ନୂଆଦିଲ୍ଲୀ,୮।୧: ଆମେରିକା ଇରାନ୍ ମଧ୍ୟରେ ଯୁଦ୍ଧ ହେଲେ ଅଶୋଧିତ ତୈଳ ଦାମ ବ୍ୟାରେଲ ପିଛା ବୃଦ୍ଧି ପାଇବାର ସମ୍ଭାବନା ରହିଛି। ଏପରି ହେଲେ ଭାରତରେ ପେଟ୍ରୋଲ ,ଡିଜେଲ ମହଙ୍ଗା ହେବ। ସମ୍ପ୍ରତି ଅନ୍ତର୍ଜାତୀୟ ବଜାରରେ ଅଶୋଧିତ ତୈଳ ଦାମରେ ୩.୫ ପ୍ରତିଶତରୁ ଅଧିକ ବୃଦ୍ଧି ଘଟିଛି। ଇତିମଧ୍ୟରେ ଡବ୍ଲ୍ୟୁଟିଆଇର ଇଣ୍ଡେକ୍ସ୍ରେ ଅଶୋଧିତ ତୈଳ ଦାମ ୪.୫୩ ପ୍ରତିଶତ ବୃଦ୍ଧି ପାଇ ବ୍ୟାରେଲ ପିଛା ଦାମ ୬୫.୫୪ ଡଲାର ହୋଇଛି। ଭାରତ ନିଜର ଘରୋଇ ଚାହିଦା ପୂରଣ ପାଇଁ ୮୦ ପ୍ରତିଶତ ତୈଳ ବିଦେଶରୁ କିଣିଥାଏ। ଆର୍ଥିକ ସଂସ୍ଥା ନୋମୁରା ପକ୍ଷରୁ କୁହାଯାଇଛି ଯେ, ଅଶୋଧିତ ତୈଳ ଦାମ ବ୍ୟାରେଲ ପିଛା ୧୦ ଡଲାର ବୃଦ୍ଧି ପାଇଲେ ଏହା ଯୋଗୁ ଭାରତୀୟ ଅର୍ଥବ୍ୟବସ୍ଥା ପ୍ରଭାବିତ ହେବ। ଇଣ୍ଡିଆନ ଅଏଲ ଓ୍ବେବସାଇଟ୍ ଅନୁସାରେ ଦିଲ୍ଲୀ, କୋଲକାତା, ମୁମ୍ବାଇ ଏବଂ ଚେନ୍ନାଇରେ ବୁଧବାର ପେଟ୍ରୋଲ ଦାମ ଯଥାକ୍ରମେ ୭୫.୭୪ ଟଙ୍କା, ୭୮.୩୩ ଟଙ୍କା, ୮୧.୩୩ ଟଙ୍କା ଏବଂ ୭୮.୬୯ ଟଙ୍କା ରହିଛି। ସେହିପରି ଡିଜେଲ୍ ଦାମ ଏସବୁ ସହରରେ ଯଥାକ୍ରମେ ୬୮.୭୯ ଟଙ୍କା, ୭୧.୧୫ ଟଙ୍କା, ୭୨.୧୪ ଟଙ୍କା ଏବଂ ୭୨.୬୯ ଟଙ୍କା ରହିଛି। ତେବେ ଅନ୍ତର୍ଜାତୀୟ ବଜାରରେ ଅଶୋଧିତ ତୈଳ ଦାମ ବଢ଼ିଲେ ପେଟ୍ରୋଲ ଓ ଡିଜେଲ ଦାମ ବଢ଼ିବାର ସମ୍ଭାବନା ରହିଥିବା କୁହାଯାଉଛି।
