ନୂଆଦିଲ୍ଲୀ,୨୯।୭: ଆର୍ଏସ୍ଏସ୍ ପକ୍ଷରୁ ଉତ୍ତରପ୍ରଦେଶରେ ସୈନିକ ସ୍କୁଲ ଖୋଲାଯିବା ପାଇଁ ଯୋଜନା ପ୍ରସ୍ତୁତ କରାଯାଇଛି। ଏଠାରେ ଶିକ୍ଷାର୍ଥୀଙ୍କୁ ସେନା ଅଧିକାରୀ ହେବା ପାଇଁ ତାଲିମ୍ ଦିଆଯିବ। ଏହି ସ୍କୁଲର ନାମ ରଜ୍ଜୁ ଭୈୟା ସୈନିକ ବିଦ୍ୟାମନ୍ଦିର ରଖାଯିବ। ଏଠାରେ ପ୍ରଥମଠାରୁ ଦ୍ୱାଦଶ ପର୍ଯ୍ୟନ୍ତ ଶ୍ରେଣୀ ରହିବ। ପାଠପଢ଼ା ସହିତ ସେନା ତାଲିମ୍ ମଧ୍ୟ ଏଠାରେ ପ୍ରଦାନ କରାଯିବ। ସ୍କୁଲରେ ୨୦୨୦ଠାରୁ ଶିକ୍ଷାଦାନ ଆରମ୍ଭ କରାଯିବ ବୋଲି କୁହାଯାଉଛି। ଏହା ସଫଳ ହେଲେ ଦେଶର ଅନ୍ୟ ସ୍ଥାନରେ ମଧ୍ୟ ଏଭଳି ସ୍କୁଲ ସ୍ଥାପନା କରାଯିବାର ଯୋଜନା ରହିଛି। ପ୍ରଥମେ ବ୍ୟାଚ୍ରେ ସ୍କୁଲର ୧୬୦ ସିଟ୍ ପାଇଁ ଶିକ୍ଷାର୍ଥୀ ଆବେଦନ କରିପାରିବେ। ସେଥି ମଧ୍ୟରୁ ୫୬ଟି ସିଟ୍ ଶହୀଦ୍ ପରିବାର ପାଇଁ ସଂରକ୍ଷିତ ରହିବ ବୋଲି କ୍ଷେତ୍ରୀୟ ସଂଯୋଜକ ଅଜୟ ଗୋଏଲ୍ ସୂଚନା ଦେଇଛନ୍ତି।
