ପ୍ରଶ୍ନ-ଥରେ ଏକ ସୁନ୍ଦର ସ୍ବପ୍ନ ଦେଖୁଥିଲି। ମୋ ମନର ମଉନାବତୀ ସପନରେ ଆସିଲା। ହେଲେ ସେ କିଛି କହିବା ପୂର୍ବରୁ ରାତି ପାହିଗଲା। ଏବେ ମୁଁ କ’ଣ କରିବି ?
-ଦିନେଶ ରାଉତ, ବାଲେଶ୍ୱର
ଉତ୍ତର: ସତରେ, ‘ଅଧା ସପନରେ ପାହିଲା ରାତି, ମଉନେ ବସିଛି ମଉନାବତୀ।’ ବେଳେବେଳେ ପ୍ରେମର ନିଶା କେତେକଙ୍କୁ ଏମିତି ଘାରିଥାଏ ଯେ ସେମାନେ ରଙ୍ଗିନ ସ୍ବପ୍ନରେ ହଜିଯାଇ ଥାଆନ୍ତି। ହେଲେ ସ୍ବପ୍ନ ଆଉ ବାସ୍ତବତା ଭିତରେ ଆକାଶ ପାତାଳ ତଫାତ୍ ରହିଛି। ତେଣୁ ଯଦି ପ୍ରେମର ଅସଲ ମଜା ନେବାକୁ ଚାହୁଁଛନ୍ତି ତେବେ ଏପରି ପ୍ରେମିକାଟିଏ ଚଏସ୍ କରନ୍ତୁ ଯିଏ ଆପଣଙ୍କ ପ୍ରେମରେ ସବୁବେଳେ ଫଗୁଣ ଭରିଦେଉଥିବ। ବାସ୍, ସବୁକଥା ନିଜ ଚଏସ୍ ଉପରେ ହିଁ ନିର୍ଭର କରେ।
ପ୍ରଶ୍ନ-ଜଣେ ଝିଅକୁ ‘ଆଇ ଲଭ୍ ୟୁ’ କହିବାକୁ ଡର ଲାଗେ କାହିଁକି ?
-ତନ୍ମୟ କୁମାର, ସୋନପୁର
ଉତ୍ତର: ମନରେ ସାହସର ଘୋର ଅଭାବ। କାରଣ ଜଣେ ଝିଅକୁ ‘ଆଇ ଲଭ୍ ୟୁ’ କହିବା ସହଜ କଥା ହୋଇପାରେ। ଯଦି ସେପଟୁ ରେଡ୍ ସିଗନାଲ ମିଳିଲା ତେବେ ସେଭଳି ପରିସ୍ଥିତିକୁ ସାମନା କରିବାର ଧୈର୍ଯ୍ୟ ରହିବା ଦରକାର। ପ୍ରେମ ରାସ୍ତା ସବୁବେଳେ ଖସଡା। ଦେଖିଚାହିଁ ପାଦ ନ ପକାଇଲେ କେତେବେଳେ ଯେ ଗୋଡ ଖସିଯିବ ତାହା ନିଜେ ଜାଣିପାରିବେ ନାହିଁ। ତେଣୁ ମନରେ ଦମ୍ଭ ରଖି ପ୍ରେମ କରିବାକୁ ଆଗାନ୍ତୁ।
ପ୍ରଶ୍ନ-ମୋ ସାଙ୍ଗକୁ ଯେଉଁ ଝିଅ ଧୋକା ଦେଇ ଚାଲିଯାଇଥିଲା, ଏବେ ସେ ମୋତେ ପ୍ରେମ ନିବେଦନ କରୁଛି। କ’ଣ କରିବି ଜାଣିପାରୁନାହିଁ।
-ଉତ୍ତମ, ପୁରୀ
ଉତ୍ତର: ସେଭଳି ପ୍ରେମିକାଙ୍କୁ ବିଶ୍ୱାସ କରିବା ଅର୍ଥ ନିଅଁାକୁ ଡାକି ଆଣି ଅଣ୍ଟିରେ ପୂରାଇବା ପରି ହିଁ ହୋଇଥାଏ। ଯିଏ ଥରେ ଜଣକୁ ଧୋକା ଦେଇଛି ସେ ଯେ ଆପଣଙ୍କୁ ସବୁଦିନ ନିଜର କରି ରଖିବ ତାହାର ଗ୍ୟାରେଣ୍ଟି କିଏ ଦେବ ? ତେଣୁ ଯଦି ଆପଣଙ୍କୁ ପାଣିପାଗ ଭଲ ଲାଗୁଛି ଆଉ ସେହି ଝିଅ ଉପରେ ଶତ ପ୍ରତିଶତ ଭରସା ଆସୁଛି ତେବେ ନିଜ ବୁଦ୍ଧି ଖଟାଇ ଆଗେଇ ପାରନ୍ତି। ନ ହେଲେ ଆପଣଙ୍କ ଅବସ୍ଥା ଯେ ଆପଣଙ୍କର ସାଙ୍ଗ ପରି ନ ହେବ ସେ କଥା କିଏ କହିବ ?
ପ୍ରଶ୍ନ-ସୁନ୍ଦରୀ ଝିଅଙ୍କ ପ୍ରେମକୁ ଭରସା ନାହିଁ। ଏକଥା ସତ କି ?
-ଅମର ଦାସ, ରାଉରକେଲା
ଉତ୍ତର: ଏଭଳି ମାନସିକତା ପଛରେ କେତେ ସତ ଅଛି ତାହାକୁ ନେଇ ଯଦି ଆଲୋଚନା କରିବା ତେବେ ତାହା ଶେଷ ହେବ ନାହିଁ। ପ୍ରେମ କରିବା ବେଳେ ରୂପ ରଙ୍ଗ ନୁହେଁ ପ୍ରେମିକାର ମନକୁ ଜିଣିବାକୁ ଚେଷ୍ଟା କରନ୍ତୁ। ଯେଉଁ କଥାକୁ ନେଇ ଆପଣ ଗୋଲକ ଧନ୍ଦାରେ ପଡିଛନ୍ତି ତାକୁ ଯଦି ଧରି ବସିବେ ତେବେ ଆପଣଙ୍କ ପ୍ରେମ ମିଶନ ସେମିତି ଅଧା ବାଟରେ ଅଟକି ଥିବ। ବାସ୍, ପ୍ରେମିକା ସୁନ୍ଦରୀ ହେଉ ଅବା ଅସୁନ୍ଦରୀ, ଯଦି ତା’ ମନ ପାଖରେ ଆପଣଙ୍କ ମନ ବନ୍ଧା ପଡିଗଲା ତେବେ ସେଠାରେ ରୂପ ରଙ୍ଗକୁ ନେଇ ମନରେ ପ୍ରଶ୍ନ ଉଠାଇଲେ ପାଣିପାଗ ବଦଳିଯିବାର ଆଶଙ୍କା ରହିଛି।
