ଭୁବନେଶ୍ୱର,୨-୬: ଅର୍ଥନୀତିକୁ ଚାଲୁ କରିବା ନୂଆ ସରକାରଙ୍କ ପ୍ରାଥମିକତା ହେବା ଆବଶ୍ୟକ। ମାର୍ଚ୍ଚ ତ୍ରୈମାସରେ ଦେଶର ଅର୍ଥନୈତିକ ଅଭିବୃଦ୍ଧି ହାର ୫.୮% ଖସିଛି। ଭାରତ ବିଶ୍ୱର ଦ୍ରୁତ ଅଭିବୃଦ୍ଧିଶୀଳ ରାଷ୍ଟ୍ର ମାନ୍ୟତା ହରାଇଛି। ଏଭଳି ସ୍ଥିତି ଦେଶର ଅଥନୈତିକ କାର୍ଯ୍ୟକଳାପ ବୃଦ୍ଧି ତଥା ଅର୍ଥବ୍ୟବସ୍ଥାକୁ ଗତିଶୀଳ କରାଇବା ଦିଗରେ କେନ୍ଦ୍ରର ଏନ୍ଡିଏ ସରକାର ବିଭିନ୍ନ ପଦକ୍ଷେପ ଅଗ୍ରାଧିକାର ଭିତ୍ତିରେ ନେବା ଉଚିତ ବୋଲି ଦେଶର ଶିଳ୍ପ ଜଗତ ମତ ରଖିଛି। ୨୦୧୮-୧୯ରେ ଜିଡିପି ଅଭିବୃଦ୍ଧି ୬.୮%କୁ ଖସିଛି ଏହା ୨୦୧୭-୧୮ରେ ୭.୨% ରହିଥିଲା। କନଫେଡେରେଶନ ଅଫ ଇଣ୍ଡିଆନ ଇଣ୍ଡଷ୍ଟ୍ରି ପକ୍ଷରୁ ଅନୁଷ୍ଠିତ କାର୍ଯ୍ୟକ୍ରମରେ ପ୍ରମୁଖ ଶିଳ୍ପ ବ୍ୟକ୍ତି ବିଶେଷ ଏଭଳି ମତ ରଖିଛନ୍ତି। ଏନ୍ବିଏଫ୍ସି କ୍ଷେତ୍ରରେ ଅସୁବିଧା ଯୋଗୁ ବର୍ତ୍ତମାନ ଅର୍ଥ ବ୍ୟବସ୍ଥାରେ ନଗଦ ଯୋଗାଣ କମିଛି। ଲୋକମାନେ ସାମଗ୍ରୀ କ୍ରୟକୁ ଏତେଟା ଗୁରୁତ୍ୱ ଦେଉ ନ ଥିବା ଟିଭିଏସ୍ ମୋଟର୍ସ ଅଧ୍ୟକ୍ଷ ବେଣୁ ଶ୍ରୀନିବାସନ କହିଛନ୍ତି।
ଗ୍ରାମାଞ୍ଚଳ ଅର୍ଥନୀତି ସହ ଅର୍ଥବ୍ୟବସ୍ଥାକୁ ଠିକ୍ କରିବା ଦିଗରେ ସରକାର ବିଭିନ୍ନ ପଦକ୍ଷେପ ନେବା ଉପରେ ଟାଟା ଷ୍ଟିଲ ପରିଚାଳନା ନିର୍ଦ୍ଦେଶକ ଟି.ଭି. ନରେନ୍ଦ୍ରନ ଏଥିରେ ମତ ରଖିଛନ୍ତି। ଏଫଏମ୍ସିଜି କାର୍, ଟ୍ରାକ୍ଟର, ଟୁହ୍ବିଲର୍ସ ଭଳି କ୍ଷେତ୍ର ବର୍ତ୍ତମାନ ପ୍ରଭାବିତ ସ୍ଥିତିରେ ରହିଥିବା ବେଳେ କ୍ଷେତ୍ରଗୁଡିକର ଉନ୍ନତି ସରକାରଙ୍କ ଲାଗି ପ୍ରାଥମିକତା ହେବା ଆବଶ୍ୟକ ବୋଲି ପ୍ରଫେସର ଲର୍ଡ ସୁଶାନ୍ତ କୁମାର ଭଟ୍ଟାଚାର୍ଯ୍ୟ କହିଛନ୍ତି। କାର୍ଯ୍ୟକ୍ରମରେ ରତନ ଟାଟା ଅର୍ଥନୀତିର ବିଭିନ୍ନ ଦିଗ ସହ ଶିଳ୍ପାୟନ ନେଇ ରହିଥିବା ତାଙ୍କର ଅଭିଜ୍ଞତା ସମ୍ପର୍କରେ ଗୁରୁତ୍ୱାରୋପ କରିଥିଲେ। କାର୍ଯ୍ୟକ୍ରମରେ ଟାଟା ସନ୍ସ ଗ୍ରୁପ ଅଧ୍ୟକ୍ଷ ଏନ୍.ଚନ୍ଦ୍ରଶେକରନ, ଗୋଦରେଜ ମାନୁଫାକଚରିଂ କମ୍ପାନୀର ଏମ୍ଡି ଜାମସେଦ ଏନ୍. ଗୋଦରେଜ, ହିରୋ ଏଣ୍ଟରପ୍ରାଇଜେସ ଅଧ୍ୟକ୍ଷ ସୁନୀଲ କାନ୍ତ ମୁଞ୍ଜାଲ ପ୍ରମୁଖ ଉପସ୍ଥିତ ଥିଲେ।
