ବାସ୍ତୁଶାସ୍ତ୍ର ଅନୁଯାୟୀ ଭାଲେଣ୍ଟାଇନ୍ସ ଡେ’ରେ ଏମିତି କିଛି ଉପହାର ସାଥୀକୁ ଦିଅନ୍ତୁ; ଯାହା ତାଙ୍କୁ ଖୁସି ଦେବା ସହ ତାଙ୍କ ଜୀବନରେ ସୁଖ, ସମୃଦ୍ଧି ବି ଆଣିଦେଉଥିବ…
* ହାର୍ଟ ଶେପ୍ର ଚକୋଲେଟ୍ ବକ୍ସ ଭାଲେଣ୍ଟାଇନ୍ସ ଡେ’ରେ ସାଥୀକୁ ଦେବା ପାଇଁ ସବୁଠୁ ଶୁଭ ଓ ଲୋକପ୍ରିୟ ଉପହାର ହୋଇଥାଏ।
* ନାଲି ଗୋଲାପ ଅତୁଟ ପ୍ରେମର ପ୍ରତୀକ ହୋଇଥିବା ବେଳେ ହ୍ବାଇଟ୍ ଲିଲି ପବିତ୍ରତା ଓ ନିଚ୍ଛକ ପ୍ରେମର ପ୍ରତୀକ ହୋଇଥାଏ। ତେଣୁ ଏହି ଦୁଇ ପ୍ରକାରର ଫୁଲ ସାଥୀକୁ ଉପହାର ସ୍ବରୂପ ଦେଇ ସମ୍ପର୍କକୁ ଆହୁରି ନିବିଡ଼ କରିପାରିବେ।
* ରୁପାର ସମ୍ପର୍କ ଚନ୍ଦ୍ରମା ସହିତ ରହୁଥିବାରୁ ଏହା ଜୀବନରେ ଶୀତଳତା ଓ ପ୍ରେମକୁ ବଢ଼ାଇଥାଏ। ଭାଲେଣ୍ଟାଇନ୍ସ ଡେ’ରେ ସାଥୀକୁ ରୁପାର ପେଣ୍ଡେଣ୍ଟ, ରୂପାର କଡ଼ା ଅଥବା କଏନ୍ ଉପହାରରେ ଦେଇ ସମ୍ପର୍କକୁ ଦୀର୍ଘସ୍ଥାୟୀ କରିପାରିବେ।
* ନାଲି ରଙ୍ଗକୁ ଊର୍ଜା, ପ୍ରେମ ଓ ସୌଭାଗ୍ୟର ପ୍ରତୀକ କୁହାଯାଏ। ଭାଲେଣ୍ଟାଇନ୍ସ ଡେ’ରେ ସାଥୀକୁ ନାଲି ରଙ୍ଗର ବସ୍ତ୍ର ହେଉକି ଶାଲ୍ ଅଥବା ଦୁପଟ୍ଟା ଗିଫ୍ଟ କରି ପ୍ରେମକୁ ଆହୁରି ମଜଭୁତ କରିପାରିବେ।
* ସୁଗନ୍ଧିତ ଜିନିଷ ଘରେ ସକାରାତ୍ମକ ଊର୍ଜାକୁ ଆକର୍ଷିତ କରେ। ଗୋଲାପ ହେଉକି ଲାଭେଣ୍ଡର ଅଥବା ଚନ୍ଦନ ବାସ୍ନାଯୁକ୍ତ ମହମବତି ଅବା ଅଗରବତିକୁ ଏହି ଦିନେ ସାଥୀକୁ ଉପହାର ଦିଆଯାଇପାରେ।
* ରାଧା-କୃଷ୍ଣଙ୍କର ଯୁଗଳ ମୂର୍ତ୍ତି ହେଉ କି ସ୍ଫଟିକ୍ କଇଁଛ ଅବା ଲଡୁ ଗୋପାଳଙ୍କ ମୂର୍ତ୍ତିକୁ ବି ଏହି ଦିନେ ଉପହାରରେ ଦେବା ଶୁଭ।
* ତୁଳସୀ ଗଛକୁ ପବିତ୍ର ଓ ସୌଭାଗ୍ୟର ପ୍ରତୀକ ବୋଲି କୁହାଯାଏ। ଭାଲେଣ୍ଟାଇନ୍ସ ଡେ’ରେ ସାଥୀକୁ ପବିତ୍ର ମନରେ ତୁଳସୀ ଗଛଟିଏ ଉପହାର ଦେଲେ ସମ୍ପର୍କ ସ୍ଥାୟିତ୍ୱ ହୁଏ ବୋଲି ବିଶ୍ୱାସ ରହିଛି।