ଇମ୍ଫାଲ,୩।୨: ମଣିପୁରରେ ପ୍ରାୟ ଏକ ବର୍ଷ ଧରି ଚାଲିଥିବା ରାଷ୍ଟ୍ରପତି ଶାସନ ପରେ ନୂଆ ସରକାର ଗଠନର ପ୍ରକ୍ରିୟା ତୀବ୍ର ହୋଇଛି। ଭାରତୀୟ ଜନତା ପାର୍ଟି (ଭାଜପା) ବିଧାୟକ ଦଳର ନେତା ଭାବେ ୟୁମନାମ୍ ଖେମଚାନ୍ଦ ସିଂହଙ୍କୁ ନିର୍ବାଚିତ କରାଯାଇଛି। ଫଳରେ ସେ ମଣିପୁରର ନୂଆ ମୁଖ୍ୟମନ୍ତ୍ରୀ ହେବା ସ୍ପଷ୍ଟ ହୋଇଛି।
ଭାଜପା ମୁଖ୍ୟାଳୟରେ ମଙ୍ଗଳବାର ବିଧାୟକ ଦଳ ବୈଠକ ଅନୁଷ୍ଠିତ ହୋଇଥିଲା। ଦଳର ରାଷ୍ଟ୍ରୀୟ ମହାସଚିବ ତରୁଣ ଚୁଗଙ୍କ ତତ୍ତ୍ୱାବଧାନରେ ତାଙ୍କୁ ନିଯୁକ୍ତ କରାଯାଇଛି। ବୈଠକରେ ଖେମଚାନ୍ଦଙ୍କୁ ନେତା ଚୟନ କରାଯିବା ପରେ ତରୁଣ ଚୁଗ ଓ ଅନ୍ୟ ବରିଷ୍ଠ ନେତାମାନେ ତାଙ୍କୁ ଶୁଭେଚ୍ଛା ଜଣାଇଥିଲେ।
ଖେମଚାନ୍ଦ ସିଂହ ମୈତେଇ ସମ୍ପ୍ରଦାୟର। ସେ ସିଂଜାମେଇ ବିଧାନସଭା ଆସନରୁ ଦୁଇଥର ବିଧାୟକ ନିର୍ବାଚିତ ହୋଇଛନ୍ତି। ସେ ଜଣେ ଇଞ୍ଜିନିୟର ମଧ୍ୟ । ତାଙ୍କର ରାଜନୈତିକ ପ୍ରଭାବ ବହୁତ ଅଧିକ। ପୂର୍ବରୁ ସେ ବିରେନ ସିଂହ ସରକାରରେ ନଗର ପ୍ରଶାସନ, ଗୃହ ନିର୍ମାଣ, ଗ୍ରାମ୍ୟ ବିକାଶ ଓ ଶିକ୍ଷା ବିଭାଗର ମନ୍ତ୍ରୀ ଥିଲେ। ୨୦୧୭ରୁ ୨୦୨୨ ପର୍ଯ୍ୟନ୍ତ ସେ ମଣିପୁର ବିଧାନସଭାର ଅଧ୍ୟକ୍ଷ ଭାବେ ମଧ୍ୟ କାର୍ଯ୍ୟ କରିଥିଲେ। ୨୦୨୨ରେ ସେ ମୁଖ୍ୟମନ୍ତ୍ରୀ ପଦ ପାଇଁ ଦାବିଦାର ଥିଲେ। ତାଙ୍କୁ ଆର୍ଏସ୍ଏସ୍ର ନିକଟତର ବୋଲି ବିବେଚନା କରାଯାଏ।
ନୂଆ ସରକାର ଗଠନର ପ୍ରକ୍ରିୟା ତୀବ୍ର ହୋଇଛି। ରାଷ୍ଟ୍ରପତି ଶାସନ ହଟାଇବାର ପ୍ରସ୍ତୁତି ଚାଲିଛି। ଖେମଚାନ୍ଦଙ୍କୁ ନେତା ଚୟନ କରାଯିବା ପରେ ଏବେ ୪ ଫେବୃଆରୀରେ ନୂଆ ସରକାରର ଶପଥ ଗ୍ରହଣ ହେବାର ସମ୍ଭାବନା ରହିଛି। ଏହା ପରେ ମଣିପୁରର ସମସ୍ତ ବିଧାୟକମାନେ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କୁ ଭେଟିବାକୁ ରାଷ୍ଟ୍ରପତି ଭବନ ଯିବାର ସମ୍ଭାବନା ରହିଛି।
ମଣିପୁରର ରାଜନୈତିକ ସମୀକରଣ:
୬୦ ଆସନ ବିଶିଷ୍ଟ ମଣିପୁରବିଧାନସଭାରେ ଭାଜପାର ୩୭ ଜଣ ବିଧାୟକ ଅଛନ୍ତି। ଏନଡିଏ ସହଯୋଗୀ ଦଳ ଏନପିପିର ୬ ଓ ନାଗା ପିପୁଲ୍ସ ଫ୍ରଣ୍ଟ (ଏନପିଏଫ)ର ୫ ବିଧାୟକ ଅଛନ୍ତି। ମେ ୨୦୨୩ରେ ମୈତେଇ ଓ କୁକି ସମ୍ପ୍ରଦାୟ ମଧ୍ୟରେ ଜାତିଗତ ହିଂସା ହୋଇଥିଲା, ଯେଉଁଥିରୁ ୨୬୦ରୁ ଅଧିକ ଲୋକ ମୃତ୍ୟୁବରଣ କରିଥିଲେ ଏବଂ ହଜାର ହଜାର ଲୋକ ବିସ୍ଥାପିତ ହୋଇଥିଲେ। ୨୦୨୫ ଫେବୃଆରୀ ୯ରେ ବିରେନ ସିଂହ ଇସ୍ତଫା ଦେବା ପରେ ୧୩ ଫେବୃଆରୀରେ ରାଷ୍ଟ୍ରପତି ଶାସନ ଲାଗୁ ହୋଇଥିଲା ଏବଂ ପରେ ଏହାକୁ ଅଗଷ୍ଟ ୨୦୨୫ରେ ଆଉ ୬ ମାସ ପାଇଁ ବଢ଼ାଯାଇଥିଲା। ଏହି ନିଷ୍ପତ୍ତି ମଣିପୁରରେ ଶାନ୍ତି ଓ ସ୍ଥିରତା ପୁନଃସ୍ଥାପନ ପାଇଁ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ଭାବେ ଦେଖାଯାଉଛି।
ଅଧିକ ପଢ଼ନ୍ତୁ…
ରୁଷିଆଠାରୁ ତେଲ କିଣିବ ଭାରତ? ଟ୍ରମ୍ପଙ୍କ ଦାବି ପରେ ଆସିଲା ପୁଟିନ୍ଙ୍କ ପ୍ରତିକ୍ରିୟା! ଜାଣନ୍ତୁ କ’ଣ…
Dharitri – Odisha’s No.1 Odia Daily