ମାଲକାନଗିରି,୧୯।୧୦(ଡି.ଏନ୍.ଏ.) : ମାଲକାନଗିରି ଜିଲା ମାଥିଲି ବ୍ଲକ ଅନ୍ତର୍ଗତ ସର୍ଗିଗୁଡ଼ା ଗ୍ରାମର ଜଣେ ଗରିବ ଆଦିବାସୀ ଝିଅ ଚମ୍ପା କାଲାକୁରା ଇଚ୍ଛାମୃତ୍ୟୁ ପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଖୋଲା ପତ୍ର ଲେଖିବା ପରେ ଜିଲା ପ୍ରଶାସନ ତାଙ୍କର ଚିକିତ୍ସା ଦାୟିତ୍ୱ ନେଇଛି। ଏ ନେଇ ବିଭିନ୍ନ ଗଣମାଧ୍ୟମରେ ଖବର ପ୍ରକାଶିତ ପରେ ଜିଲାପାଳ ମନୀଷ ଅଗ୍ରୱାଲଙ୍କ ନିର୍ଦ୍ଦେଶ କ୍ରମେ ମାଲକାନଗିରିରୁ ଏକ ଡାକ୍ତରୀ ଦଳ ଓ ବ୍ଲକର କର୍ମକର୍ତ୍ତା ତାଙ୍କ ଗ୍ରାମକୁ ଯାଇ ଆମ୍ବୁଲାନ୍ସ ଯୋଗେ ଆଣି ଶୁକ୍ରବାର ରାତିରେ ଜିଲା ସଦର ମହକୁମା ଚିକିତ୍ସାଳୟରେ ଭର୍ତ୍ତି କରାଇଛନ୍ତି। ଅପରପକ୍ଷରେ ଯାହା ଆବଶ୍ୟକ ପଡ଼ିବ ସେଭଳି ଚିକିତ୍ସା ଯୋଗାଇ ଦିଆଯିବ ବୋଲି ଜିଲାପାଳ କହିଛନ୍ତି।
ସୂଚନାଯୋଗ୍ୟ, ସର୍ଗିଗୁଡ଼ା ଗ୍ରାମର ନରସିଂହ କାଲାକୁରାଙ୍କ ଝିଅ ଚମ୍ପା କାଲାକୁରା ଗତ ୨୦୦୬ ମସିହାରେ ସପ୍ତମ ଶ୍ରେଣୀରେ ପାଠ ପଢୁଥିବା ବେଳେ ହଠାତ୍ ହାତ ଗୋଡ଼ ଝିମା ମାରିଯାଇଥିଲା ା କିଛିଦିନ ଏହି ଭଳି ହେବା ପରେ ସେ ସମ୍ପୂର୍ଣ୍ଣ ଶଯ୍ୟାଶାୟୀ ହୋଇଯାଇଥିଲେ। ଅଜଣା ରୋଗରେ ପୀଡ଼ିତ ହୋଇ ଚମ୍ପା ଦୀର୍ଘ ୧୩ ବର୍ଷ ବିଛଣାରେ ପଡ଼ି ରହିଥିଲେ। ପରିବାରର ଆର୍ଥିକ ସ୍ଥିତି ସ୍ବଚ୍ଛଳ ନ ଥିବାରୁ କେବଳ ଯନ୍ତ୍ରଣାରେ ଛଟପଟ ହେଉଥିଲେ। ଅସହ୍ୟ ହେବାରୁ ଇଚ୍ଛାମୃତ୍ୟୁ ନିମନ୍ତେ ମୁଖ୍ୟମନ୍ତ୍ରୀଙ୍କୁ ପତ୍ର ଲେଖିବା ଘଟଣା ଗଣମାଧ୍ୟମରେ ପ୍ରକାଶ ପାଇଥିଲା। ଏହା ପରେ ଜିଲା ପ୍ରଶାସନ ତତ୍ପରତା ପ୍ରକାଶ କରି ତାଙ୍କୁ ଚିକିତ୍ସା ସୁବିଧା ଯୋଗାଇ ଦେଇଛି।
