ନୂଆଦିଲ୍ଲୀ,୨୫।୧୧: ମହାରାଷ୍ଟ୍ର ରାଜନୀତିକୁ ନେଇ ଉଭୟ ଲୋକ ସଭା ଓ ରାଜ୍ୟ ସଭାରେ ହଟ୍ଟଗୋଳ ହେବାରୁ ଗୃହକୁ ଆସନ୍ତା କାଲି ଦିନ ୨ଟା ପର୍ଯ୍ୟନ୍ତ ମୁଲତବି ରଖାଯାଇଛି। ସୂଚନାଯୋଗ୍ୟ, ମହାରାଷ୍ଟ୍ରରେ ଭାଜପା, ଏନ୍ସିପି ସହ ମିଶି ସରକାର ଗଢିବାକୁ ନେଇ ଏବେ ସାରା ଦେଶରେ ରାଜନୀତି ହୋଇଛି ସରଗରମ। ପ୍ରଥମେ ସଂଖ୍ୟା ଗରିଷ୍ଠତା ଦୃଷ୍ଟିରୁ ସରକାର ନ ଗଢିବାକୁ ମନା କରିଥିବା ଭାଜପା ପୁଣି କେମିତି ସରକାର ଗଢିଲା ତାକୁ ନେଇ ଅନ୍ୟ ଦଳ ପ୍ରଶ୍ନ କରିଛନ୍ତି। ତେବେ ଭାଜପାର ପ୍ରତ୍ୟାଖ୍ୟାନ ପରେ ଶିବସେନା ମେଣ୍ଟ କରି ସରକାର ଗଢିବାକୁ ଉଦ୍ୟମ କରୁଥିବା ବେଳେ ହଠାତ୍ ରାତାରାତି ବାଜି ଓଲାଟାଇ ଦେଲା ଭାଜପା। ଏବେ ଏହି ମାମଲା ସୁପ୍ରିମକୋର୍ଟ ପହଞ୍ଚିଥିବା ବେଳେ ଏହାର ଶୁଣାଣିକୁ ମଙ୍ଗଳବାର ପର୍ଯ୍ୟନ୍ତ ଘୁଞ୍ଚାଇ ଦିଆଯାଇଛି। ତେବେ ଏହାକୁ ନେଇ ଉଭୟ ଲୋକ ସଭା ଓ ରାଜ୍ୟ ସଭାରେ ବିରୋଧୀ ହଟ୍ଟଗୋଳ କରିବାକୁ ତାଙ୍କୁ ଯେମିତି ସୁଯୋଗ ମିଳିଯାଇଛି। ଏମିତିକି ପ୍ରଥମଥର ଲାଗି କଂଗ୍ରେସର ପୂର୍ବତନ ଅଧ୍ୟକ୍ଷ ରାହୁଲ ଗାନ୍ଧୀ ଗୃହରେ କିଛି ପ୍ରଶ୍ନ ନ କରି ବରଂ ଗଣତନ୍ତ୍ରକୁ ମହାରାଷ୍ଟ୍ରରେ ହତ୍ୟା କରାଯାଇଛି ବୋଲି କହି ଚୁପ୍ ରହିଛନ୍ତି। ତେଣୁ ସବୁକୁ ଦୃଷ୍ଟିରେ ରଖି ଗୃହକୁ ମୁଲତବି ରଖାଯାଇଛି।
