ଦୁବାଇ,୯।୯: ଏସିଆ କପ୍ ୨୦୨୫ ଆରମ୍ଭ ପୂର୍ବରୁ ମଙ୍ଗଳବାର ଭାରତ, ପାକିସ୍ତାନ, ଆଫଗାନିସ୍ତାନ, ବାଂଲାଦେଶ, ଶ୍ରୀଲଙ୍କା ଓ ଅନ୍ୟ ତିନୋଟି ଦଳର ଅଧିନାୟକମାନେ ଏକ ମିଳିତ ସାମ୍ବାଦିକ ସମ୍ମିଳନୀରେ ଅଂଶଗ୍ରହଣ କରିଥିଲେ। ସାମ୍ବାଦିକମାନେ ଭାରତ ଅଧିନାୟକ ସୂର୍ଯ୍ୟକୁମାର ଯାଦବ ଓ ପାକିସ୍ତାନ ଅଧିନାୟକ ସଲମାନ ଆଲୀ ଆଘାଙ୍କୁ ଦୁଇ ଦଳର ପ୍ରତିଦ୍ୱନ୍ଦ୍ୱିତା ଓ ଭାରତର ଫେଭରିଟ୍ ତକମା ନେଇ ଅନେକ ପ୍ରଶ୍ନ ପଚାରିଥିଲେ। କିନ୍ତୁ ସମ୍ମିଳନୀ ଶେଷରେ ଘଟିଥିବା ଏକ ଘଟଣା ଟୁର୍ଣ୍ଣାମେଣ୍ଟର ମାହୋଲ ସେଟ୍ କରିଛି।
ସାମ୍ବାଦିକ ସମ୍ମିଳନୀ ଶେଷ ହେବା ପରେ ପାକିସ୍ତାନ ଅଧିନାୟକ ସଲମାନ ଆଲୀ ଆଘା ପରମ୍ପରା ଅନୁଯାୟୀ ହାତ ମିଳାଇବା କିମ୍ବା ଆଲିଙ୍ଗନ ନ କରି ସିଧାସଳଖ ମଞ୍ଚରୁ ପ୍ରସ୍ଥାନ କରିଥିଲେ। ଲାଇଭ୍-ଷ୍ଟ୍ରିମ୍ ହେଉଥିବା ଏହି ଘଟଣାରେ ସଲମାନଙ୍କୁ ପ୍ରଶ୍ନୋତ୍ତର ପରେ ତୁରନ୍ତ ପ୍ରସ୍ଥାନ ଦ୍ୱାର ଆଡ଼କୁ ଯାଉଥିବା ଦେଖାଯାଇଥିଲା। ଅନ୍ୟପକ୍ଷରେ, ଭାରତୀୟ ଅଧିନାୟକ ସୂର୍ଯ୍ୟକୁମାର ଯାଦବ ଆଫଗାନିସ୍ତାନର ରଶିଦ ଖାନଙ୍କ ସମେତ ଅନ୍ୟ ଅଧିନାୟକମାନଙ୍କ ସହ ମଞ୍ଚରେ ହାତ ମିଳାଇଥିଲେ ଓ ଆଲିଙ୍ଗନ କରିଥିଲେ। ପରେ ଆଉ ଏକ ଭିଡିଓ ସାମ୍ନାକୁ ଆସିଥିଲା, ଯେଉଁଥିରେ ଦେଖାଯାଇଛି ଯେ ସଲମାନ ପ୍ରସ୍ଥାନ କରିବା ପୂର୍ବରୁ ଅନ୍ୟ ଅଧିନାୟକମାନଙ୍କ ସହ ହାତ ମିଳାଇଥିଲେ। ଏହି ଭିଡିଓରେ ସଲମାନ ଓ ସୂର୍ଯ୍ୟକୁମାର ମୁହାଁମୁହିଁ ହୋଇ ହାତ ମିଳାଉଥିବା ଦୃଶ୍ୟ ରେକର୍ଡ ହୋଇଛି।
ପାକିସ୍ତାନ ବିପକ୍ଷରେ ଆକ୍ରମଣାତ୍ମକତା ନିୟନ୍ତ୍ରଣ ନେଇ ସୂର୍ଯ୍ୟକୁମାରଙ୍କ ମନ୍ତବ୍ୟସାମ୍ବାଦିକ ସମ୍ମିଳନୀରେ ସୂର୍ଯ୍ୟକୁମାରଙ୍କୁ ପାକିସ୍ତାନ ବିପକ୍ଷ ମ୍ୟାଚରେ ଖେଳାଳିମାନଙ୍କ ଆକ୍ରମଣାତ୍ମକତା ନିୟନ୍ତ୍ରଣ ନେଇ ପ୍ରଶ୍ନ କରାଯାଇଥିଲା। ୩୪ ବର୍ଷୀୟ ଏହି ଅଧିନାୟକ କହିଥିଲେ, “ମୈଦାନରେ ଆକ୍ରମଣାତ୍ମକତା ସବୁବେଳେ ଆବଶ୍ୟକ, କାରଣ ଜିତିବା ପାଇଁ ଏହା ଅତ୍ୟନ୍ତ ଜରୁରୀ।” ସେହି ପ୍ରଶ୍ନର ଉତ୍ତରରେ ପାକିସ୍ତାନ ଅଧିନାୟକ ସଲମାନ କହିଥିଲେ, “ଯଦି କେହି ଆକ୍ରମଣାତ୍ମକ ହେବାକୁ ଚାହେଁ, ତାହା ତାଙ୍କ ନିଜର ନିଷ୍ପତ୍ତି। ମୁଁ କାହାକୁ କୌଣସି ନିର୍ଦ୍ଦେଶ ଦିଏ ନାହିଁ।”
ସୂର୍ଯ୍ୟକୁମାର ଆହୁରି କହିଥିଲେ ଯେ ତାଙ୍କ ଦଳ ବିସ୍ତୃତ ଅଭ୍ୟାସ ପରେ ମାନସିକ ଭାବେ ଭଲ ଅବସ୍ଥାରେ ଅଛି। “ଆମେ କିଛି ଅଭ୍ୟାସ ସେସନ୍ କରିଛୁ। ଭଲ ଲାଗୁଛି। ଏସିଆ କପ୍ରେ ଶ୍ରେଷ୍ଠ ଦଳମାନଙ୍କ ସହ ଖେଳିବା ଏକ ଭଲ ଚ୍ୟାଲେଞ୍ଜ ହେବ,” ସେ କହିଥିଲେ।ଭାରତ ବୁଧବାର ଦିନ ଗ୍ରୁପ୍ ଏ ଅଧୀନରେ ନିଜର ପ୍ରଥମ ମ୍ୟାଚ୍ ୟୁଏଇ ବିପକ୍ଷରେ ଖେଳିବ, ଏବଂ ରବିବାର ଦିନ ପାକିସ୍ତାନ ବିପକ୍ଷରେ ମୁହାଁମୁହିଁ ହେବ।