ଓ୍ବାଶିଂଟନ,୭ା୧୧: ୭୭ ବର୍ଷୀୟ ଡେମୋକ୍ରାଟ୍ ଜୋ ବାଇଡେନ୍ ଏବେ ହ୍ବାଇଟ୍ ହାଉସ୍ଠାରୁ ମାତ୍ର ଗୋଟିଏ ପାଦ ଦୂରରେ ଅଛନ୍ତି। ଆରିଜୋନା ଓ ଜର୍ଜିଆ ଭଳି ବ୍ୟାଟଲଗ୍ରାଉଣ୍ଡ ଷ୍ଟେଟ୍ରେ ଭୋଟ ଗଣତି ଚୂଡ଼ାନ୍ତ ପର୍ଯ୍ୟାୟରେ ପହଞ୍ଚତ୍ଥିବାବେଳେ ରିପବ୍ଳିକାନ୍ ଡୋନାଲ୍ଡ ଟ୍ରମ୍ପ୍ ବହୁ ପଛରେ ଚାଲିଛନ୍ତି। ଇତିମଧ୍ୟରେ ଟ୍ରମ୍ପ୍ ଏହି ଜନାଦେଶକୁ ଗ୍ରହଣ କରିବାକୁ ଅସ୍ବୀକାର କରିଛନ୍ତି। ଏହାସହ ସେ ବାଇଡେନ୍ଙ୍କ ବିରୋଧରେ ଭୋଟ ଜାଲିଆତି ଅଭିଯୋଗ ଆଣି ଆମେରିକାର ସର୍ବୋଚ୍ଚ ଅଦାଲତଙ୍କ ଦ୍ୱାରସ୍ଥ ହେବେ ବୋଲି ଚେତାବନୀ ଦୋହରାଇଛନ୍ତି। ଏଭଳି ସମୟରେ ଆମେରିକା ରାଷ୍ଟ୍ରପତି ନିର୍ବାଚନର ବହୁ ପ୍ରତୀକ୍ଷିତ ଅନ୍ତିମ ପରିଣାମ କାହା ସପକ୍ଷରେ ଯାଉଛି ତା’ ଉପରେ ବିଶ୍ୱ ସମୁଦାୟର ନଜର କେନ୍ଦ୍ରୀଭୂତ ହୋଇଛି।
ଉପରାଷ୍ଟ୍ରପତି ତଥା ଡେମୋକ୍ରାଟ୍ ବାଇଡେନ୍ ଚଳିତ ନିର୍ବାଚନରେ କେବଳ ଡେମୋକ୍ରାଟିକ୍ ପାର୍ଟିର ଗଡ଼ଗୁଡ଼ିକୁ ଦଖଲ କରିଛନ୍ତି ତାହା ନୁହେଁ, ସେ ଆରିଜୋନା ଭଳି ରିପବ୍ଲିକାନ୍ ଦୁର୍ଗକୁ ମଧ୍ୟ ଭେଦ କରିବାରେ ସକ୍ଷମ ହୋଇଛନ୍ତି। ମିଶିଗାନ ଓ ଓ୍ବିସ୍କୋନସିନ ପରି ବ୍ୟାଟେଲଗ୍ରାଉଣ୍ଡ ଷ୍ଟେଟ୍ରେ ନିର୍ଣ୍ଣାୟକ ଯୁଦ୍ଧ ଜିତିବା ପରେ ବାଇଡେନ୍ ୨୭୦ ଇଲେକ୍ଟୋରାଲ କଲେଜ ଭୋଟ ହାତେଇବା ଅପେକ୍ଷାରେ ଅଛନ୍ତି। ଜର୍ଜିଆ ଓ ପେନ୍ସିଲଭାନିଆରେ ଟ୍ରମ୍ପ୍ଙ୍କୁ ପଛରେ ପକାଇ ଧାଉଁଥିବା ବାଇଡେନ୍ ଏହି ଦୁଇ ଗୁରୁତ୍ୱପୂର୍ଣ୍ଣ ରାଜ୍ୟରେ ନିର୍ବାଚନ ଜିଣିବା ନେଇ ଆଶାବାଦୀ। ଟ୍ରମ୍ପ୍ଙ୍କ ହାତରେ ବର୍ତ୍ତମାନ କେବଳ ଆଇନଗତ ବିକଳ୍ପ ରହିଥିବାରୁ ସେ ବାରମ୍ବାର କୋର୍ଟ ଭୟ ଦେଖାଉଛନ୍ତି। ଇତିମଧ୍ୟରେ ଜର୍ଜିଆ ଓ ମିଶିଗାନରେ ରାଷ୍ଟ୍ରପତି ଟ୍ରମ୍ପ୍ଙ୍କ ପକ୍ଷରୁ ଦାଏର ଲ’ସୁଟ୍ ଖାରଜ ହୋଇଯାଇଛି। ନିର୍ବାଚନୀ ପ୍ରକ୍ରିୟାକୁ ହତ୍ୟା କରାଯାଇଥିବା ଅଭିଯୋଗ ଆଣି ରିପବ୍ଲିକାନ୍ ସମର୍ଥକମାନେ ରାସ୍ତାକୁ ଓହ୍ଲାଇଛନ୍ତି। ଅନ୍ୟପକ୍ଷେ ବାଇଡେନ୍ ଡେମୋକ୍ରାଟ୍ ଭାବେ ସର୍ବାଧିକ ୭୨ ନିୟୁତରୁ ଊର୍ଦ୍ଧ୍ୱ ଭୋଟ ପାଇ ଆମେରିକା ଇତିହାସରେ ରେକର୍ଡ ସୃଷ୍ଟି କରିଛନ୍ତି।
ଜର୍ଜିଆରେ ୧୬ ଇଲେକ୍ଟୋରାଲ କଲେଜ ଭୋଟ ଥିବାବେଳେ ପେନ୍ସିଲଭାନିଆରେ ୨୦ ଓ ନର୍ଥ କାରୋଲିନାରେ ୧୫ ରହିଛି। ତେଣୁ ଏହି ୩ ରାଜ୍ୟରେ ଜାରି ଭୋଟ ଗଣତି ଉପରେ ସମସ୍ତଙ୍କ ନଜର ରହିଛି। ରାଷ୍ଟ୍ରପତିଙ୍କୁ ତାଙ୍କ ଗଡ଼ରେ ପରାସ୍ତ କରି ହ୍ବାଇଟ୍ ହାଉସ୍ ଦଖଲ କରିବାକୁ ଆଉ ପାଦେ ବାକିଥିବାରୁ ବାଇଡେନ୍ଙ୍କ ସପକ୍ଷରେ ଖୁବ୍ଶୀଘ ଶୁଭଫଳ ଆସିପାରେ।
ଜିତାଇବ ଜର୍ଜିଆ
୧୯୯୨ ମସିହାରେ ଡେମୋକ୍ରାଟିକ୍ ପାର୍ଟିର ବିଲ୍ କ୍ଲିଣ୍ଟନ ଜର୍ଜିଆ ବିଜୟ ସହ ଆମେରିକାର ୪୨ତମ ରାଷ୍ଟ୍ରପତି ହୋଇଥିଲେ। ଏହା ପରେ ଦୀର୍ଘ ୨୮ ବର୍ଷ ଧରି ଏହି ଦକ୍ଷିଣପୂର୍ବ ରାଜ୍ୟ ରିପବ୍ଲିକାନ୍ ଦୁର୍ଗ ଭାବେ ରହିଆସିଛି। ଏବେ ପୁଣି ଥରେ ଡେମୋକ୍ରାଟ୍ ଜୋ ବାଇଡେନ୍ଙ୍କ ହାତକୁ ଯାଇପାରେ ଜର୍ଜିଆ। ଏଠାରେ ଅଦ୍ୟାବଧି ବାଇଡେନ୍ଙ୍କୁ ୨୪,୫୦,୧୧୭(୪୯.୪%) ଓ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ଙ୍କୁ ୨୪,୪୮,୫୩୮(୪୯.୪%) ଭୋଟ ମିଳିଛି। ଜାତୀୟ ସ୍ତରରେ ଭୋଟ ହାରକୁ ଦେଖିଲେ ବାଇଡେନ୍ଙ୍କ ସପକ୍ଷରେ ୭,୩୬,୪୦,୧୩୬(୫୦.