ଲକ୍ଷ୍ନୌ,୨୨।୧୧: ୩ ବର୍ଷର ପ୍ରେମସମ୍ପର୍କ। ପରିବାର ଲୋକେ ରାଜି ହେବା ପରେ ବିବାହର ଦିନ ସ୍ଥିର ହୋଇଥିଲା। ଆଉ ଦି ଦିନ ପରେ ପଡ଼ିଥିଲା ହାତଗଣ୍ଠି। ହେଲେ ଏହା ପୂର୍ବରୁ ଘଟିଗଲା ଅଘଟଣ। ହଳଦୀ ଉତ୍ସବ ଚାଲିଥିବା ବେଳେ ଉଭୟଙ୍କ ମୃତ୍ୟୁକୁ ବାଛିନେଲେ। ଘର ଭିତରୁ ଝୁଲନ୍ତା ଅବସ୍ଥାରେ ମିଳିଲା ମୃତଦେହ। ଖୁସିର ମୂହୁର୍ତ୍ତ ମଧ୍ୟରେ ଘୋଟି ଆସିଲା ଦୁଃଖର କଳାବାଦଲ। ପୋଲିସକୁ ଖବର ଦିଆଯିବା ପରେ ଉଭୟଙ୍କ ମୃତଦେହ ପୋଷ୍ଟମର୍ଟମ ପାଇଁ ପଠାଯାଇଛି। ଏପରିକି ବର ଘର ଲୋକେ କନ୍ୟା ପକ୍ଷଙ୍କ ଉପରେ ହତ୍ୟାର ଅଭିଯୋଗ ଆଣିଛନ୍ତି। ଏଭଳି ଏକ ଦୁଃଖଦ ଘଟଣା ଉତ୍ତରପ୍ରଦେଶର ସୀତାପୁରରେ ଦେଖିବାକୁ ମିଳିଛି।
ମହମ୍ମୁଦାବାଦ କୋତବାଲୀ ଅଞ୍ଚଳର ଗ୍ରାମ ମିଠୌରାରେ ରହୁଥିବା ଗୁଡ୍ଡୁ(୨୫) ରୁଚିଙ୍କ ପ୍ରେମରେ ପଡ଼ିଥିଲେ। ୩ ବର୍ଷ ଧରି ଦୁହିଁଙ୍କ ସମ୍ପର୍କ ଚାଲିଥିଲା। ଶେଷରେ ବିବାହ ଲାଗି ଦୁହେଁ ପରିବାରଲୋକଙ୍କୁ ରାଜି କରାଇଥିଲେ। ମୁଖ୍ୟମନ୍ତ୍ରୀ ସାମୁହିକ ବିବାହ ଯୋଜନା ଅନୁଯାୟୀ ନଭେମ୍ବର ୨୫ରେ ବିବାହ ହୋଇଥାନ୍ତା। କୌଣସି କାରଣବଶତଃ ବିବାହ ତାରିଖ କାନ୍ସଲ ହେବା ଯୋଗୁ ପରିବାରଲୋକେ ମନ୍ଦିରରେ ବିବାହ କରିବାକୁ ନିର୍ଣ୍ଣୟ ନେଇଥିଲେ।
ହେଲେ ହଳଦୀ ଉତ୍ସବ ଦିନ କବାଟ ଖୋଲିବା ମାତ୍ରେ କନ୍ୟା ଏବଂ ବରଙ୍କ ଝୁଲନ୍ତା ମୃତଦେହ ପରିବାରଲୋକେ ଦେଖିବାକୁ ପାଇଥିଲେ। ଏହାପରେ ବରଙ୍କ ପରିବାର ଯୁବତୀଙ୍କ ଭିଣୋଇଙ୍କ ଉପରେ ସନ୍ଦେହ କରୁଛନ୍ତି। ପୋଷ୍ଟମର୍ଟମ ରିପୋର୍ଟ ଆସିବା ପରେ ସ୍ଥିତି ସ୍ପଷ୍ଟ ହେବ ବୋଲି କୁହାଯାଉଛି। ପୋଲିସ ତଦନ୍ତ ଜାରି ରଖିଛି।