ନୂଆଦିଲ୍ଲୀ,୨୭-୫: ଆସନ୍ତା ୩୦ରେ ନରେନ୍ଦ୍ର ମୋଦି ପ୍ରଧାନମନ୍ତ୍ରୀ ଭାବେ ଦ୍ୱିତୀୟଥର ଶପଥଗ୍ରହଣ କରିବାକୁ ଯାଉଛନ୍ତି। ସର୍ପ୍ରାଇଜ ବା ଚକିତ କରିବାରେ ତାଙ୍କର ତୁଳନା ନାହିଁ। ରାଷ୍ଟ୍ରପତି ପ୍ରାର୍ଥୀ ଭାବେ ରାମନାଥ କୋବିନ୍ଦ, ମନ୍ତ୍ରୀ ଭାବେ କେ.ଜେ.ଆଲ୍ଫୋନ୍ସ ଓ ହରଦୀପ ସିଂହ ପୁରୀଙ୍କ ନାମ ସୁପାରିସ କରି ପ୍ରଧାନମନ୍ତ୍ରୀ ମୋଦି ସମସ୍ତଙ୍କୁ ଚମକାଇ ଦେଇଥିଲେ। ତେବେ କୃଷି ମନ୍ତ୍ରୀ ଭାବେ ରାଧାମୋହନ ସିଂ ଏନ୍ଡିଏ ସରକାରରେ ବିଫଳ ହେବା ପରେ ତାଙ୍କ ସ୍ଥାନ କିଏ ନେଇ ସେ ନେଇ ଚର୍ଚ୍ଚା ଜୋର୍ ଧରିଛି। ତେବେ ବିଶିଷ୍ଟ କୃଷି ବିଶେଷଜ୍ଞ ଅଶୋକ ଗୁଲାଟିଙ୍କୁ ଚୟନ କରି ମୋଦି ଏଥର ମଧ୍ୟ ସମସ୍ତଙ୍କୁ ଚମକାଇ ଦେବେ ବୋଲି ମନେ କରାଯାଉଛି। କୃଷି ମନ୍ତ୍ରୀ ଭାବେ ରାଧାମୋହନ ସିଂଙ୍କ କାର୍ଯ୍ୟକାଳ ପ୍ରଭାବହୀନ ହୋଇଥିଲା। ଚାଷୀଙ୍କ ପାଇଁ ସେଭଳି ପଦକ୍ଷେପ ନିଆ ନ ଯିବାରୁ ଭାଜପା ମଧ୍ୟପ୍ରଦେଶ, ରାଜସ୍ଥାନ ଓ ଛତିଶଗଡ଼ରେ କ୍ଷମତାଚ୍ୟୁତ ହୋଇଥିଲା।
ଦେଶବ୍ୟାପୀ ଚାଷୀ ଆନ୍ଦୋଳନ ଯୋଗୁ ଏନ୍ଡିଏ ସରକାର ସମାଲୋଚନାର ସରବ୍ୟ ହୋଇଥିଲେ। ପ୍ରାପ୍ତ ସୂଚନାରୁ ଜଣାପଡିଛି ଯେ, କୃଷି ମନ୍ତ୍ରୀ ଭାବେ ଗୁଲାଟିଙ୍କ ନାମକୁ ନେଇ ମୋଦି ବିଚାର କରୁଛନ୍ତି। କୃଷି ଅର୍ଥନୀତିଜ୍ଞ ଭାବେ ତାଙ୍କର ବେଶ୍ ଖ୍ୟାତି ରହିଛି। ସରକାରଙ୍କ ପକ୍ଷରୁ କୃଷିଜାତ ଫସଲର ମୂଲ୍ୟ ନିର୍ଦ୍ଧାରଣ ତଥା ଖାଦ୍ୟଯୋଗାଣ ବିଷୟ ବୁଝୁଥିବା ଏଗ୍ରିକଲ୍ରାଲ କଷ୍ଟ ଆଣ୍ଡ ପ୍ରାଇସେସ୍ କମିଶନର ସେ ପୂର୍ବତନ ଅଧ୍ୟକ୍ଷ ଭାବେ ଦାୟିତ୍ୱ ତୁଲାଇଥିଲେ। କେନ୍ଦ୍ର ସରକାର ପ୍ରାୟ ୨୩ରୁ ଊର୍ଦ୍ଧ୍ୱ ଖାଦ୍ୟ ସାମଗ୍ରୀର ସର୍ବନିମ୍ନ ସହାୟକ ମୂଲ୍ୟ ବଢ଼ାଇବାରେ ତାଙ୍କର ମୁଖ୍ୟ ଭୂମିକା ଥିଲା। ବର୍ତ୍ତମାନ ଇଣ୍ଡିଆନ କାଉନସିଲ ଫର୍ ରିସର୍ଚ୍ଚ ଅନ୍ ଇଣ୍ଟରନ୍ୟାସନାଲ ଇକୋନୋମିକ ରିଲେସନ୍ସର କୃଷି ସଂକ୍ରାନ୍ତ ଇନ୍ଫୋସିସ୍ ଚେୟାର ପ୍ରଫେସର ଭାବେ ସେ କାର୍ଯ୍ୟ କରୁଛନ୍ତି।
ଏହାଛଡ଼ା ନୀତି ଆୟୋଗ ଅଧୀନରେ ପ୍ରଧାନମନ୍ତ୍ରୀଙ୍କ ଦ୍ୱାରା ଗଠିତ କୃଷି ସଂକ୍ରାନ୍ତ ଟାସ୍କଫୋର୍ସର ସଦସ୍ୟ ତଥା ଏକ୍ସପର୍ଟ ଗ୍ରୁପ୍ ଅନ୍ ଏଗ୍ରିକଲ୍ଚର ମାର୍କେଟ ରିଫମର୍ସର ଅଧ୍ୟକ୍ଷ ଭାବେ ସେ ଦାୟିତ୍ୱ ତୁଲାଉଛନ୍ତି। ଏହାବ୍ୟତୀତ ଏଫ୍ସିଆଇର କାର୍ଯ୍ୟଦକ୍ଷତା ଓ ଆର୍ଥିକ ସ୍ଥିତି ମଜବୁତ କରିବା ଲାଗି ଏନ୍ଡିଏ ସରକାରଙ୍କ ଦ୍ୱାରା ଗଠିତ ଉଚ୍ଚସ୍ତରୀୟ କମିଟିରେ ସେ ସଦସ୍ୟ ରହିଛନ୍ତି। ଶ୍ରୀରାମ କଲେଜ ଅଫ୍ କମର୍ସରୁ ଗ୍ରାଜୁଏଟ୍ ହେବା ପରେ ଦିଲ୍ଲୀ ସ୍କୁଲ୍ ଅଫ୍ ଇକୋନୋମିକ୍ସରୁ ମାଷ୍ଟର୍ସ ଓ ପିଏଚ୍ଡି ହାସଲ କରିସାରିଛନ୍ତି ଅଶୋକ ଗୁଲାଟି। ପୂର୍ବତନ ପ୍ରଧାନମନ୍ତ୍ରୀ ଅଟଳ ବିହାରୀ ବାଜପେୟୀଙ୍କ ଆର୍ଥିକ ପରାମର୍ଶଦାତା ପରିଷଦର ସେ ସର୍ବକନିଷ୍ଠ ସଦସ୍ୟ ଥିଲେ।
