ରାଉରକେଲା,୧୬।୩(ସଙ୍ଗୀତା ଜେନା): ବ୍ରାହ୍ମଣୀତରଙ୍ଗ ଥାନା ଅଞ୍ଚଳର ଜଣେ ଯୁବତୀଙ୍କ କିଛି ଫଟୋ ସୋସିଆଲ ମିଡିଆରେ ଭାଇରାଲ ହେବା ପରେ ଯୁବତୀ ଜଣଙ୍କ ଥାନାର ଦ୍ୱାରସ୍ଥ ହୋଇଛନ୍ତି। ଅପରପକ୍ଷେ ଫଟୋ ଭାଇରାଲ କରିଥିବା ଅଭିଯୁକ୍ତ ଫେରାର ଅଛନ୍ତି।
ସୂଚନାନୁଯାୟୀ, ଗତ ବର୍ଷ କଳୁଙ୍ଗା ଅଞ୍ଚଳରେ ଥିବା ଏକ ପାଉଁରୁଟି ଫ୍ୟାକ୍ଟ୍ରିରେ ଉକ୍ତ ଯୁବତୀ ଓ ରାଞ୍ଚତ୍ ଅଞ୍ଚଳର ଯୁବକ କାମ କରୁଥିଲେ। ଯୁବକ ଜଣଙ୍କ ପ୍ରେମ ନିବେଦନ କରିଥିବାବେଳେ ଯୁବତୀ ସ୍ବୀକାର କରି ନ ଥିଲେ। ଫଳରେ ଦୁହିଁଙ୍କ ମଧ୍ୟରେ କଥାବାର୍ତ୍ତା ବନ୍ଦ ହୋଇଯାଇଥିଲା। ପ୍ରାୟ ୧୫ ଦିନ ତଳେ ଉକ୍ତ ଯୁବକ ଯୁବତୀଙ୍କୁ ଫୋନ୍ କରିଥିଲେ। ସାମାନ୍ୟ କଥାବାର୍ତ୍ତା କରିବା ପରେ ଅଭିଯୁକ୍ତ ଯୁବକ ୨୦ ହଜାର ଟଙ୍କା ନ ଦେଲେ ଉଭୟଙ୍କ ଫଟୋଗୁଡ଼ିକ ସୋସିଆଲ ମିଡିଆରେ ଭାଇରାଲ କରିବାକୁ ଧମକ ଦେଇଥିଲେ। ଯୁବତୀ ଜଣଙ୍କ ମନା କରିବାରୁ ଅଭିଯୁକ୍ତ ଫଟୋ ଗୁଡ଼ିକ ଭାଇରାଲ କରିଦେଇଥିଲେ। ଏହା ଜଣାପଡିବା ପରେ ଯୁବତୀ ଥାନାର ଦ୍ୱାରସ୍ଥ ହୋଇଥିଲେ।