ଓ୍ବାଶିଂଟନ୍,୨୬।୨: ଡୋନାଲ୍ଡ ଟ୍ରମ୍ପ ଦ୍ୱିତୀୟ ଥର ପାଇଁ ଆମେରିକାର ରାଷ୍ଟ୍ରପତି ହୋଇଛନ୍ତି। ସେ ଦାୟିତ୍ୱ ଗ୍ରହଣ କରିବା ମାତ୍ରେ ଅନେକ ଗୁରୁତ୍ୱପୂର୍ଣ୍ଣ ନିର୍ଦ୍ଦେଶ ଜାରି କରିଥିଲେ। ସମ୍ପ୍ରତି, ବେଆଇନ ଭାବରେ ଆମେରିକାରେ ପ୍ରବେଶ କରିଥିବା ଅଣ-ନାଗରିକମାନଙ୍କୁ ଦେଶରୁ ଖାଲି କରୁଛନ୍ତି ଟ୍ରମ୍ପ ସରକାର। ଏବେ ଖବର ଆସିଛି ଯେ ଟ୍ରମ୍ପ ଆମେରିକୀୟ ନାଗରିକତା ପ୍ରଦାନ ପାଇଁ ଏକ ନୂଆ ଭିସା ଆଣିପାରନ୍ତି। ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ନିବେଶକଙ୍କୁ ଆକର୍ଷିତ କରିବା ପାଇଁ ଏକ ବଡ଼ ଯୋଜନା କରିଛନ୍ତି। ଏହି ଯୋଜନା ଅନୁଯାୟୀ ସେମାନେ ଲୋକମାନଙ୍କୁ US Gold Card ଭିସା ଦେଇପାରନ୍ତି। ଆସନ୍ତୁ ଜାଣିବା ପୂରା ଯୋଜନା କ’ଣ…
ନିବେଶକଙ୍କୁ ଆକର୍ଷିତ କରିବା ପାଇଁ ଡୋନାଲ୍ଡ ଟ୍ରମ୍ପ ଆମେରିକାରେ ନୂଆ ଭିସା ପ୍ରଚଳନ କରିପାରନ୍ତି। ଡୋନାଲ୍ଡ ଟ୍ରମ୍ପ ଲୋକଙ୍କୁ ୫ ନିୟୁତ ଡଲାର ଅର୍ଥାତ ୪୫ କୋଟି ଟଙ୍କାରେ US Gold Card ଭିସା ଦେଇପାରନ୍ତି। ଏହି ଗୋଲ୍ଡ କାର୍ଡ ଭିସା ଆମେରିକାରେ 35 ବର୍ଷ ପୁରୁଣା ନିବେଶକ ଭିସାକୁ ବଦଳାଇ ପାରିବ। ଏହି ଯୋଜନା ଘୋଷଣା କରିବା ସମୟରେ ଟ୍ରମ୍ପ କହିଥିଲେ ଯେ ଏହିପରି ଭାବରେ ଆମେରିକୀୟ ନାଗରିକତା ଗ୍ରହଣ କରୁଥିବା ଲୋକମାନେ ମଧ୍ୟ ଧନୀ ଏବଂ ସଫଳ ହେବେ ଏବଂ ସେମାନେ ଏଠାରେ ଟିକସ ମଧ୍ୟ ଦେବେ। ଏହା ବ୍ୟତୀତ ନିବେଶକମାନେ ଭିସା ମାଧ୍ୟମରେ ଆମେରିକାରେ ବ୍ୟବସାୟ କରୁଥିବା ଲୋକଙ୍କୁ ନିଯୁକ୍ତି ମଧ୍ୟ ପ୍ରଦାନ କରିବେ।
ଆମେରିକାର ବାଣିଜ୍ୟ ମନ୍ତ୍ରୀ ହାୱାର୍ଡ ଲୁଟନିକଙ୍କ ଅନୁସାରେ, US Gold Card ଦୁଇ ସପ୍ତାହ ମଧ୍ୟରେ ପୁରୁଣା EB-5 ଭିସାକୁ ବଦଳାଇବ। ବିଦେଶୀ ନିବେଶକୁ ଆକର୍ଷିତ କରିବା ପାଇଁ EB-5 ଭିସା ପ୍ରଚଳନ କରାଯାଇଥିଲା। ଏହି ସୱତନ୍ତ୍ର ପ୍ରକାରର ଭିସା ସେମାନଙ୍କ ପାଇଁ ଯେଉଁମାନେ ଏକ ଆମେରିକୀୟ କମ୍ପାନୀରେ ପ୍ରାୟ $1 ନିୟୁତ କିମ୍ବା ତା’ଠାରୁ ଅଧିକ ନିବେଶ କରନ୍ତି ଏବଂ ଅତି କମରେ 10 ଜଣଙ୍କୁ ନିଯୁକ୍ତି ଦିଅନ୍ତି। ଏହି ଗୋଲ୍ଡ କାର୍ଡ ଏବେ ଏକ ଗ୍ରୀନ କାର୍ଡ କିମ୍ବା ସ୍ଥାୟୀ ଆଇନଗତ ବାସସ୍ଥାନ ପ୍ରମାଣପତ୍ର ମଧ୍ୟ ହେବ। ଏହି କାର୍ଡର ବିଶେଷତ୍ୱ ହେଉଛି ଏଥିରେ କୌଣସି ଠକେଇ ହେବ ନାହିଁ ଏବଂ ଏପରି ମାମଲା ହ୍ରାସ ପାଇବ। ଟ୍ରମ୍ପ ସରକାର ଏକ କୋଟି ଗୋଲ୍ଡ କାର୍ଡ ବିକ୍ରି କରିବାକୁ ଯୋଜନା କରିଛି।