ଚଣ୍ଡିଗଡ,୭ା୯: ପୂର୍ବତନ ଭାରତୀୟ କ୍ରିକେଟର ଯୁବରାଜ ସିଂହଙ୍କ ପିତା ଯୋଗରାଜ ସିଂହ କପିଲ ଦେବଙ୍କ ବିରୁଦ୍ଧରେ ୧୯୯୭ରେ ଉଠିଥିବା ମ୍ୟାଚ ଫିକ୍ସିଂ ଅଭିଯୋଗ ମାମଲା କାହିଁକି ବନ୍ଦ ହେଲା ବୋଲି ପ୍ରଶ୍ନ ଉଠାଇଛନ୍ତି। ଏକ ସାକ୍ଷାତକାରରେ ଯୋଗରାଜ ଦାବି କରିଛନ୍ତି ଯେ ଏହି ମାମଲା ପୁଣି ହେବ ନାହିଁ କାରଣ ଏହା ଅନେକ କିମ୍ବଦନ୍ତୀ ଖେଳାଳିଙ୍କୁ ସମସ୍ୟାରେ ପକାଇବ। ୧୯୯୭ରେ ମନୋଜ ପ୍ରଭାକର ଅଭିଯୋଗ କରିଥିଲେ ଯେ କପିଲ ତାଙ୍କୁ ଖରାପ ପ୍ରଦର୍ଶନ ପାଇଁ ଟଙ୍କା ଅଫର କରିଥିଲେ, କିନ୍ତୁ ସିବିଆଇ ୨୦୦୦ରେ କପିଲଙ୍କୁ ସମସ୍ତ ଅଭିଯୋଗରୁ ମୁକ୍ତ କରିଥିଲା।
ଯୋଗରାଜ ଆହୁରି କହିଛନ୍ତି, “ସୁପ୍ରିମକୋର୍ଟରେ ମ୍ୟାଚ ଫିକ୍ସିଂ ଫାଇଲ କାହିଁକି ବନ୍ଦ ହେଲା? କପିଲ ଦେବ, ମହମ୍ମଦ ଅଜହରୁଦ୍ଦିନ ଓ ଅନ୍ୟ ଖେଳାଳିଙ୍କ ନାମ ଏଥିରେ ଜଡ଼ିତ ଥିଲା।” ସେ ଏମଏସ ଧୋନୀ, କପିଲ ଦେବ ଓ ବିଷନ ସିଂହ ବେଦୀଙ୍କ ଉପରେ ମଧ୍ୟ ଖେଳାଳିଙ୍କ ସହ ଖରାପ ବ୍ୟବହାର ଅଭିଯୋଗ ଆଣିଛନ୍ତି। ଧୋନୀଙ୍କୁ “ଅପରାଧୀ ମନୋଭାବ” ଥିବା ବ୍ୟକ୍ତି ବୋଲି କହି ଯୋଗରାଜ ଗୌତମ ଗମ୍ଭୀର, ବୀରେନ୍ଦ୍ର ସେହବାଗ ଓ ହରଭଜନ ସିଂହଙ୍କ ଅଭିଯୋଗକୁ ସମର୍ଥନ କରିଛନ୍ତି।