ନୂଆଦିଲ୍ଲୀ,୨।୨: ପୂର୍ବତନ ସେନା ମୁଖ୍ୟ ଜେନେରାଲ୍ ଏମ.ଏମ. ନରଭାଣେଙ୍କ ଆତ୍ମଜୀବନୀ ‘ଫୋର୍ ଷ୍ଟାର୍ସ ଅଫ୍ ଡେଷ୍ଟିନି’କୁ ନେଇ ସଂସଦରେ ହଙ୍ଗାମା ଦେଖିବାକୁ ମିଳିଛି। ସୋମବାର ଲୋକସଭାରେ ଶାସକ ଓ ବିରୋଧୀଙ୍କ ମଧ୍ୟରେ ଏହି ପ୍ରସଙ୍ଗରେ ପ୍ରବଳ ହଙ୍ଗାମା ହୋଇଛି। ବିରୋଧୀ ଦଳ ନେତା ରାହୁଲ ଗାନ୍ଧୀ ଏହି ଅପ୍ରକାଶିତ ପୁସ୍ତକର କିଛି ଅଂଶକୁ ସଂସଦରେ ପଢ଼ିବାକୁ ଚେଷ୍ଟା କରିବାରୁ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ ଓ ଗୃହମନ୍ତ୍ରୀ ଅମିତ ଶାହ ଏହାକୁ ଜୋରଦାର ବିରୋଧ କରିଥିଲେ। ଏହି ବିବାଦ ଯୋଗୁ ଗୃହର କାର୍ଯ୍ୟଧାରା ବାଧାପ୍ରାପ୍ତ ହେବା ସହ ଏକାଧିକ ବାର ମୁଲତବୀ ରଖାଯାଇଥିଲା।
ସଂସଦରେ ରାଷ୍ଟ୍ରପତିଙ୍କ ଅଭିଭାଷଣ ଉପରେ ଧନ୍ୟବାଦ ପ୍ରସ୍ତାବ ଆଲୋଚନା ଚାଲିଥିବା ବେଳେ ରାହୁଲ ଗାନ୍ଧୀ ଜେନେରାଲ୍ ନରଭାଣେଙ୍କ ପୁସ୍ତକରୁ ‘ଗଲୱାନ୍’ ଓ ‘ଡୋକଲାମ୍’ ସୀମା ବିବାଦ ପ୍ରସଙ୍ଗରେ କିଛି ତଥ୍ୟ ଉପସ୍ଥାପନ କରିବାକୁ ଚାହିଁଥିଲେ। ସେ ଅଭିଯୋଗ କରିଥିଲେ ଯେ, ସୀମାରେ ଚାଇନା ଟ୍ୟାଙ୍କ ପ୍ରବେଶ କରିବା ସମୟରେ ରାଜନୈତିକ ନେତୃତ୍ୱ ନିଷ୍ପତ୍ତି ନେଇପାରିନଥିଲେ ଏବଂ ସମସ୍ତ ଦାୟିତ୍ୱ ସେନା ଉପରେ ଛାଡ଼ି ଦିଆଯାଇଥିଲା।
ତେବେ ରାଜନାଥ ସିଂହ ଏହାକୁ ବିରୋଧ କରି କହିଥିଲେ ଯେ, ଯେଉଁ ପୁସ୍ତକ ଏପର୍ଯ୍ୟନ୍ତ ପ୍ରକାଶିତ ହୋଇନାହିଁ, ତାହାର ତଥ୍ୟକୁ ସଂସଦରେ ଗ୍ରହଣ କରାଯାଇପାରିବ ନାହିଁ। ଅନ୍ୟପଟେ, ଜେନେରାଲ୍ ନରଭାଣେଙ୍କ ଏହି ପୁସ୍ତକ ଗତ ଦେଢ଼ ବର୍ଷ ହେବ ପ୍ରତିରକ୍ଷା ମନ୍ତ୍ରଣାଳୟର ଅନୁମତି ଅପେକ୍ଷାରେ ରହିଛି। ଏଥିରେ ‘ଅଗ୍ନିପଥ’ ଯୋଜନା ଓ ସୀମା ସୁରକ୍ଷା ଭଳି ସମ୍ବେଦନଶୀଳ ପ୍ରସଙ୍ଗ ଥିବାରୁ ଏହାକୁ ନେଇ ବିତର୍କ ତେଜିଛି। ରାହୁଲ ପ୍ରଶ୍ନ କରିଛନ୍ତି ଯେ, ସେନା ମୁଖ୍ୟଙ୍କ ଅନୁଭୂତିକୁ ନେଇ ସରକାର କାହିଁକି ଭୟଭୀତ ଅଛନ୍ତି?