ନୂଆଦିଲ୍ଲୀ,୧୨-୧୧: ଆୟକର ସ୍ଲାବ୍ ଏବଂ କ୍ୟାପିଟାଲ ଗେନ୍ସ ଟାକ୍ସ କ୍ଷେତ୍ରରେ ସମ୍ପୂର୍ଣ୍ଣ ପରିବର୍ତ୍ତନ ନେଇ ଟାସ୍କଫୋର୍ସ ସରକାରଙ୍କୁ ପ୍ରସ୍ତାବ ଦେଇଛି। ଏହା ଲାଗୁ ହେଲେ ରାଜକୋଷକୁ ଅଧିକ ୫୦,୦୦୦ କୋଟି ଟଙ୍କାର ରାଜସ୍ବ ଆସିବା ନେଇ ସମ୍ଭାବନା ରହିଛି। ପ୍ରକ୍ରିୟା ସହ ଜଡିତ ସରକାରଙ୍କ ୨ ଉଚ୍ଚ ପଦସ୍ତ ଅଧିକାରୀ ଏହି ସୂଚନା ଦେଇଛନ୍ତି। ପ୍ରତ୍ୟକ୍ଷ ଟିକସ ଟାସ୍କଫୋର୍ସ କମିଟିର ପ୍ରସ୍ତାବ ଉପରେ ସରକାର ବର୍ତ୍ତମାନ ବିଚାର ବିମର୍ଷ କରୁଛନ୍ତି। ଏହାର ଚୂଡାନ୍ତ ପ୍ରସ୍ତାବ ଆଗାମୀ ବଜେଟ୍ରେ ସ୍ଥାନ ପାଇବା ନେଇ ଆଶାକରାଯାଉଛି। ସମ୍ପତ୍ତି ଘୋଷଣା, ଉଚ୍ଚ ହାରରେ ଟିକସ ପ୍ରଦାନ କରିଥିବା ମାମଲାଗୁଡିକରେ କୌଣସି କାର୍ଯ୍ୟାନୁଷ୍ଠାନ କିମ୍ବା ପୁଣି ଥରେ ଆସେସ୍ମେଣ୍ଟ ନ କରାଇବା ଲାଗି ଭଳି ବିଭିନ୍ନ ପ୍ରସ୍ତାବ ଦିଆଦିଆଇଛି। ଗତ ୬ ବର୍ଷ ପର୍ଯ୍ୟନ୍ତ ମାମଲା, ସୁଧ ଏବଂ ୫୦% ଜରିମାନା ଦେଇଥିବା ଟିକସ ମାମଲାଗୁଡିକ ଲାଗି ଏଭଳି ପ୍ରସ୍ତାବ ରହିଛି। ମାତ୍ର ପ୍ରସ୍ତାବଗୁଡିକୁ ଏବେ ଯାଏ ସାର୍ବଜନୀନ କରାଯାଇ ନ ଥିବା ଜଣାପଡ଼ିଛି।
ଏଭଳି ବିଭିନ୍ନ ପ୍ରସ୍ତାବ ଉପରେ ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ(ପିଏମ୍ଓ) ଅର୍ଥ ମନ୍ତ୍ରଣାଳୟର ରାଜସ୍ବ ବିଭାଗ ଏବଂ ନୀତି ଆୟୋଗ ସହ ଆଲୋଚନା କରୁଛି। ଲଙ୍ଗ୍ଟର୍ମ କ୍ୟାପିଟାଲ ଗେନ୍ସ(ଏଲ୍ଟିସିଜି)ର ବର୍ତ୍ତମାନ ଟିକସ ଢାଞ୍ଚା ଉପରେ ମଧ୍ୟ ବିଚାର କରାଯାଉଥିବା ଏକ ଗଣମାଧ୍ୟମ ରିପୋର୍ଟରେ ଉଲ୍ଲେଖ ରହିଛି। ପୁଞ୍ଜି ବଜାର ଲାଗି ଏକ ନିବେଶକ ଅନୁକୂଳ ବାତାବରଣ ସୃଷ୍ଟି ଲାଗି ସରକାର ଏବେ କାର୍ଯ୍ୟ କରୁଛନ୍ତି। ପ୍ରଧାନମନ୍ତ୍ରୀ ନରେନ୍ଦ୍ରମୋଦି ଏବଂ ଅର୍ଥମନ୍ତ୍ରୀ ନିର୍ମଳା ସୀତାରାମନ ଆସନ୍ତା ସପ୍ତାହରେ ଏହି ବର୍ଗର ଟିକସ ଉପରେ ବିଭିନ୍ନ ପରିବର୍ତ୍ତନ କରିବାର ବିଶେଷ ସମ୍ଭାବନା ରହିଛି। ପୁଞ୍ଜି ବଜାରରେ ଅନୁକୂଳ ବାତାବରଣ ଦ୍ୱାରା ରାଜକୋଷକୁ ଟିକସ ଆଣିବା ଦିଗରେ ବିଭିନ୍ନ ଯୋଜନା ରହିଥିବା ଅର୍ଥ ମନ୍ତ୍ରଣାଳୟର ଜଣେ ଅଧିକାରୀ ଏକ ଟିଭି ସାକ୍ଷତକାରରେ ନିକଟରେ ସୂଚନା ଦେଇଥିଲେ।
ଟାସ୍କଫୋର୍ସ ଆୟକର ସ୍ଲାବ ନେଇ ବିଭିନ୍ନ ପ୍ରସ୍ତାବ ଦେଇଛନ୍ତି। ବାର୍ଷିକ ୧୦ ଲକ୍ଷ ପର୍ଯ୍ୟନ୍ତ ଆୟ କରୁଥିବା ବ୍ୟକ୍ତି ବିଶେଷଙ୍କ ଲାଗି ୧୦% ଟିକସ, ୧୦ ଲକ୍ଷ ଟଙ୍କାରୁ ଉର୍ଦ୍ଧ୍ୱ ଏବଂ ୨୦ ଲକ୍ଷ ପର୍ଯ୍ୟନ୍ତ ଆୟ ଉପରେ ୨୦% ଟିକସ ଲାଗୁ ନେଇ ପ୍ରସ୍ତାବ ରହିଛି। ୨୦ ଲକ୍ଷ ଟଙ୍କାରୁ ଉର୍ଦ୍ଧ୍ୱ ଏବଂ ୨ କୋଟି ଟଙ୍କା ପର୍ଯ୍ୟନ୍ତ ଆୟ ଉପରେ ୩୦% ଏବଂ ୨ କୋଟି ଟଙ୍କାରୁ ଉର୍ଦ୍ଧ୍ୱ ଆୟ କ୍ଷେତ୍ରରେ ୩୫% ପର୍ଯ୍ୟନ୍ତ ପ୍ରତ୍ୟକ୍ଷ ଟିକସ ଲାଗୁ କରାଇବା ପାଇଁ ଟାସ୍କଫୋର୍ସ ପ୍ରସ୍ତାବ ରଖିଛି। ବର୍ତ୍ତମାନ ଅଢେଇ ଲକ୍ଷରୁ ୫ ଲକ୍ଷ ଟଙ୍କାର ଆୟ ଉପରେ ୫% ଆୟକର ଏବଂ ୪% ସେସ୍ ଦେବାକୁ ପଡୁଛି। ୫ଲକ୍ଷରୁ ଉର୍ଦ୍ଧ୍ୱ ଏବଂ ୧୦ ଲକ୍ଷ ପର୍ଯ୍ୟନ୍ତ ଆୟ ଉପରେ ୨୦% ଟିକସ ସହ ୪% ସେସ୍ ଲାଗୁ ହେଉଛି। ଏହାବାଦ ୧୦ ଲକ୍ଷରୁ ଉର୍ଦ୍ଧ୍ୱ ଆୟ ଉପରେ ୩୦% ଆୟକର ସହ ୪% ସେସ୍ ଲାଗୁ ହେଉଥିବା ଜଣାପଡ଼ିଛି।
