ନୂଆଦିଲ୍ଲୀ,୨୪।୧୦: ଋଷିଆ-ୟୁକ୍ରେନ ଯୁଦ୍ଧକୁ ଶେଷ କରିବା ପାଇଁ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ଙ୍କ ଅନୁରୋଧ କ୍ରମେ ଭାରତ, ଚାଇନା ଭଳି ଋଷିଆରୁ ତେଲ ଆମଦାନୀ ହ୍ରାସ କରୁଛି ବୋଲି ହ୍ୱାଇଟ୍ ହାଉସ୍ ପୁନର୍ବାର ଦାବି କରିଛି। ଅନ୍ୟପକ୍ଷରେ, ଭାରତ ଏହି ଦାବିକୁ ଖଣ୍ଡନ କରିଛି ଏବଂ କହିଛି ଯେ ଏହାର ଶକ୍ତି ନୀତି କେବଳ ଜାତୀୟ ସ୍ୱାର୍ଥ ଏବଂ ଉପଭୋକ୍ତା ସୁରକ୍ଷା ଦ୍ୱାରା ପରିଚାଳିତ।
ହ୍ୱାଇଟ୍ ହାଉସ୍ ପ୍ରେସ୍ ସଚିବ କାରୋଲିନ୍ ଲେଭିଟ୍ ଗୁରୁବାର ଏକ ସାମ୍ବାଦିକ ସମ୍ମିଳନୀରେ କହିଛନ୍ତି ଯେ ଋଷିଆ-ୟୁକ୍ରେନ ଯୁଦ୍ଧ ଶେଷ କରିବାରେ ଅଗ୍ରଗତିର ଅଭାବ ହେତୁ ରାଷ୍ଟ୍ରପତି ଟ୍ରମ୍ପ୍ “ଅଧିକରୁ ଅଧିକ ହତାଶ” ହେଉଛନ୍ତି।
ସେ କହିଛନ୍ତି, “ଆମେ ଜାଣୁ ଯେ ରାଷ୍ଟ୍ରପତିଙ୍କ ଅନୁରୋଧ କ୍ରମେ ଭାରତ ଋଷିଆରୁ ତେଲ କ୍ରୟ ହ୍ରାସ କରିଛି। ଚାଇନା ମଧ୍ୟ ତାହା କରୁଥିବାର ଖବର ଆସିଛି। ଋଷିଆର ଦୁଇ ବୃହତ୍ତମ ତୈଳ କମ୍ପାନୀ ‘ରୋସ୍ନେଫ୍ଟ୍’ (Rosneft) ଏବଂ ‘ଲୁକୋଇଲ୍’ (Lukoil) ଉପରେ ଆମେରିକା ପକ୍ଷରୁ କଠୋର କଟକଣା ଲଗାଯାଇଛି।”
ଅନ୍ୟପକ୍ଷରେ ଭାରତୀୟ ଅଧିକାରୀମାନେ ପୁଣି ଥରେ ଦୋହରାଇଛନ୍ତି ଯେ ଭାରତର ଶକ୍ତି ନୀତି ସ୍ୱାଧୀନ ଏବଂ ଏହା ସ୍ଥିର ମୂଲ୍ୟ ଓ ନିର୍ଭରଯୋଗ୍ୟ ଯୋଗାଣ ଶୃଙ୍ଖଳା ଉପରେ କେନ୍ଦ୍ରିତ। କୌଣସି ସମନ୍ୱିତ କାର୍ଯ୍ୟାନୁଷ୍ଠାନର ଦାବିକୁ ଭାରତ ପ୍ରତ୍ୟାଖ୍ୟାନ କରିଛି।
ଲେଭିଟ୍ କହିଛନ୍ତି ଯେ ଶାନ୍ତି ପ୍ରସ୍ତାବ ଆଡ଼କୁ ଆଗେଇବାରେ ଋଷିଆ ରାଷ୍ଟ୍ରପତି ଭ୍ଲାଦିମିର୍ ପୁଟିନ୍ “ଯଥେଷ୍ଟ ଆଗ୍ରହ କିମ୍ବା କାର୍ଯ୍ୟାନୁଷ୍ଠାନ” ଦେଖାଉ ନ ଥିବାରୁ ରାଷ୍ଟ୍ରପତି ଟ୍ରମ୍ପ୍ ହତାଶ ଅଛନ୍ତି। ମସ୍କୋ ଆମେରିକାର ଅସ୍ତ୍ରବିରତି ପ୍ରସ୍ତାବକୁ ପ୍ରତ୍ୟାଖ୍ୟାନ କରିବା ପରେ ଦୁଇ ନେତାଙ୍କ ମଧ୍ୟରେ ଏହି ବର୍ଷ ଶେଷରେ ହେବାକୁ ଥିବା ବୈଠକକୁ ଅନିର୍ଦ୍ଦିଷ୍ଟ କାଳ ପାଇଁ ସ୍ଥଗିତ ରଖାଯାଇଛି।
ଏହାର ଜବାବରେ ମସ୍କୋରେ ରାଷ୍ଟ୍ରପତି ପୁଟିନ୍ ଆମେରିକାକୁ ଅର୍ଥନୈତିକ ଚାପକୁ ଏକ ଉପକରଣ ଭାବରେ ବ୍ୟବହାର କରିଥିବା ଅଭିଯୋଗ କରିଛନ୍ତି। ସେ କହିଛନ୍ତି, “ଏହି କୌଶଳ ବିଫଳ ହେବ। କୌଣସି ଆତ୍ମ ସମ୍ମାନ ଥିବା ଦେଶ କଦାପି ଚାପରେ କୌଣସି ନିଷ୍ପତ୍ତି ନିଏ ନାହିଁ।”