ଶ୍ରୀନଗର,୩୦ା୧୦(ପି.ଟି.) : ୟୁରୋପୀୟ ସଂଘ(ଇୟୁ)ର ୨୩ ଜଣିଆ ପ୍ରତିନିଧି ଦଳ ମଙ୍ଗଳବାର ଜମ୍ମୁ-କଶ୍ମୀର ଗସ୍ତ କରିଥିବାବେଳେ ଆତଙ୍କବାଦୀମାନେ କୁଲଗାମ ଜିଲାରେ ରକ୍ତର ହୋଲି ଖେଳିଛନ୍ତି। ସେମାନେ କତ୍ରାସୁ ଗ୍ରାମରେ ପଶ୍ଚିମବଙ୍ଗର ୬ ଶ୍ରମିକଙ୍କୁ ଗୁଳିକରି ହତ୍ୟା କରିଛନ୍ତି। ସୁରକ୍ଷା ବଳ ସମ୍ପୃକ୍ତ ଅଞ୍ଚଳକୁ ଘେରି ତଲାସି ଅଭିଯାନ ଚଳାଇଛି।
ଇୟୁ ପ୍ରତିନିଧିମାନେ କଶ୍ମୀର ଗସ୍ତ କରି ଉପତ୍ୟକାବାସୀଙ୍କୁ ଅନୁଚ୍ଛେଦ ୩୭୦ ଉଚ୍ଛେଦ ପର ଅନୁଭୂତି ପଚାରି ବୁଝୁଥିବାବେଳେ ଆତଙ୍କବାଦୀ ରକ୍ତମୁଖା ହୋଇଯାଇଛନ୍ତି। କୁଲଗାମ୍ରେ ଆତଙ୍କବାଦୀଙ୍କ ଗୁଳିମାଡ଼ରେ ୬ ଶ୍ରମିକ ଟଳିପଡ଼ିଛନ୍ତି। ସେମାନେ ହେଲେ ପଶ୍ଚିମବଙ୍ଗ ମୁର୍ସିଦାବାଦ ଜିଲାର ଶେଖ୍ କମ୍ରୁଦ୍ଦିନ, ଶେଖ୍ ମହମ୍ମଦ ରଫିକ୍, ଶେଖ୍ ମୁର୍ନସୁଲିନ୍, ଶେଖ୍ ନିଜାମୁଦ୍ଦିନ, ମହମ୍ମଦ ରଫିକ୍ ଶେଖ୍ ଓ ହଜୁର ଉଦ୍ଦିନ। ଏମାନେ ଏଠାରେ ରାଜମିସ୍ତ୍ରି ଓ କାର୍ପେଣ୍ଟର ଭାବେ କାମ କରୁଥିଲେ। ଆତଙ୍କବାଦୀମାନେ ସେମାନଙ୍କୁ ବାହାରକୁ ନେଇ ଗୁଳି କରିଥିଲେ। ଗୁଳିମାଡ଼ରେ ଘଟଣାସ୍ଥଳରେ ୫ ନିହତ ହୋଇଥିବାବେଳେ ହଜୁର ଉଦ୍ଦିନଙ୍କୁ ହସ୍ପିଟାଲକୁ ନେବାବେଳେ ତାଙ୍କର ମୃତ୍ୟୁ ଘଟିଛି। ଆଉ କେତେଜଣ ଶ୍ରମିକ ନିଖୋଜ ଥିବା କୁହାଯାଉଛି।
ଅଗଷ୍ଟ ୫ରେ କେନ୍ଦ୍ର ସରକାର ଅନୁଚ୍ଛେଦ ୩୭୦କୁ ହଟାଇବା ପରଠୁ ଆତଙ୍କବାଦୀମାନେ ବାହାର ରାଜ୍ୟର ଶ୍ରମିକମାନଙ୍କୁ ଟାର୍ଗେଟ କରୁଛନ୍ତି। ଅନନ୍ତନାଗ ଜିଲା ଉଦ୍ଧମପୁରରେ ଆତଙ୍କବାଦୀଙ୍କ ଗୁଳିମାଡ଼ରେ ଜଣେ ଟ୍ରକ୍ ଡ୍ରାଇଭର ନିହତ ହୋଇଥିଲେ। ଅକ୍ଟୋବର ୨୪ରେ ଶୋପିଆନ୍ ଜିଲାରେ ଆତଙ୍କବାଦୀମାନେ ୨ ଜଣ ଅଣକଶ୍ମୀରୀ ଟ୍ରକ୍ ଚାଳକଙ୍କୁ ହତ୍ୟା କରିଥିଲେ। ଗତ ୨୪ ତାରିଖରେ ୨ ଆତଙ୍କବାଦୀ ରାଜସ୍ଥାନ ରେଜିଷ୍ଟ୍ରେଶନ ନମ୍ବର ଥିବା ଏକ ଟ୍ରକ୍ର ଡ୍ରାଇଭରଙ୍କୁ ଗୁଳିକରି ହତ୍ୟା କରିଥିଲେ। ଏହାର ଦୁଇଦିନ ପରେ ପଞ୍ଜାବର ଜଣେ ସେଓ ବ୍ୟବସାୟୀଙ୍କୁ ଶୋପିଆନ୍ ଜିଲାରେ ମରଣାନ୍ତକ ଆକ୍ରମଣ କରିଥିଲେ। ସେହିଦିନ ପୁଲଓ୍ବାମାର ଏକ ଇଟାଭାଟିରେ କାମ କରୁଥିବା ଛତିଶଗଡ଼ର ଜଣେ ଶ୍ରମିକଙ୍କୁ ଆତଙ୍କବାଦୀମାନେ ହତ୍ୟା କରିଥିଲେ।
