ମୁମ୍ବାଇ,୭।୨: ଭାରତ ମୁମ୍ବାଇର ୱାଙ୍ଖଡେ କ୍ରିକେଟ ଷ୍ଟାଡିୟମରେ ଆମେରିକା ବିପକ୍ଷରେ T୨୦ ବିଶ୍ୱକପ ଅଭିଯାନ ଆରମ୍ଭ କରିଛି।ପ୍ରଥମ ମ୍ୟାଚ୍ରେ ଭାରତୀୟ ଅଧିନାୟକ ସୂର୍ଯ୍ୟକୁମାର ଯାଦବ ଟସ ହାରିଥିଲେ। ଟସ ହାରିବା ପରେ ସେ ପ୍ଲେଇଂ ଇଲେଭେନ ଘୋଷଣା କରିବା ସମୟରେ ଲକ୍ଷ ଲକ୍ଷ ପ୍ରଶଂସକ ନିରାଶ ହୋଇଥିଲେ। କାରଣ ଦଳର ପ୍ରମୁଖ ବୋଲର ଜସପ୍ରିତ ବୁମ୍ରାହ ଏହି ମ୍ୟାଚ୍ରେ ଖେଳିବେ ନାହିଁ ବୋଲି ସେ କହିଥିଲେ। ବୁମରାହଙ୍କ ସ୍ଥାନରେ ହର୍ଷିତ ରାଣା ଏବଂ ମହମ୍ମଦ ସିରାଜଙ୍କୁ ପ୍ଲେଇଂ ଇଲେଭେନ୍ରେ ଖେଳିବାର ସୁଯୋଗ ଦିଆଯାଇଥିଲା।
ଟସ ହାରିବା ପରେ ସୂର୍ଯ୍ୟ କହିଥିଲେ, “ଆମେ ପ୍ରଥମେ ବ୍ୟାଟିଂ କରିବାକୁ ଚାହୁଁଥିଲୁ। ଏଠାରେ ପାଗ ଭଲ ଅଛି। ମୁଁ ଏଠାରେ ବହୁତ କ୍ରିକେଟ ଖେଳିଛି। ନିଶ୍ଚିତ ଭାବରେ କିଛି ଚାପ ରହିବ। ଆମେ ଗତ କିଛି ବର୍ଷ ଧରି ଯେପରି ଖେଳିଛୁ ସେହିପରି ଖେଳିବାକୁ ଚାହୁଁଛୁ ଏବଂ ସେହି ଗତି ବଜାୟ ରଖିବାକୁ ଚାହୁଁଛୁ। ୱାଶିଂଟନ ସୁନ୍ଦର ଏବଂ ସଞ୍ଜୁ ସାମସନ ଖେଳୁନାହାନ୍ତି। ଜସପ୍ରିତ ବୁମରାହ ଅସୁସ୍ଥ ଅଛନ୍ତି, ତେଣୁ ମହମ୍ମଦ ସିରାଜ ଖେଳୁଛନ୍ତି।’
ମ୍ୟାଚ୍ରେ ଟସ୍ ହାରିବା ପରେ ପ୍ରଥମେ ବ୍ୟାଟିଂ କରିବାକୁ ଓହ୍ଲାଇଥିଲା ଟିମ ଇଣ୍ଡିଆ। ହେଲେ ପାୱାରପ୍ଲେ ଭିତରେ ହିଁ ୪ଟି ଉଇକେଟ ହରାଇ ଦଳ ନିରାଶାଜନକ ଆରମ୍ଭ କରିଥିଲା। ଓପନର ଯୋଡ଼ି ଏବଂ ମଧ୍ୟମ କ୍ରମର ବ୍ୟାଟ୍ସମ୍ୟାନମାନେ ଶୀଘ୍ର ପ୍ୟାଭିଲିୟନ ଫେରିଥିଲେ। ୭୭ ରନ ସ୍କୋରରେ ୬ ଉଇକେଟ ଯିବା ପରେ ଦଳ ଗଭୀର ସଙ୍କଟରେ ପଡ଼ିଥିଲା। ଆମେରିକାର ବୋଲରମାନେ ଅସାଧାରଣ ପ୍ରଦର୍ଶନ କରି ଚାପ ବଢ଼ାଇ ଚାଲିଥିଲେ। ଏହି ସମୟରେ ଏକାକି ଲଢ଼ିଥିଲେ ଅଧିନାୟକ ସୂର୍ଯ୍ୟକୁମାର ଯାଦବ।
ସୂର୍ଯ୍ୟକୁମାର ଧୀରେ ଧୀରେ ବ୍ୟାଟିଂ କରି ଇନିଂସକୁ ସ୍ଥିର କରି ଅର୍ଦ୍ଧଶତକ ପୂରଣ କରିଥିଲେ, ଯେଉଁଥିରେ ୭ଟି ଚୌକା ଏବଂ ୧ଟି ଛକା ଥିଲା। ଶେଷଯାଏ ସେ ଅପରାଜିତ ରହି ୪୯ ବଲରେ ୮୪ ରନ କରିଥିଲେ (୧୦ଟି ଚୌକା ଏବଂ ୪ଟି ଛକା)। ଏହାଦ୍ୱାରା ଭାରତ ୨୦ ଓଭରରେ ୯ ଉଇକେଟ ହରାଇ ୧୬୧ ରନ କରିବାରେ ସଫଳ ହୋଇଥିଲା। ତାଙ୍କ ବ୍ୟତୀତ ଅନ୍ୟ କୌଣସି ବ୍ୟାଟ୍ସମ୍ୟାନ ୩୦ ରନ ମଧ୍ୟ ପାରି ନ ଥିଲେ।
Dharitri – Odisha’s No.1 Odia Daily