କୋଲକାତା,୨୨।୭: ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ଉପରାଷ୍ଟ୍ରପତି ଜଗଦୀପ ଧନଖରଙ୍କ ଇସ୍ତଫା ଉପରେ ମୁହଁ ଖୋଲିଛନ୍ତି। ସେ କହିଛନ୍ତି, “ଏଥିରେ ମୋର କୌଣସି ମନ୍ତବ୍ୟ ନାହିଁ। ଦେଖାଯାଉ କ’ଣ ହେଉଛି। ସେ ଆହୁରି କହିଛନ୍ତି, “ସେ ଜଣେ ସୁସ୍ଥ ବ୍ୟକ୍ତି। ମୁଁ ଭାବୁଛି ତାଙ୍କ ସ୍ବାସ୍ଥ୍ୟ ସମ୍ପୂର୍ଣ୍ଣ ଠିକ ଅଛି।” ମମତା ବାନାର୍ଜୀଙ୍କ ଏହି ବୟାନ ଏପରି ସମୟରେ ଆସିଛି ଯେତେବେଳେ ବିରୋଧୀ ଦଳଗୁଡ଼ିକ ଉପରାଷ୍ଟ୍ରପତିଙ୍କ ଇସ୍ତଫା ଉପରେ ଲଗାତାର ପ୍ରଶ୍ନ ଉଠାଉଛନ୍ତି ଏବଂ ଏହାକୁ ରାଜନୈତିକ କାରଣ ସହିତ ଜଡିତ ବୋଲି ବିଚାର କରୁଛନ୍ତି।
ମିଡିଆ ସହିତ କଥାବାର୍ତ୍ତା ସମୟରେ ମମତା ବାନାର୍ଜୀ ଜଣେ ରିପୋର୍ଟରଙ୍କ ଉପରେ ବର୍ଷିଥିଲେ। ସେ ରିପୋର୍ଟରଙ୍କୁ ରାଗିଯାଇ କହିଥିଲେ, ଆମେ କ’ଣ କରୁଛୁ ତାହା କହୁନାହଁ, ତୁମେ କେବଳ ଭାଜପା ବିଷୟରେ କଥା ହେଉଛ? ଆମ ବିଷୟରେ କଥା ହେବାର ସାହସ ଅଛି କି? ଜଗଦୀପ ଧନଖରଙ୍କ ଇସ୍ତଫା ପ୍ରଶ୍ନରେ ମମତା କହିଥିଲେ, ତୁମେ ଏହାକୁ କାହିଁକି ଚର୍ଚ୍ଚା କରୁଛ? ଏତେ ଚର୍ଚ୍ଚା ଭିତରେ ଧନଖରଜୀଙ୍କ ଇସ୍ତଫା ପ୍ରଶ୍ନ ପଚାର ନାହିଁ। ସେ ଜଣେ ସୁସ୍ଥ ବ୍ୟକ୍ତି।
ଧନଖର ସୋମବାର ସଂଧ୍ୟାରେ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ନିକଟକୁ ଇସ୍ତଫାପତ୍ର ପଠାଇଥିଲେ। ମୁର୍ମୁଙ୍କୁ ତାଙ୍କ ଇସ୍ତଫାପତ୍ରରେ ଧନଖର କହିଛନ୍ତି ଯେ ସେ “ସ୍ବାସ୍ଥ୍ୟସେବାକୁ ପ୍ରାଥମିକତା ଦେବା” ପାଇଁ ତୁରନ୍ତ ପ୍ରଭାବରୁ ପଦ ଛାଡି ଦେଉଛନ୍ତି। ଧନଖର ରାଷ୍ଟ୍ରପତିଙ୍କୁ ଲେଖିଥିବା ଚିଠିରେ କହିଛନ୍ତି, ‘ସ୍ବାସ୍ଥ୍ୟସେବାକୁ ପ୍ରାଥମିକତା ଦେବା ଏବଂ ଡାକ୍ତରୀ ପରାମର୍ଶ ପାଳନ କରିବା ପାଇଁ, ମୁଁ ସମ୍ବିଧାନର ଧାରା 67 (A) ଅନୁଯାୟୀ, ଭାରତର ଉପରାଷ୍ଟ୍ରପତି ପଦରୁ ତୁରନ୍ତ ପ୍ରଭାବରୁ ଇସ୍ତଫା ଦେଉଛି।
ଜଗଦୀପ ତାଙ୍କର ସ୍ପଷ୍ଟବାଦୀ ମନୋଭାବ ଯୋଗୁଁ ଖବରର ଶିରୋନାମାରେ ରହୁଥିଲେ, କିନ୍ତୁ ସେ ପଶ୍ଚିମବଙ୍ଗର ରାଜ୍ୟପାଳ ଥିବା ସମୟରେ ସବୁଠାରୁ ଅଧିକ ଚର୍ଚ୍ଚାରେ ଥିଲେ। ସେହି ସମୟ ମଧ୍ୟରେ, ତାଙ୍କ ଆଚରଣକୁ ନେଇ ଅନେକ ଥର ତାଙ୍କୁ ବହିଷ୍କାର କରିବାକୁ ଦାବି ହୋଇଥିଲା, ଯାହା ଗତ ବର୍ଷ ଡିସେମ୍ବରରେ ରାଜ୍ୟ ସଭାରେ ବିରୋଧୀ ଦଳ ଦ୍ୱାରା ଆଗତ ମହାଭିଯୋଗ ପ୍ରସ୍ତାବ ପୂର୍ବରୁ ଥିଲା।
ତୃଣମୂଳ କଂଗ୍ରେସ ୨୦୨୦ ମସିହାରେ ହିଁ ତାଙ୍କୁ ବହିଷ୍କାର କରିବାକୁ ଦାବି କରିଥିଲା। ଡିସେମ୍ବର ୨୦୨୦ ରେ, ପାଞ୍ଚ ଜଣ ତୃଣମୂଳ କଂଗ୍ରେସ (ଟିଏମସି) ଏମପି ତତ୍କାଳୀନ ରାଷ୍ଟ୍ରପତି ରାମନାଥ କୋବିନ୍ଦଙ୍କୁ ଏକ ସ୍ମାରକପତ୍ର ପ୍ରଦାନ କରିଥିଲେ, ଯେଉଁଥିରେ ରାଜ୍ୟପାଳ ଜଗଦୀପ ଧନଖରଙ୍କୁ ପଦରୁ ବହିଷ୍କାର କରିବାକୁ ଦାବି କରାଯାଇଥିଲା। ଏମପିମାନେ ତାଙ୍କୁ “ଦିଲ୍ଲୀରେ ବସିଥିବା ରାଜନୈତିକ ପ୍ରଭୁଙ୍କ” ନିର୍ଦ୍ଦେଶରେ କାମ କରୁଥିବା ଏବଂ ରାଜ୍ୟ ସରକାରଙ୍କୁ ଟାର୍ଗେଟ କରି ଏକ ର୍ନିଦ୍ଦିଷ୍ଟ ରାଜନୈତିକ ଏଜେଣ୍ଡା ଅନୁସରଣ କରୁଥିବାର ଅଭିଯୋଗ କରିଥିଲେ।