ନୂଆଦିଲ୍ଲୀ,୨୭।୧୧: ପ୍ରାୟ ୧୨ ବର୍ଷ ଧରି ଘରୋଇ ମାଟିରେ କୌଣସି ଟେଷ୍ଟ ସିରିଜ ହାରି ନ ଥିବା ଟିମ ଇଣ୍ଡିଆ ଗତ ୧୨ ମାସ ମଧ୍ୟରେ ଦ୍ୱିତୀୟ ପରାଜୟ ବରଣ କରିଛି। କେବଳ ପରାଜୟ ନୁହେଁ, ବରଂ କ୍ଲିନ ସୁଇପ। ୨୦୧୨ ରୁ ୨୦୨୪ ମଧ୍ୟରେ ଘରୋଇ ମାଟିରେ ପ୍ରାୟ ପାଞ୍ଚରୁ ଛଅଟି ମ୍ୟାଚ ହାରିଥିବା ଟିମ ଇଣ୍ଡିଆ ଏବେ ୨୦୨୪ରେ ନ୍ୟୁଜିଲାଣ୍ଡ ସିରିଜ ଏବଂ ଦକ୍ଷିଣ ଆଫ୍ରିକା ସିରିଜ ମଧ୍ୟରେ ୭ଟି ମ୍ୟାଚ ମଧ୍ୟରୁ ପାଞ୍ଚଟି ହାରିଛି। ଏହି ସବୁ ଘଟଣା ବର୍ତ୍ତମାନର କୋଚ ଗୌତମ ଗମ୍ଭୀରଙ୍କ କାର୍ଯ୍ୟକାଳ ସମୟରେ ଘଟିଛି। ଫଳସ୍ବରୂପ, ଗମ୍ଭୀରଙ୍କ କୋଚିଂ ଭବିଷ୍ୟତ ଉପରେ ପ୍ରଶ୍ନବାଚୀ ସୃଷ୍ଟି ହୋଇଛି। କେବଳ ଗମ୍ଭୀର ନୁହେଁ, ମୁଖ୍ୟ ଚୟନକର୍ତ୍ତା ଅଜିତ୍ ଅଗରକର ମଧ୍ୟ ସମା ଦାୟୀ। କିନ୍ତୁ ବିସିସିଆଇ ବର୍ତ୍ତମାନ କୌଣସି ପଦକ୍ଷେପ ନେବା ମୁଡ୍ରେ ନାହିଁ।
ଗୋଟିଏ ବର୍ଷରେ ଦୁଇଟି ଟେଷ୍ଟ ସିରିଜ କ୍ଲିନ ସୁଇପ କରିବାର ଅପମାନର ସମ୍ମୁଖୀନ ହେବା ସତ୍ତ୍ୱେ, ଭାରତୀୟ କ୍ରିକେଟ ନିୟନ୍ତ୍ରଣ ବୋର୍ଡ (ବିସିସିଆଇ) କୌଣସି ତ୍ୱରିତ ପଦକ୍ଷେପ ନେବାକୁ ଯୋଜନା କରୁନାହିଁ। ବୋର୍ଡ କୌଣସି ତରବର ପଦକ୍ଷେପ ନେବାକୁ ଚାହୁଁନାହିଁ କାରଣ ସେମାନେ ମଧ୍ୟ ବିଶ୍ୱାସ କରନ୍ତି ଯେ, ଦଳ ଏକ ପରିବର୍ତ୍ତନ ଦେଇ ଗତି କରୁଛି। ବୋର୍ଡ ଏହି ସମୟରେ ଖେଳାଳିମାନଙ୍କ ସମ୍ପର୍କରେ କୌଣସି ପରିବର୍ତ୍ତନ ନିର୍ଦ୍ଦେଶ ଦେବାକୁ ଯୋଜନା କରୁନାହିଁ।
ବୋର୍ଡ ପକ୍ଷରୁ କୁହାଯାଇଛି, ଆମେ ତାଙ୍କ (ଗମ୍ଭୀର) ସମ୍ପର୍କରେ ଏହି ସମୟରେ କୌଣସି ନିଷ୍ପତ୍ତି ନେବୁ ନାହିଁ। କାରଣ ବିଶ୍ୱକପ ପାଖେଇ ଆସୁଛି ଏବଂ ତାଙ୍କର ଚୁକ୍ତିନାମା ୨୦୨୭ ବିଶ୍ୱକପ ପର୍ଯ୍ୟନ୍ତ ଚାଲିବ। ଗମ୍ଭୀରଙ୍କୁ ଜୁଲାଇ ୨୦୨୪ରେ ଟିମ ଇଣ୍ଡିଆର ମୁଖ୍ୟ କୋଚ ନିଯୁକ୍ତ କରାଯାଇଥିଲା ଏବଂ ତାଙ୍କୁ ତିନି ବର୍ଷର କାର୍ଯ୍ୟକାଳ ଦିଆଯାଇଥିଲା, ଯାହା ୨୦୨୭ ବିଶ୍ୱକପ ଶେଷ ପର୍ଯ୍ୟନ୍ତ ରହିବ। ଏହି ପରାଜୟ ପରେ ବିସିସିଆଇ ଅଧିକାରୀମାନେ ଚୟନ କମିଟି ଏବଂ ଟିମ ମ୍ୟାନେଜମେଣ୍ଟ ସହିତ କଥା ହେବେ ଏବଂ ଭବିଷ୍ୟତ ଯୋଜନା ଉପରେ ଆଲୋଚନା କରିବେ।
ଏହା ସ୍ପଷ୍ଟ ଭାବରେ ସୂଚାଇ ଦେଉଛି ଯେ, ୧୨ ମାସ ମଧ୍ୟରେ ଘରୋଇ ପରିବେଶରେ ପାଞ୍ଚଟି ଟେଷ୍ଟ ମ୍ୟାଚ ହାରିବା ସତ୍ତ୍ୱେ, କୋଚ ଗୌତମ ଗମ୍ଭୀରଙ୍କ ପଦବୀ ବର୍ତ୍ତମାନ ବିପଦମୁକ୍ତ। ଖେଳାଳି ଏବଂ ଚୟନକର୍ତ୍ତାଙ୍କ ପଦବୀ ମଧ୍ୟ ସୁରକ୍ଷିତ। ଯେକୌଣସି ପରିସ୍ଥିତିରେ, ଟିମ ଇଣ୍ଡିଆର ପରବର୍ତ୍ତୀ ଟେଷ୍ଟ ସିରିଜ ଅଗଷ୍ଟ ୨୦୨୬ରେ ଅନୁଷ୍ଠିତ ହେବ, ଟିମ୍ ଇଣ୍ଡିଆ ଶ୍ରୀଲଙ୍କା ଗସ୍ତ କରିବ। ଭାରତର ପରବର୍ତ୍ତୀ ଘରୋଇ ଟେଷ୍ଟ ସିରିଜ ୨୦୨୭ରେ ଅନୁଷ୍ଠିତ ହେବ। ଅଷ୍ଟ୍ରେଲିଆ ଦଳ ବର୍ଡର-ଗାଭାସ୍କର ଟ୍ରଫି ପାଇଁ ଗସ୍ତ କରିବ। ତେଣୁ ଗମ୍ଭୀରଙ୍କ ପାଖରେ ଏହି ଫର୍ମାଟ ପାଇଁ ରଣନୀତି ପ୍ରସ୍ତୁତ କରିବା ପାଇଁ ପ୍ରଚୁର ସମୟ ଅଛି।