୫%) ଓ ଟ୍ରମ୍ପ୍ଙ୍କ ସମର୍ଥନରେ ୬,୯୭,୧୨,୦୩୦(୪୭.୮%) ଖଣ୍ଡ ପପୁଲାର ଭୋଟ ପଡ଼ିଛି। ଇଲେକ୍ଟୋରାଲ କଲେଜ ଭୋଟ ସଂଖ୍ୟା ଦେଖିଲେ ବାଇଡେନ୍ଙ୍କ ହାତରେ ୨୬୪ ଥିବାବେଳେ ଟ୍ରମ୍ପ୍ ୨୧୪ରେ ସୀମିତ ରହିଛନ୍ତି। କୁହୁକ ସଂଖ୍ୟା ସ୍ପର୍ଶ କରିବାକୁ ବାଇଡେନଙ୍କୁ ଆଉ ୬ ଭୋଟ ଆବଶ୍ୟକ। ଏମିତିରେ ଜର୍ଜିଆର ୧୬ ଇଲେକ୍ଟୋରାଲ କଲେଜ ଭୋଟ ନିର୍ଣ୍ଣାୟକ ହେବ ବୋଲି କୁହାଯାଉଛି।
ବୈଧ ଭୋଟରେ ସହଜରେ ଜିତିବି
ନିର୍ବାଚନରେ ଯଦି କେବଳ ଆଇନଗତ ଭୋଟଗୁଡ଼ିକୁ ଗଣତି କରାଯିବ ତେବେ ସହଜରେ ଜିତିଯିବେ ବୋଲି ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ ଦୃଢ଼ୋକ୍ତି ବାଢ଼ିଛନ୍ତି। ରିପବ୍ଲିକାନ୍ ଟ୍ରମ୍ପ୍ଙ୍କ ମତରେ ଯେଉଁ ମତଦାନ କେନ୍ଦ୍ରକୁ ପର୍ଯ୍ୟବେକ୍ଷକଙ୍କୁ ଯିବାକୁ ଅନୁମତି ନ ଦେଇ ଭୋଟ ଦିଆଯାଇଛି ସେଗୁଡ଼ିକୁ ବେଆଇନ ଭୋଟ ବୋଲି ବିବେଚନା କରାଯିବା ଉଚିତ। ଅଦାଲତ ହିଁ ଏନେଇ ନିଷ୍ପତ୍ତି ନେବେ ବୋଲି ଟ୍ରମ୍ପ୍ କହିଛନ୍ତି।
ଦିନକରେ ହଟିଲା ଟ୍ରମ୍ପଙ୍କ ୧୨ ଟୁଇଟ୍
ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ଙ୍କ ୧୨ ଟୁଇଟ୍କୁ ଏହି ସୋସିଆଲ ମିଡିଆ ପ୍ଲାଟଫର୍ମ ହଟାଇଦେଇଛି। ନିର୍ବାଚନ ପରେ ଟ୍ରମ୍ପ୍ ୨୪ ଘଣ୍ଟା ମଧ୍ୟରେ ୩୨ଟି ଟୁଇଟ୍ କରିଥିଲେ। ସେଥିରୁ ୧୨ଟିକୁ ଟୁଇଟର୍ ବିବାଦୀୟ ଓ ନିର୍ବାଚନୀ ପ୍ରକ୍ରିୟାକୁ ନେଇ ବିଭ୍ରାନ୍ତିକର କହି ହଟାଇଦେଇଛି। ଏନେଇ ଟ୍ରମ୍ପ୍ କହିଛନ୍ତି, ଟୁଇଟର୍ ନିୟନ୍ତ୍ରଣ ବାହାରକୁ ଚାଲିଯାଇଛି। ସରକାରଙ୍କ ଉପହାର ଧାରା ୨୩୦ ପ୍ରୟୋଗ କରି ଏପରି କରିପାରିଛି!