ଗଜପତି,୧୩।୯(ଗିରିଧାରୀ ପରିଛା): ଗଜପତି ଜିଲା ସଦରମହକୁମାର ପାରଳାଖେମୁଣ୍ଡି ସହରରେ ଜଣେ ମହିଳାଙ୍କଠାରୁ ୨୩ ଲକ୍ଷ ଟଙ୍କା ଠକି ନେଇଥିବା ଅଭିଯୋଗ ହୋଇଛି। ଏପରିକି ଟଙ୍କା ଫେରସ୍ତ ମାଗିବାରୁ ମହିଳାଙ୍କୁ ଧମକ ଦେବା ଏବଂ ମାରପିଟ କରିବା ଅଭିଯୋଗରେ ପୋଲିସ ୨ଜଣଙ୍କୁ ଗିରଫ କରି ଶନିବାର କୋର୍ଟ ଚାଲାଣ କରିଛି। ଗିରଫ ଅଭିଯୁକ୍ତମାନେ ହେଲେ ମିତା ଟଙ୍କ ଓରଫ (ମିଲି) ଏବଂ ଦୁର୍ଗା ପ୍ରସାଦ ପଣ୍ଡା ।
ପାରଳାଖେମୁଣ୍ଡି ଆଦର୍ଶ ଥାନା ସୂତ୍ରରୁ ପ୍ରକାଶ ଯେ, ସ୍ଥାନୀୟ ଓଡ଼ିଆ ଭଣ୍ଡାରୀ ସାହିର ସଂଗୀତା ନାୟକ ନାମ୍ନୀ ଜଣେ ମହିଳାଙ୍କ ଅଭିଯୋଗ କ୍ରମେ ପୋଲିସ ତଦନ୍ତ ପରେ ଅଭିଯୁକ୍ତମାନଙ୍କୁ ଗିରଫ କରିଛି। ସୂଚନା ମୁତାବକ, ସଂଗୀତାଙ୍କ ଠାରୁ ଝିଲି ସାହୁ ଓ ତାଙ୍କ ଭଉଣୀ ମିତା ଟଙ୍କ(ମିଲି) ବିଭିନ୍ନ ପ୍ରକାରର ମିଥ୍ୟା ପ୍ରୋଲଭନ ଦେଖାଇ ୨୩ ଲକ୍ଷ ଟଙ୍କା ନେଇଥିଲେ। ହେଲେ ସଂଗୀତା ସେମାନଙ୍କୁ ପଇସା ଫେରସ୍ତ କରିବାକୁ କହୁଥିଲେ ମଧ୍ୟ ଟଙ୍କା ଦେଉ ନ ଥିଲେ ।
ସଂଗୀତା ଶୁକ୍ରବାର ମଧ୍ୟାହ୍ନରେ ମିଲିଙ୍କୁ ପାରଳାଖେମୁଣ୍ଡି ସ୍ଥିତ ଜେଲ ପାଖରେ ଦେଖିଥିଲେ। ସେତିକିବେଳେ ସଂଗୀତା ଟଙ୍କା ଦେବାକୁ ମିଲିଙ୍କୁ କହିଥିଲେ। ସେତିକିବେଳେ ମିଲିଙ୍କ ସହ ଦୁର୍ଗା ପ୍ରସାଦ ପଣ୍ଡା ମଧ୍ୟ ଉପସ୍ଥିତ ଥିଲେ। ଏଥିରେ ସେମାନେ ରାଗିଯାଇ ଅସଭ୍ୟ ଭାଷାରେ ସଂଗୀତାଙ୍କୁ ଗାଳିଗୁଲଜ କରିବା ସହ ତାଙ୍କୁ ଧକ୍କା ଦେଇଥିଲେ। ଫଳରେ ସଂଗୀତା ଆହତ ହୋଇଥିଲେ। ଏପରିକି ସଂଗୀତାଙ୍କୁ ଜୀବନରେ ମାରିଦେବାକୁ ଧମକ ଦେଇଥିଲେ। ଏହି ବିଷୟରେ ସଂଗୀତା ଅନ୍ୟ ଜଣେ ମହିଳାଙ୍କୁ ଫୋନ୍ କରି ଘଟଣା ସଂକ୍ରାନ୍ତରେ ଜଣାଇଥିଲେ।
ଖବର ପାଇ ମହିଳାମାନେ ଘଟଣାସ୍ଥଳରେ ପହଞ୍ଚି ପୋଲିସ ଡାକି ଉଭୟଙ୍କୁ ଧରି ପୋଳିସ ଜିମା ଦେଇଥିଲେ । ଏନେଇ ପାରଳାଖେମୁଣ୍ଡି ଆଦର୍ଶ ଥାନାରେ ଦୁର୍ଗା ପ୍ରସାଦ ପଣ୍ଡା, ମିତା ଟଙ୍କ, ଝିଲି ସାହୁ, ତ୍ରିବେଣୀ ସାହୁ, ସରସ୍ବତୀ ନାୟକ ଉଦୟ ନାଥ ସାହୁ ଓ ଅନ୍ୟମାନଙ୍କ ବରୋଧରେ ଅଭିଯୋଗ ହୋଇଛି। ଅଭିଯୋଗକୁ ଭିତ୍ତି କରି ପାରଳାଖେମୁଣ୍ଡି ଆଦର୍ଶ ଥାନା ପୋଲିସ ଏକ ମାମଲା (ନଂ.୨୫୪/୨୫) ରୁଜୁ କରି ତଦନ୍ତ ଆରମ୍ଭ କରିଥିଲା। ମାମଲାର ତଦନ୍ତ ଏସଆଇ ପ୍ରିୟବ୍ରତ ସ୍ବାଇଁ କରୁଥିବା ଥାନା ଅଧିକାରୀ ପ୍ରଶାନ୍ତ କୁମାର ଭୂପତି ସୂଚନା ଦେଇଛନ୍ତି ।