଦେଶଗୁଡିକ ପାଇଁ କଷ୍ଟ ନ ହେବା ଭଳି ମୂଲ୍ୟ ଉପରେ ସେ ଦେଶର ଏଜେଣ୍ଡାକୁ ଦୋହରାଇଥିଲେ। ବିଶ୍ୱର ତୈଳ ଚାହିଦା କମୁଥିବାରୁ ଆଗାମୀ ଦିନରେ ବିଶ୍ୱର ଇନ୍ଧନ ଚାହିଦା ବଢ଼ାଇବା ସହ ଯୋଗାଣ ବୃଦ୍ଧି ଦ୍ୱାରା ଉତ୍ପାଦନକାରୀ ଦେଶଗୁଡ଼ିକ ମୂଲ୍ୟ କମ୍ ରଖିବା ସମୟର ଆବଶ୍ୟକତା ବୋଲି ପ୍ରଧାନ ମତବ୍ୟକ୍ତ କରିଛନ୍ତି। ଏହି ସମ୍ମିଳନୀରେ ବିଭିନ୍ନ ରାଷ୍ଟ୍ରର ପ୍ରତିନିଧିମାନେ ଯୋଗଦେଇ ବିଭିନ୍ନ ପ୍ରସଙ୍ଗ ଉପରେ ଆଲୋଚନା କରିଛନ୍ତି।
