ପାରାଦୀପ, ୩।୧ (ସ୍ବ.ପ୍ର.) ପୂର୍ବ କ୍ଷେତ୍ରର ପ୍ରବେଶପଥ କୁହାଯାଉଥିବା ଓଡ଼ିଶାର ଏକମାତ୍ର ସରକାରୀ ବୃହତ୍ ବନ୍ଦର ପାରାଦୀପ ଶୁକ୍ରବାର ପାଳନ କରିବ ପ୍ରତିଷ୍ଠା ଦିବସ। ଏଥିପାଇଁ ବ୍ୟାପକ ପ୍ରସ୍ତୁତି ଶେଷ ହୋଇଛି। ଏହି ଅବସରରେ ପାରାଦୀପ ପୋର୍ଟର ଗୋପବନ୍ଧୁ ଗ୍ରୀଡ୍ ସଂସଦ ପକ୍ଷରୁ ଶୁକ୍ରବାର ସକାଳେ ଏକ ରାଜ୍ୟସ୍ତରୀୟ ହାଫ୍ ମାରାଥନ୍ ଆୟୋଜିତ ହେବ। ପରେ ଆୟୋଜିତ ସଭାରେ ମୁଖ୍ୟ ଶାସନ ସଚିବ ଅସିତ୍ ତ୍ରିପାଠୀ ଯୋଗଦେବାର କାର୍ଯ୍ୟକ୍ରମ ରହିଛି। ଇତିମଧ୍ୟରେ ପାରାଦୀପ ୫୮ ବର୍ଷ ଅତିକ୍ରାନ୍ତ କରି ୫୯ ବର୍ଷରେ ପାଦ ଥାପିଛି। ଅନେକ ସଫଳତାର ଶିଡ଼ି ଚଢ଼ି ଦେଶର ଦ୍ୱିତୀୟ ବୃହତ୍ ବନ୍ଦର ଭାବେ ଖ୍ୟାତି ପାଇଛି। ବର୍ତ୍ତମାନର ପ୍ରଚଳିତ ବ୍ୟବସ୍ଥା ବଜାୟ ରହିଲେ ଆଉ ମାତ୍ର ୩ ବର୍ଷ ମଧ୍ୟରେ ପାରାଦୀପ ବନ୍ଦର ଦେଶର ୧ ନମ୍ବର ସ୍ଥାନକୁ ଉନ୍ନୀତ ହେବ ବୋଲି ବନ୍ଦର ଅଧ୍ୟକ୍ଷ ରିଙ୍କେଶ ରାୟ ଏକାଧିକ ସଭାରେ କହିଛନ୍ତି। ସୂଚନାଥାଉ କି, ୧୯୬୩ ଜାନୁୟାରୀ ୩ ରେ ତତ୍କାଳୀନ ଓଡ଼ିଶା ମୁଖ୍ୟମନ୍ତ୍ରୀ ବିଜୁ ପଟ୍ଟନାୟକଙ୍କ ଉଦ୍ୟମକ୍ରମେ ଏହି ବନ୍ଦରର ଭିତ୍ତିପ୍ରସ୍ତର ପଡ଼ିଥିଲା। ତତ୍କାଳୀନ ପ୍ରଧାନମନ୍ତ୍ରୀ ଜବାହାରଲାଲ ନେହେରୁ ଏହାକୁ ସ୍ଥାପନା ବେଳେ କହିଥିଲେ ଏହା ହିଁ ମହାଜାତିର ନିର୍ଦ୍ଦେଶ। ଯହା ଏବେ ବି ପ୍ରତିଷ୍ଠା ଫଳକରେ ଲିପିବଦ୍ଧ ଅଛି। ସେତେବେଳେ ଓଡ଼ିଶା ସରକାର ନିଜସ୍ବ ଖର୍ଚ୍ଚରେ ବନ୍ଦର କାମ ଆରମ୍ଭ କରିଥିଲେ। ରାଜକୋଷରୁ ୧୬ କୋଟି ଟଙ୍କା ଖର୍ଚ୍ଚ ହେବାରୁ ରାଜ୍ୟ ସରକାର ଦେବାଳିଆ ସ୍ଥିତିକୁ ଚାଲିଗଲେ। ୧୯୬୬ ଏପ୍ରିଲ୍ ୧୮ରେ ପାରାଦୀପ ବନ୍ଦରକୁ କେନ୍ଦ୍ର ସରକାର ନେବା ସହ ବୃହତ୍ ବନ୍ଦର ଘୋଷଣା କରିଥିଲେ। ଓଡ଼ିଶା ସରକାରଙ୍କ ଅଧୀନରେ ଥିବା ବେଳେ ଏହାର ନାମ ଥିଲା ପାରାଦୀପ ପୋର୍ଟ ପ୍ରୋଜେକ୍ଟ। କେନ୍ଦ୍ର ସରକାର ନାମ ବଦଳାଇ ପାରାଦୀପ ପୋର୍ଟ କରିଛନ୍ତି। ବନ୍ଦର ପାଇଁ ରାଜ୍ୟ ସରକାର ୬୮୦୭ ଏକର ଜାଗା ଦେଇଥିଲେ ହେଁ ଅଦ୍ୟାବଧି ତାହା ପାରାଦୀପ ବନ୍ଦରକୁ ବିଧିବଦ୍ଧ ଭାବେ ହସ୍ତାନ୍ତର କରାଯାଇନାହିଁ। ଏକର ପିଛା ୧ ଟଙ୍କା ହିସାବରେ ଓଡ଼ିଶା ସରକାର ରାଜସ୍ବ ପାଉଛନ୍ତି। ଜମି ହସ୍ତାନ୍ତର ପ୍ରକ୍ରିୟା ସମାଧାନ ହୋଇ ନଥିବାରୁ ଅଧିକାଂଶ ସମୟରେ ରାଜ୍ୟ-କେନ୍ଦ୍ର ପ୍ରଶାସନ ମୁହଁାମୁହିଁ ହୋଇଛନ୍ତି।
