ଥୁଆମୂଳ ରାମପୁର, ୨୨ା୭ (ଦୁର୍ଗା କୀର୍ତ୍ତି):କଳାହାଣ୍ଡି ଜିଲା ଥୁଆମୂଳ ରାମପୁର ବ୍ଲକ କର୍ଲାପାଟ ଗ୍ରାମପଞ୍ଚାୟତ ଅନ୍ତର୍ଗତ ପୁରୁଣାଗୁମାରେ ବସୁଧା ଯୋଜନାରେ ନିର୍ମାଣ ହୋଇଥିବା ପାନୀୟଜଳ ପ୍ରକଳ୍ପ ଅଚଳ ଯୋଗୁ ଲୋକେ ଝରଣା ପାଣି ପିଇବାକୁ ବାଧ୍ୟ ହେଉଛନ୍ତି। ସୂଚନାକ୍ରମେ ପୁରୁଣାଗୁମାରେ କିଛିବର୍ଷ ତଳେ ୧୪, ୩୧୪, ୨୪୬ ଟଙ୍କା ବ୍ୟୟବରାଦରେ ବସୁଧା ଯୋଜନାରେ ଓଭରହେଡ୍ ଟାଙ୍କି ନିର୍ମାଣ ହେବା ପରେ ଲୋକେ ବିଶୁଦ୍ଧ ପାଣି ପାଇବା ନେଇ ଖୁସି ହୋଇଥିଲେ। ହେଲେ ୨୦ ଦିନ ହେଲା ପାଣିଟାଙ୍ଗି ଅଚଳ ଅବସ୍ଥାରେ ପଡ଼ିରହିଛି। ଫଳରେ ପୁରୁଣାଗୁମା ଗାଁର ୫ ପଡ଼ା ଯଥା ଲାଇନିଗୁଡ଼ା, କୋସପାଏର, ପୂର୍ଣ୍ଣାଗୁମା ଡୁକୁରିପଡ଼ା, ପୂର୍ଣ୍ଣାଗୁମା ଟିକ୍ରାପଡ଼ା, ପୂର୍ଣ୍ଣାଗୁମା ବସ୍ତିପଡ଼ାର ପ୍ରାୟ ୨୫୦ ପରିବାର ଲୋକେ ଝରଣାର ଗୋଳିଆ ପାଣି ବ୍ୟବହାର କରୁଛନ୍ତି। ବସୁଧା ଯୋଜନାରେ ଗଭୀର ନଳକୂପ ଖନନ ପରେ ନଳକୂଅରୁ ବର୍ତ୍ତମାନ ପାଣି ବାହାରୁ ନ ଥିବା ଲୋକେ ଅଭିଯୋଗ କରିଛନ୍ତି। ଯେଉଁ ଗୋଟିଏ ଦୁଇଟି ନଳକୂଅ ଅଛି ସେଥିରୁ ବାହାରୁଥିବା ପାଣି ସମୁଦ୍ରକୁ ଶଙ୍ଖେ ସଦୃଶ। ଫଳରେ ଗ୍ରାମର ପିଲାଛୁଆଠାରୁ ବୟସ୍କ ପର୍ଯ୍ୟନ୍ତ ନାଳପାଣି ବ୍ୟବହାର କରି ଚର୍ମରୋଗରେ ଆକ୍ରାନ୍ତ ହେଉଥିବା ଗ୍ରାମବାସୀ ପ୍ରକାଶ କରିଛନ୍ତି। ଏ ନେଇ ପଡ଼ାବାସୀ ବିଭାଗୀୟ ଅଧିକାରୀଙ୍କୁ ଜଣାଇଥିଲେ ମଧ୍ୟ ସୁଫଳ ମିଳି ନ ଥିବା କହିଛନ୍ତି। ତୁରନ୍ତ ଅଚଳ ପ୍ରକଳ୍ପ ମରାମତି ପାଇଁ ଅଞ୍ଚଳବାସୀ ଦାବି ଜଣାଇଛନ୍ତି । ଏ ନେଇ ଜଳ ଓ ପରିମଳ ବିଭାଗ କାର୍ଯ୍ୟନିର୍ବାହୀ ଯନ୍ତ୍ରୀ ମନ୍ମଥ ମୁର୍ମୁଙ୍କୁ ପଚାରିବାରୁ ଓଭର ହେଡ ଟାଙ୍କିକୁ ସପ୍ଲାଏ ହୋଇଥିବା ଟ୍ରାନ୍ସଫର୍ମର ଫ୍ୟୁଜ ହୋଇଛି। ଏଣୁ କରେଣ୍ଟ ସମସ୍ୟା ହେତୁ ପାଣି ମୋଟର ଚାଲିପାରୁ ନାହିଁ। ଗାଁ ଲୋକେ ବିଦ୍ୟୁତ୍ ବିଭାଗ ସହ ଯୋଗାଯୋଗ କରି ସମସ୍ୟା ସମାଧାନ କରିବା କଥା। ସେ ମଧ୍ୟ ବିଭାଗୀୟ ଜେଇଙ୍କୁ କହିଥିଲେ, ହେଲେ ସେମାନେ ଶୁଣୁନାହାନ୍ତି ବୋଲି କହିଛନ୍ତି l