ଦେବଗଡ,୧୨।୧୦(ଶଶାଙ୍କ ଶେଖର ଝାଙ୍କର): ଦେବଗଡ ବନଖଣ୍ଡରେ ଜାରି ରହିଛି ହାତୀ-ମଣିଷ ଲଢେଇ । ଏହି କ୍ରମରେ ଶନିବାର ସଂଧ୍ୟାରେ ଦେବଗଡ ବନାଞ୍ଚଳ ଲଇମୁରା ଫରେଷ୍ଟ ସେକ୍ସନ ଅନ୍ତର୍ଗତ ଖୋଲଡିହୀ ଗ୍ରମ ଜଙ୍ଗଲରେ ହାତୀ ଆକ୍ରମଣରେ ଜଣେ ଯୁବକଙ୍କର ମୃତ୍ୟୁ ଘଟିଛି । ମୃତ ଯୁବକ ଜଣକ ଖୋଲଡିହି ଗ୍ରାମର ଟିକିରାମ ଯୁବ ଚାଷୀ ଶୋଭାରାମ ରୋହିଦାଶ(୪୧) ବୋଲି ଜଣାପଡିଛି ।
ଶୋଭାରାମ ଘରୁ ବାହାରି ହାତୀ ଦାଉରୁ ଧାନ ଫସଲକୁୁ ସୁରକ୍ଷାଦେବା ନିମନ୍ତେ ଉର୍ଦ୍ଦିିଷ୍ଟ ମଂଞ୍ଚାକୁ ଯାଉଥିବା ବେଳେ ଖୋଲଡିହୀ ସଂରକ୍ଷିତ ଜଙ୍ଗଲରେ ଜଙ୍ଗଲୀ ହାତୀ ସହିତ ମୁହାଁମୁହିଁ ହୋଇଥିଲେ। ଏହି ସମୟରେ ହାତୀ ତାଙ୍କୁ ତଳେ କଚାଡି ପାଦରେ ଦଳିଦେବାରୁ ଶୋଭାରାମଙ୍କର ଘଟଣା ସ୍ଥଳରେ ମୃତ୍ୟୁ ଘଟିଥିଲା ।
ସୂଚନା ପାଇଁ ବନ ବିଭାଗ ପକ୍ଷରୁ ଲଇମୁରା ସେକ୍ସନର ଫରେଷ୍ଟର ତୁଷାର ରଞ୍ଜନ ପ୍ରଧାନ ବିଭାଗୀୟ କର୍ମଚାରୀ ମାନଙ୍କ ସହିତ ସଦଳବଳେ ଘଟଣା ସ୍ଥଳରେ ପହଞ୍ଚି ଶୋଭାରାମଙ୍କ ମୃତଦେହ ଉଦ୍ଧାର କରିବାସହ ଦେବଗଡ ଜିଲା ମୁଖ୍ୟ ଚିକିତ୍ସାଳୟକୁ ଆଣିଥିଲେ । ସେଠାରେ ଆବଶ୍ୟକ ପ୍ରକ୍ରିୟା ପରେ ମୃତଦେହକୁ ଜିଲା ମୁଖ୍ୟ ଚିକିତ୍ସାଳୟ ମୃତଗାରରେ ସଂରକ୍ଷିତ ରଖାଯାଇଛି । ରବିବାର ବ୍ୟବଚ୍ଛେଦ ପରେ ପରିବାର ଲୋକଙ୍କୁ ମୃତଦେହ ହସ୍ତାନ୍ତର କରାଯିବ ବୋଲି ବନ ବିଭାଗ ପକ୍ଷରୁ ସୂଚନା ମିଳିଛି ।
ସୂଚନାଯୋଗ୍ୟ ଯେ, ଦେବଗଡ ବନଖଣ୍ଡ ଅଂଚଳରେ ଲାଗି ରହିଥିବା ହାତୀ-ମଣିଷ ଲଢେଇ ଗତ କିଛି ଦିନ ହେଲା ଉଗ୍ରରୂପ ଧାରଣ କରିଛି । ଗତ ସେପ୍ଟେମ୍ବର ମାସ ୧୨ ତାରିଖରେ ରିଆମାଳ ବନାଞ୍ଚଳ ଚିରଗୁଣିକୁଦର ଗ୍ରାମରେ ବିଦ୍ୟୁତ ମଣିଷ ଦ୍ୱାରା ଖଞ୍ଜାଯାଇଥିବା ବିଦ୍ୟୁତ ଆଘାତରେ ଏକ ଦନ୍ତାହାତୀର ମୃତ୍ୟୁ ଘଟିଥିଲା । ବନ ବିଭାଗ ପକ୍ଷରୁ ଏ ଘଟଣାର ସମ୍ପୃକ୍ତଞ୍ମାନଙ୍କୁ ଗିରଫ କରାଯାଇଥିବା ବେଳେ ଗତ ୫ ତାରିଖରେ ରିଆମାଳ ବନାଂଚଳ ନୂଆଁଡିହୀ ସେକ୍ସନ ଅନ୍ତର୍ଗତ କଦଳିପାଳ ଗ୍ରାମରେ ହାତୀ ଆକ୍ରମଣରେ ଜଣେ ବୃଦ୍ଧଙ୍କର ମୃତ୍ୟୁ ଘଟିଥିଲା । ଏହାପରେ ଗତ ୮ ତାରିଖରେ ରିଆମାଳ ବନାଞ୍ଚଳ ରେଙ୍ଗାଳବେଡା ଫରେଷ୍ଟ ସେକ୍ସନ ଅନ୍ତର୍ଗତ କାଉଁଶିତଇଳା ଗ୍ରାମରେ ମଣିଷ ଦ୍ୱାରା ଖାଞ୍ଜାଯାଇଥିବା ବିଦ୍ୟୁତ ତାର ସଂସ୍ପର୍ଷରେ ଏକ ଦନ୍ତାହାତୀର ମୃତ୍ୟୁ ଘଟିଥିଲା । ଅନ୍ୟପକ୍ଷରେ ଗତ ଶୁକ୍ରବାର ସକାଳେ ଦେବଗଡ ବନାଞ୍ଚଳ ତିଲେଇବଣି ଫରେଷ୍ଟ ସେକ୍ସନ ଅନ୍ତର୍ଗତ ଜୁଆଳିଭଙ୍ଗା ଗ୍ରାମ ନିକଟସ୍ଥ ପ୍ରଭାଶୁଣି ସଂରକ୍ଷିତ ଜଂଗଲରୁ ଏକ ଗର୍ଭିଣି ହାତୀର ମୃତଦେହ ଉଦ୍ଧାର କରାଯାଇଥିଲା ।