ନୂଆଦିଲ୍ଲୀ,୨୬।୧: ଶନିବାର, କେନ୍ଦ୍ର ସରକାର ୨୦୨୫ବର୍ଷ ପାଇଁ ପଦ୍ମ ପୁରସ୍କାର ମଧ୍ୟ ଘୋଷଣା କରିଛନ୍ତି। ଏହି ପୁରସ୍କାର ମଧ୍ୟରେ ୭ଟି ପଦ୍ମ ବିଭୂଷଣ, ୧୯ଟି ପଦ୍ମ ଭୂଷଣ ଏବଂ ୧୧୩ଟି ପଦ୍ମଶ୍ରୀ ପୁରସ୍କାର ଅନ୍ତର୍ଭୁକ୍ତ। ପଦ୍ମ ପୁରସ୍କାରରେ ସମ୍ମାନିତ ହୋଇଥିବା ଲୋକଙ୍କୁ କ’ଣ ସୁବିଧା ଦିଆଯାଏ ଜାଣନ୍ତି କି? ଏଥିରେ କିଛି ଟଙ୍କା ମିଳେ କି? ଆସନ୍ତୁ ଜାଣିବା
ଭାରତ ରତ୍ନ ପରେ, ଭାରତର ସର୍ବୋଚ୍ଚ ନାଗରିକ ପୁରସ୍କାର ହେଉଛି ପଦ୍ମ ବିଭୂଷଣ, ପଦ୍ମ ଭୂଷଣ ଏବଂ ପଦ୍ମଶ୍ରୀ। ଏଥିମଧ୍ୟରୁ, ପ୍ରତିବର୍ଷ ସର୍ବାଧିକ ପଦ୍ମଶ୍ରୀ ପୁରସ୍କାର ପ୍ରଦାନ କରାଯାଏ। ଆପଣଙ୍କୁ କହି ରଖୁଛୁ ଯେ ଭାରତ ସରକାର ୧୯୫୪ ମସିହାରେ ପଦ୍ମ ପୁରସ୍କାର ଆରମ୍ଭ କରିଥିଲେ। ୧୯୫୫ ମସିହାରେ ଏହାକୁ ପଦ୍ମଶ୍ରୀ, ପଦ୍ମଭୂଷଣ ଏବଂ ପଦ୍ମ ବିଭୂଷଣ ନାମରେ ନାମିତ କରାଯାଇଥିଲା।
କଳା, ସାହିତ୍ୟ, ଶିକ୍ଷା, କ୍ରୀଡା, ଚିକିତ୍ସା, ସାମାଜିକ କାର୍ଯ୍ୟ, ବିଜ୍ଞାନ, ପ୍ରଯୁକ୍ତିବିଦ୍ୟା, ନାଗରିକ ସେବା, ବ୍ୟବସାୟ ଏବଂ ଶିଳ୍ପ କ୍ଷେତ୍ରରେ ଅସାଧାରଣ କାର୍ଯ୍ୟ କରିଥିବା ବ୍ୟକ୍ତିତ୍ୱଙ୍କୁ ଏହି ସମ୍ମାନ ପ୍ରଦାନ କରାଯାଏ। ଏମାନଙ୍କ ମଧ୍ୟରେ ଡାକ୍ତର ଏବଂ ବୈଜ୍ଞାନିକ ଦୁଇଜଣ ଏପରି ବ୍ୟକ୍ତି ଯାହାଙ୍କୁ ସରକାରୀ ଚାକିରିରେ ଥିବା ସମୟରେ ମଧ୍ୟ ଏହି ସମ୍ମାନ ଦିଆଯାଇପାରିବ।
କହିରଖୁଛୁ ଯେ ରାଷ୍ଟ୍ରପତି ପଦ୍ମ ପୁରସ୍କାରରେ ସମ୍ମାନିତ ବ୍ୟକ୍ତିଙ୍କୁ ଏକ ପ୍ରମାଣପତ୍ର ଏବଂ ପଦକ ଦିଅନ୍ତି। ଟଙ୍କା କଥା କହିବାକୁ ଗଲେ, ପଦ୍ମ ପୁରସ୍କାରରେ ସମ୍ମାନିତ ବ୍ୟକ୍ତିମାନଙ୍କୁ କୌଣସି ପ୍ରକାରର ଆର୍ଥିକ ରାଶି ଦିଆଯାଏ ନାହିଁ। ଏହା କେବଳ ଏକ ସମ୍ମାନ। ପଦ୍ମଶ୍ରୀ, ପଦ୍ମଭୂଷଣ ଏବଂ ପଦ୍ମ ବିଭୂଷଣ – ତିନୋଟି ପୁରସ୍କାର ମଧ୍ୟରୁ କୌଣସିଟିରେ କୌଣସି ଟଙ୍କା ଦିଆଯାଇ ନାହିଁ। ରେଳ କିମ୍ବା ବିମାନ ଭଡ଼ାରେ କୌଣସି ପ୍ରକାରର ରିହାତି କିମ୍ବା ଅନ୍ୟ କୌଣସି ସୁବିଧା ମଧ୍ୟ ଉପଲବ୍ଧ ନାହିଁ।
ସୂଚନା ଅନୁଯାୟୀ, ଏହି ପୁରସ୍କାର ଏପରି ଏକ ଉପାଧି ନୁହେଁ ଯାହାକୁ ସମ୍ମାନିତ ବ୍ୟକ୍ତି ତାଙ୍କ ନାମ ସହିତ ବ୍ୟବହାର କରିପାରିବେ। ଯଦି କେହି ତାଙ୍କ ନାମ ସହିତ ପଦ୍ମ ପୁରସ୍କାର ଉଲ୍ଲେଖ କରନ୍ତି, ତେବେ ସରକାର ତାଙ୍କଠାରୁ ପୁରସ୍କାର ଫେରାଇ ନେଇପାରିବେ।
ଏଥିପାଇଁ ସରକାର ପ୍ରତିବର୍ଷ ଆବେଦନ ମାଗନ୍ତି। ଯେଉଁ ବ୍ୟକ୍ତି ଭାବନ୍ତି ଯେ ସେ ର୍ନିଦ୍ଦିଷ୍ଟ କ୍ଷେତ୍ରରେ ଉତ୍କୃଷ୍ଟ କାମ କରିଛନ୍ତି, ସେ ଆବେଦନ କରିପାରିବେ। ସରକାର ଆବେଦନର ଯାଞ୍ଚ କରନ୍ତି। ସେହି ସମୟରେ, ଯେକୌଣସି ବ୍ୟକ୍ତି, ସଂଗଠନ, ଏମପି, ବିଧାୟକ, ମନ୍ତ୍ରୀ ମଧ୍ୟ କାହାର ନାମ ସୁପାରିଶ କରିପାରିବେ। ତଥାପି, ଏ ବିଷୟରେ ଚୂଡ଼ାନ୍ତ ନିଷ୍ପତ୍ତି ଭାରତ ସରକାରଙ୍କ ଦ୍ୱାରା ଗଠିତ କମିଟି ନେବ।