ଓ୍ବାଶିଂଟନ୍/ନୂଆଦିଲ୍ଲୀ,୧୧ା୨: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ ନିଜ ଦେଶକୁ ଆମଦାନୀ ହେବାକୁ ଥିବା ଷ୍ଟିଲ୍ ଓ ଆଲୁମିନିୟମ୍ ଉପରେ ୨୫% ଟାରିଫ୍ ଲଗାଇବାକୁ ଧମକ ଦେଇଛନ୍ତି। ସେ ଖୁବ୍ଶୀଘ୍ର ଏନେଇ ଘୋଷଣା କରିପାରନ୍ତି ବୋଲି କୁହାଯାଉଛି। ଟ୍ରମ୍ପ୍ ପ୍ରଶାସନ ତାଙ୍କର ଏହି ସମ୍ଭାବ୍ୟ ଏକ୍ିକ୍ୟୁଟିଭ୍ ଅର୍ଡରକୁ କାର୍ଯ୍ୟକାରୀ କଲେ ଭାରତୀୟ ବଜାରରେ ଷ୍ଟିଲ୍ ଓ ଆଲୁମିନିୟମ୍ ଶିଳ୍ପ ପାଇଁ ଦୁର୍ଦ୍ଦିନ ଆସିପାରେ ବୋଲି ଆଶଙ୍କା କରାଗଲାଣି।
ଟ୍ରମ୍ପ୍ ରବିବାର ଗଣମାଧ୍ୟମକୁ ସୂଚନା ଦେଇ କହିଛନ୍ତି, ସେ ଖୁବ୍ଶୀଘ୍ର ନୂଆ ମେଟାଲ ଟାରିଫ୍ ଘୋଷଣା କରିବେ। ସେହିପରି ମଙ୍ଗଳବାର କିମ୍ବା ବୁଧବାର ଆଉ କେତେକ ଟାରିଫ୍ ଘୋଷଣା କରିବାକୁ ଯାଉଛନ୍ତି, ଯାହାକି ସବୁ ଦେଶ ପାଇଁ ତତ୍କାଳ ଲାଗୁହେବ। ଭାରତ ହେଉଛି ଆମେରିକାକୁ ଅନ୍ୟତମ ବୃହତ୍ ଲୌହ ଓ ଇସ୍ପାତ ସାମଗ୍ରୀ ରପ୍ତାନିକାରୀ ରାଷ୍ଟ୍ର। ଭାରତ ବାର୍ଷିକ ୩ ବିଲିୟନ୍ ଡଲାର ମୂଲ୍ୟର ଏଭଳି ସାମଗ୍ରୀ ଆମେରିକାକୁ ରପ୍ତାନି କରିଥାଏ। ଟ୍ରମ୍ପ୍ ନିଜ ପ୍ରଥମ କାର୍ଯ୍ୟକାଳ ବେଳେ ମଧ୍ୟ ଅନୁରୂପ ଟାରିଫ୍ ଘୋଷଣା କରିଥିଲେ। ଏଥିଯୋଗୁ ଭାରତୀୟ ରପ୍ତାନି ବହୁଳ ଭାବେ ପ୍ରଭାବିତ ହୋଇଥିଲା। ତେଣୁ ତାଙ୍କ ନୂଆ ଟାରିଫ୍ ଭାରତ ପାଇଁ ଅଡ଼ୁଆ ସ୍ଥିତି ଉପୁଜାଇପାରେ ବୋଲି ବଜାର ବିଶେଷଜ୍ଞମାନେ ଆଶଙ୍କା ବ୍ୟକ୍ତ କରିଛନ୍ତି। ଏପରି କି ୟୁରୋପୀୟ ସଂଘ (ଇୟୁ) ସଦସ୍ୟ ରାଷ୍ଟ୍ରଗୁଡ଼ିକୁ ମଧ୍ୟ ଭାରତରୁ ରପ୍ତାନି ବାଧାପ୍ରାପ୍ତ ହୋଇପାରେ ବୋଲି ଅନୁମାନ କରାଯାଉଛି। ଗତ ଡିସେମ୍ବରରେ ବାଣିଜ୍ୟ ବିଭାଗ ସହ ଏକ ବୈଠକରେ ଭାରତର ଇସ୍ପାତ ମନ୍ତ୍ରଣାଳୟ ଦେଶକୁ ଆମଦାନୀ ହେଉଥିବା କେତେକ ନିର୍ଦ୍ଦିଷ୍ଟ ଷ୍ଟିଲ୍ ଉତ୍ପାଦ ଉପରେ ୨୫% ସେଫ୍ଗାର୍ଡ ଡ୍ୟୁଟି ଲଗାଇବାକୁ ପ୍ରସ୍ତାବ ଦେଇଥିଲା।
ଷ୍ଟିଲ୍ ଉତ୍ପାଦନର ରାଜନୀତୀକରଣ ଚାଲିଛି। କେତେକଙ୍କ ମତରେ ଦେଶରେ ଜରୁରୀ ସମୟରେ ସେନାର ଚାହିଦା ପୂରଣ ପାଇଁ ଉଚ୍ଚ ଗୁଣବତ୍ତାଯୁକ୍ତ ଷ୍ଟିଲ୍ ଉତ୍ପାଦନର ଆବଶ୍ୟକତା ରହିଛି। ତେଣୁ ଅନ୍ୟ ଦେଶଗୁଡ଼ିକ ଉପରେ ନିର୍ଭରଶୀଳତା ହ୍ରାସ କରିବାକୁ ପଡ଼ିବ ବୋଲି ସେମାନେ ଯୁକ୍ତି ବାଢ଼ିଛନ୍ତି।