ନୂଆଦିଲ୍ଲୀ,୧ା୧(ପି.ଟି): ଭାରତୀୟ ରେସ୍ଲିଂ ମହାସଂଘ(ଡବ୍ଲ୍ୟୁଏଫ୍ଆଇ) ସଭାପତି ସଞ୍ଜୟ ସିଂ ଜାତୀୟ ଟୁର୍ନାମେଣ୍ଟ ଆୟୋଜନ କରିବା ନେଇ ଦୃଢୋକ୍ତି ପ୍ରକାଶ କରିଛନ୍ତି। ଏଭଳି ନିଷ୍ପତ୍ତି ଫଳରେ ଡବ୍ଲ୍ୟୁଏଫ୍ଆଇର ଭବିଷ୍ୟତ ବର୍ତ୍ତମାନ ସଙ୍କଟ ମଧ୍ୟରେ ନଜର ଆସିଛି। ସେ କ୍ରୀଡା ମନ୍ତ୍ରାଳୟ ଓ ଆଡ୍ ହକ୍ ପ୍ୟାନେଲକୁ ମାନୁ ନାହାନ୍ତି ବୋଲି ସୋମବାର କହିବା ସହିତ ଜାତୀୟ ଚାମ୍ପିୟନଶିପ୍ ଆୟୋଜନ କରିବେ ବୋଲି କହିଛନ୍ତି। ଏହା ସହ କ୍ରୀଡା ମନ୍ତ୍ରାଳୟ ପକ୍ଷରୁ ଲାଗୁ କରାଯାଇଥିବା ବାସନ୍ଦାଦେଶକୁ ମଧ୍ୟ ସେ ମାନୁ ନ ଥିବା କହିଛନ୍ତି।
ଦୀର୍ଘ ଦିନର ବିବାଦ ପରେ ଡିସେମ୍ବର ୨୧ ତାରିଖରେ ଡବ୍ଲ୍ୟୁଏଫ୍ଆଇ ନିର୍ବାଚନ ହୋଇଥିଲା। ସଭାପତି ନିର୍ବାଚିତ ହେବା ଦିନ ହିଁ ସଞ୍ଜୟ ସିଂ ୧୫ ଓ ୨୦ ବର୍ଷରୁ କମ୍ ଜାତୀୟ ଟୁର୍ନାମେଣ୍ଟ ପାଇଁ ଘୋଷଣା କରିଥିଲେ। ବର୍ଷ ଶେଷ ହେବା ପୂର୍ବରୁ ଗୋଣ୍ଡାସ୍ଥିତ ନନ୍ଦିନୀ ନଗରରେ ଏହି ଟୁର୍ନାମେଣ୍ଟ ପାଇଁ ଏଭଳି ତରବରିଆ ନିଷ୍ପତ୍ତିକୁ ବିରୋଧ କରାଯାଇଥିଲା। ଡବ୍ଲ୍ୟୁଏଫ୍ଆଇ ସମ୍ବିଧାନର ଅନୁଚ୍ଛେଦ-୩ ଅନୁସାରେ ଜାତୀୟ ସିନିୟର, ଜୁନିୟର, ସବ୍ଜୁନିୟର ଟୁର୍ନାମେଣ୍ଟ ଆୟୋଜନ ସମ୍ପର୍କିତ ନିଷ୍ପତ୍ତି କେବଳ କାର୍ଯ୍ୟକାରୀ କମିଟି ଗ୍ରହଣ କରିଥାଏ। ଏହାକୁ ଉଲ୍ଲଂଘନ କରି ସଞ୍ଜୟ ନିଜେ ଟୁର୍ନାମେଣ୍ଟ ସମ୍ପର୍କରେ ଘୋଷଣା କରିଥିଲେ।
ସେହିପରି ଅନୂ୍ୟନ ୧୫ ଦିନ ପୂର୍ବରୁ କାର୍ଯ୍ୟକାରୀ କମିଟିର ବୈଠକରେ ଏହା ପାରିତ ହୋଇଥାଏ। ଜରୁରିକାଳୀନ ପରିସ୍ଥିତି ରହିଥିଲେ ସର୍ବନିମ୍ନ ୭ ଦିନ ପୂର୍ବରୁ ଏହି ନିଷ୍ପତ୍ତିକୁ ପାରିତ କରାଯାଏ। ଉପସ୍ଥିତ ସଦସ୍ୟଙ୍କ ମଧ୍ୟରୁ ଏକ ତୃତୀୟାଂଶ ସମର୍ଥନ ମିଳିବା ପରେ ହିଁ ଏହା ପାରିତ ହୋଇଥାଏ। ସଞ୍ଜୟ ସିଂ ଏକପାଖିଆ ଭାବରେ ଏଭଳି ନିଷ୍ପତ୍ତି ନେଇ ନିଜ ପଦ ମର୍ଯ୍ୟାଦାର ଗରିମା କ୍ଷୁଣ୍ଣ କରିଥିବାରୁ କ୍ରୀଡ଼ା ମନ୍ତ୍ରଣାଳୟ ପକ୍ଷରୁ ତାଙ୍କୁ ଡିସେମ୍ବର ୨୪ ତାରିଖରେ ନିଲମ୍ବନ କରାଯାଇଥିଲା।
ପରେ କ୍ରୀଡା ମନ୍ତ୍ରାଳୟର ଅନୁରୋଧ କ୍ରମେ ଭାରତୀୟ ଅଲିମ୍ପିକ୍ସ ମହାସଂଘ(ଆଇଓଏ) ପକ୍ଷରୁ ଏକ ୩ ଜଣିଆ ଆଡ ହକ୍ କମିଟି ଗଠନ କରାଯାଇଥିଲା। ଭୂପିନ୍ଦର ସିଂ ବାଜଓ୍ବାଙ୍କ ସମେତ ହକି ଅଲିମ୍ପିଆନ୍ ଏମ୍ ଏମ୍ ସୋମାୟା ଓ ଓ ମଞ୍ଜୁଷା କଓ୍ବଁର ଏହି ପ୍ୟାନେଲର ସଦସ୍ୟ ରହିଥିଲେ। ଆଡ୍ ହକ୍ ପ୍ୟାନେଲ ଫେବୃୟାରୀ ୨-୫ ମଧ୍ୟରେ କେବଳ ଜାତୀୟ ଚାମ୍ପିୟନଶିପ୍ ଆୟୋଜନ କରିବା ନେଇ ମଧ୍ୟ ଘୋଷଣା କରିଥିଲା।
ତେବେ ଏହି ପ୍ୟାନେଲକୁ କାର୍ଯ୍ୟଭାର ହସ୍ତାନ୍ତର କରିବେ ନାହିଁ ବୋଲି ସଞ୍ଜୟ ସିଂ ସୋମବାର ଘୋଷଣା କରିଛନ୍ତି। ଆମେ ନିର୍ବାଚିତ ହୋଇ ଆସିଛୁ। ଏପରିକି ରିଟର୍ଣ୍ଣିଂ ଅଫିସର ସମସ୍ତ କାଗଜ ପତ୍ର ସ୍ବାକ୍ଷର କରିଛନ୍ତି। ଆମ ଫେଡେରେଶନ କାର୍ଯ୍ୟ ସୁରଖୁରୁରେ ଚାଲିଥିବା ବେଳେ କୌଣସି ପ୍ୟାନେଲକୁ ଆମେ ଗ୍ରହଣ କରିବୁ ନାହିଁ। ଖୁବ୍ ଶୀଘ୍ର ଆମେ କାର୍ଯ୍ୟନିର୍ବାହୀ ପରିଷଦର ବୈଠକ ଡକାଯାଇଥିବା ବେଳେ ଆମେ ଆଗୁଆ ଜାତୀୟ ଟୁର୍ନାମେଣ୍ଟ ଆୟୋଜନ କରିବୁ। କ୍ରୀଡା ମନ୍ତ୍ରାଳୟର ବାସନ୍ଦାଦେଶ ଉପରେ ଆମେ ଜବାବ ରଖି ସାରିଛୁ। ଏହା ଉପରେ ସେମାନଙ୍କ ଉତ୍ତର ଏଯାଏ ମିଳି ପାରି ନାହିଁ। ଯଦି କ୍ରୀଡା ମନ୍ତ୍ରାଳୟ ଆମକୁ ଉତ୍ତର ଦେବା ଯଥାର୍ଥ ମନେ କରୁନି ତେବେ ଆମ ମହସଂଘ ମଧ୍ୟ ଏହି ବାସନ୍ଦାଦେଶକୁ ମାନିବ ନାହିଁ ବୋଲି କହିଛନ୍ତି ସଞ୍ଜୟ।